រាជធានីភ្នំពេញ ៖ បុរសម្នាក់សង្ស័យប្រើប្រាស់គ្រឿងញៀនលើសកម្រិត បណ្ដាលឲ្យវង្វេងវង្វាន់រហូតដុតផ្ទះខ្លួនឯងហើយឈ្លក់ផ្សែងភ្លើងសន្លប់ផ្អើលដល់អ្នកជិតខាង និងសមត្ថកិច្ចទៅអន្តរាគមន៍ ។ ករណីនេះ កើតឡើងកាលពីវេលាម៉ោងប្រមាណ៤និង៣០នាទីទៀបភ្លឺថ្ងៃទី៥ ខែសីហា ឆ្នាំ២០២០ នៅក្នុងបុរីចំការដូង ផ្ទះលេខE២៧A យីហោនីនស្តាយសំអាងការ សង្កាត់ដង្កោ ខណ្ឌដង្កោ ។
បុរសដែលដុតផ្ទះខ្លួនឯងនេះឈ្មោះ កេង នីន អាយុ៣៥ឆ្នាំ ។ ប្រភពពីអ្នករស់នៅជុំវិញផ្ទះកើតហេតុនិយាយថា បុរសខាងលើក្រុមគ្រួសារនិយាយមិនស្តាប់ទេ សូម្បីឪពុកម្តាយក៏ដោយ ហើយដោយសារតែការប្រើប្រាស់គ្រឿងញៀន គឺតែងបង្កជម្លោះនិងរករឿងអ្នកជិតខាងជាច្រើនលើកច្រើនសា សព្វថ្ងៃស្នាក់នៅតែម្នាក់ឯង ក្នុងផ្ទះបើកសម្អាងការខាងលើ ។
ប្រភពដដែលបន្តទៀតថា នាវេលាទៀបភ្លឺនោះ មានបងប្អូនប្រជាពលរដ្ឋខ្លះចេញហាត់ប្រាណ និងខ្លះទៀតក៏ចេញទៅប្រកបការងារលក់ដូរដូចសព្វដង ស្រាប់តែប្រទះឃើញផ្ទះខាងលើមានផ្សែងហុយខ្មួល និងមានអណ្ដាតភ្លើងឆេះនៅខាងក្នុង ។ ពេលនោះពួកគាត់ក៏ឆោឡោថាមានភ្លើងឆេះ ផ្អើលអស់អ្នកជិតខាងជួយអន្តរាគមន៍ហៅសមត្ថកិច្ច និងរថយន្តពន្លត់អគ្គិភ័យផងដែរ ។ ដោយផ្ទះនោះចាក់សោពីខាងក្នុង ពួកគាត់ជាអ្នកជិតខាងបានសម្រេចយករណារមកអារសោ និងទាញទុយោទឹកបាញ់បណ្តើរទើបភ្លើងរលត់ទៅវិញ តក៏ែនៅមានផ្សែងហុយនៅពេញផ្ទះ ។
ក្រោយមក ឃើញមានសមត្ថកិច្ចមូលដ្ឋាន និងរថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញ១គ្រឿងទៅដល់ តែមិនបានបាញ់ទឹកពន្លត់នោះទេ ។ សមត្ថកិច្ចបានចូលទៅក្នុងផ្ទះ ស្រាប់តែឃើញបុរសខាងលើសន្លប់ស្ដូកស្ដឹងនៅមុខបន្ទប់ទឹក ក៏នាំគ្នាសែងចេញមកខាងក្រៅដើម្បីជួយសង្គ្រោះ ។
បន្ទាប់ពីយកចេញមកក្រៅហើយ សមត្ថកិច្ចបានទាក់ទងហៅរថយន្តសង្គ្រោះឲ្យមកដឹក លុះ
ពេលរថយន្តសង្គ្រោះមកដល់ ស្រាប់តែបុរសនេះដឹងខ្លួននិងនិយាយរវើរវាយដូចជាមនុស្សបែកថ្នាំ ក៏ដឹកយកទៅគ្លីនិកសួគ៌ាតែម្តងទៅ ។
សមត្ថកិច្ចបានឲ្យដឹងថា ករណីនេះមិនមានរាលដាលដល់ផ្ទះអ្នកដទៃទេ គ្រាន់តែខូចខាតសម្ភារគ្រឿងសម្អាងនៅក្នុងផ្ទះអស់មួយចំនួនតែប៉ុណ្ណោះ ៕
ចែករំលែកព័តមាននេះ