រឿងធ្វើអំពើល្អបានផលបុណ្យតិចឬច្រើននោះ មិនអាស្រ័យលើសកម្មភាពនៃការលះបង់ទ្រព្យសម្បត្តិប៉ុនណានោះទេ តែអាស្រ័យលើចេតនានិងទឹកចិត្តដ៏បរិសុទ្ធរបស់អ្នកប្រព្រឹត្តធ្វើឯណោះទេតើ ។
អ្នកទស្សនវិជ្ជាផ្នែកព្រះពុទ្ធសាសនាបានលើកឡើងថា តាមពិតទៅគ្មានអ្នកណាអាចវាស់ស្ទង់ ឬរាប់ចំនួនបុណ្យថាប៉ុណ្ណេះ ឬប៉ុណ្ណោះបានទេ ព្រោះវាជាសភាវធម្មជាតិដែលកើតក្នុងចិត្ត ដែលយើងមើលមិនឃើញ ស្មានមិនបាន ។
ប៉ុន្តែថ្វីបើការធ្វើបុណ្យច្រើនបានបុណ្យច្រើន ធ្វើបុណ្យតិចបានបុណ្យតិច អ្នកដទៃមិនអាចដឹងបានមែន តែគង់យើងខ្លួនឯង ជាអ្នកដឹងពិតប្រាកដថាតើការលះទ្រព្យនោះដោយសទ្ធាពិត ឬក៏នៅជាប់ជំពាក់ ?
សាធុជនអ្នកប្រារព្ធនូវកម្មវិធីបុណ្យធំៗ អស់លុយរាប់ម៉ឺនដុល្លារ តែបើការលះបង់នោះគ្រាន់តែដើម្បីឲ្យគេសរសើរ ចង់បានកិត្តិយសមុខមាត់ មិនមានបញ្ញា មិនឈ្លាសក្នុងកិច្ចការបុណ្យកុសល នោះផលបុណ្យនឹងមិនកើតឡើងច្រើនឡើយ ។
ផ្ទុយទៅវិញសូម្បីបាយតែមួយវែក ទឹកមួយកែវលះបង់ធ្វើជាទានប្រកបដោយចិត្តសប្បុរសពិតៗ ពោរពេញទៅដោយមេត្តាករុណាចង់ឲ្យអ្នកដទៃបានសុខ បានឆ្អែត នោះហើយជាបុណ្យច្រើនអនេក ។
ហេតុនេះហើយ គ្រប់ពេលដែលអ្នកធ្វើបុណ្យសាងកុសល ទោះបីជាធ្វើបុណ្យអ្វីក៏ដោយត្រូវតែធ្វើចិត្តឱ្យបានសប្បាយ រីករាយ ជ្រះថ្លា និងប្រកបដោយបញ្ញា ។ ប្រសិនបើអ្នកត្រេកអរ ពេញចិត្តហើយ សូម្បីតែធ្វើបុណ្យ ដោយការលះបង់ទ្រព្យតិចតួចក៏ដោយ ក៏បានអានិសង្សច្រើនលើសលន់ ។ សាន សារិន
ចែករំលែកព័តមាននេះ