រាជធានីភ្នំពេញ ៖ ទីតាំងបើកលេងល្បែងអាប៉ោងមួយកន្លែង បានត្រូវកម្លាំងគណៈបញ្ជាការឯក ភាពខណ្ឌឫស្សីកែវ ចុះទៅបង្ក្រាបដោយដេញចាប់រត់ប្រសាចទាំងយប់ និងឃាត់ខ្លួនអ្នកញៀនល្បែងចំនួន៣នាក់ ព្រមទាំងដកហូតបានមេអាប៉ោង ព្រមទាំងចាន និងសម្ភារមួយចំនួនទៀត ។
ការចុះបង្ក្រាបល្បែងស៊ីសងនេះ បានធ្វើឡើងកាលពីវេលាម៉ោងប្រមាណ៩និង៣០នាទីយប់ថ្ងៃ
ទី៤ ខែសីហា ឆ្នាំ២០២០ នៅតារាងបាល់ចំណុចដីឡូត៍គ្មានលេខ ផ្លូវលេខ៩៩ ភូមិបឹងសាឡាងសង្កាត់ឫស្សីកែវ ខណ្ឌឫស្សីកែវ ក្រោមការដឹកនាំ និងបញ្ជាផ្ទាល់ដោយលោក ជា ពិសី អភិបាលខណ្ឌ ។ ក្រុមអ្នកញៀនល្បែង៣ដែលត្រូវបានឃាត់ខ្លួនមាន ១-ឈ្មោះ យ៉ាន់ ច័ន្ទណារាជ ភេទប្រុស អាយុ២៧ឆ្នាំ ២-ឈ្មោះ សេង អាន ភេទប្រុស អាយុ២៨ឆ្នាំ និង៣-ឈ្មោះ លឹម ខួច ភេទប្រុស អាយុ២៥ឆ្នាំ ។
តាមនគរបាលឲ្យដឹងថា ល្បែងអាប៉ោងនេះបានបើកលេងលួចលាក់នៅក្នុងបន្ទប់ម៉ាស៊ីនត្រជាក់ ក្នុងបរិវេណតារាងបាល់ទះខាងលើជាយូរមកហើយ ។ ដោយមានការរាយការណ៍ពីប្រជាពលរដ្ឋ ទើបគណៈបញ្ជាការឯកភាពខណ្ឌឫស្សីកែវ ដឹកនាំដោយលោក ជា ពិសី អភិបាលខណ្ឌ ចុះបង្ក្រាបតែម្តង ។
តាមព័ត៌មានឲ្យដឹងថា មុនពេលមានការទៅបង្ក្រាបនោះ គេឃើញក្រុមអ្នកញៀនល្បែង ពពាក់ពពូនគ្នាចាក់ ព្រមទាំងហោ៊កញ្ជ្រៀវផងដែរ ។លុះសមត្ថកិច្ចទៅដល់ ក្រុមអ្នកញៀនល្បែង ទាំងនោះបានរត់ប្រសាចគេចខ្លួនអស់ ឃាត់ខ្លួនបាន៤នាក់ តែពាក់ព័ន្ធ៣នាក់ ព្រមទាំងដកហូតបានវត្ថុតាងរួមមាន មេអាប៉ោង២គ្រាប់ ចានសម្រាប់អាប៉ោង២ផ្តិលសម្រាប់គ្រប១ ហាន់តោ១ផ្ទាំង ចានជរ័១ ព្រមទាំងសម្ភារផ្សេងៗមួយចំនួនទៀត ។
អ្នកញៀនល្បែងទាំង៣នាក់រួមនឹងវត្ថុតាង ត្រូវបានបញ្ជូនទៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ