ខេត្តបន្ទាយមានជ័យ ៖ នៅទីបំផុត ការរុករកបុរសឃ្វាលគោក្នុងស្រះទឹកចាក់សំរាមនៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ត្រូវបានបិទបញ្ចប់តាមសំណូមពររបស់សាច់ញាតិដែលថា អស់ចិត្តហើយ បើទោះជាឆែកប្រព័ន្ធទូរស័ព្ទដែលជនរងគ្រោះបានប្រើមុនពេលបាត់ខ្លួនឃើញនៅកណ្តាលស្រះក៏ដោយ។ លោក…
ខេត្តបន្ទាយមានជ័យ ៖ នៅទីបំផុត ការរុករកបុរសឃ្វាលគោក្នុងស្រះទឹកចាក់សំរាមនៅភូមិព្រៃគប់ សង្កាត់ផ្សារកណ្តាល ក្រុងប៉ោយប៉ែត ត្រូវបានបិទបញ្ចប់តាមសំណូមពររបស់សាច់ញាតិដែលថា អស់ចិត្តហើយ បើទោះជាឆែកប្រព័ន្ធទូរស័ព្ទដែលជនរងគ្រោះបានប្រើមុនពេលបាត់ខ្លួនឃើញនៅកណ្តាលស្រះក៏ដោយ។
លោក ស៊ា សៅឌី នាយប៉ុស្តិ៍ព្រៃគប់នៃនគរបាលការពារព្រំដែនគោកលេខ៩១១ ប្រាប់តាមបណ្តាញសង្គមវ៉សអាប់ កាលពីរសៀលថ្ងៃទី៥ ខែសីហាថា ការរុករកអ្នកឃ្វាលគោដែលបាត់ខ្លួន ហើយគេសង្ស័យថា អាចធ្លាក់លង់ទឹកក្នុងស្រះចាក់សំរាមកាលពីថ្ងៃទី៣០ ខែកក្កដា កន្លងទៅនោះ នៅថ្ងៃនេះត្រូវបានបិទបញ្ចប់ហើយ ហើយលទ្ធផលនៅតែរកមិនឃើញដដែល។
លោកនាយប៉ុស្តិ៍បន្តថា ការបិទបញ្ចប់ការរុករកជនរងគ្រោះនេះ គឺធ្វើឡើងតាមសំណូមពរសាច់ញាតិជនរងគ្រោះ ព្រោះអាណិតដល់អាជ្ញាធរ និងសមត្ថកិច្ច ប៉ុន្តែលោកថា នាំគ្នាតាមរកលើគោកវិញម្តង។
លោកបញ្ជាក់ថា ពេលដែលឆែកមើលប្រព័ន្ធទូរស័ព្ទឡូខេសិន បានបង្ហាញថា ទូរស័ព្ទរបស់ជនរងគ្រោះប្រើ គឺនៅកណ្តាលស្រះតែម្តង។ យ៉ាងណាក៏ដោយករណីនេះ ក្រុមសាច់ញាតិបាននាំគ្នាធ្វើបុណ្យឧទ្ទិសកុសលជូនជនរងគ្រោះរួចទៅហើយ បើសិនជាជនរងគ្រោះបានបាត់បង់ជីវិត និងបួងសួងថា បើនៅរស់មានជីវិត សូមឲ្យជួបជុំសាច់ញាតិវិញ។
គួររំលឹកថា ៖ ៥ថ្ងៃហើយ! នៅតែរកអ្នកឃ្វាលគោមិនឃើញ ខណៈសមត្ថកិច្ចបន្តរុករក (វីដេអូ)៕
ចែករំលែកព័តមាននេះ