ខេត្តសៀមរាប ៖ សមត្ថកិច្ចចម្រុះខេត្តសៀមរាប បានបន្តសហការគ្នាចុះផ្អាកសកម្មភាពទីតាំងមណ្ឌលកម្សាន្តទេសចរណ៍មនុស្សពេញវ័យ បៀរហ្គាឌិន (មានការប្រគំតន្ត្រី)ចំនួន៤កន្លែង នៅកណ្តាលក្រុងសៀមរាប ដែលការបង្ក្រាបនេះ បានធ្វើភ្ញាក់ផ្អើលយ៉ាងខ្លាំង នៅយប់ថ្ងៃទី០៤ សីហា ស្ថិតនៅក្នុងភូមិជន្លង់ សង្កាត់សាលាកំរើក ក្រុង ខេត្តសៀមរាប។
បើតាមការបញ្ជាក់ពីលោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាប បានឲ្យដឹងថា តំណាងរដ្ឋបាលក្រុងសៀមរាប និងកម្លាំងនៃគណៈបញ្ជាការឯកភាពរដ្ឋបាលក្រុងសៀមរាប បានចុះសហការជាមួយ ក្រុមការងារអធិការកិច្ចនៃមន្ទីរទេសចរណ៍ ខេត្តសៀមរាប បន្តធ្វើការល្បាត និងចុះផ្អាកសកម្មភាពទីតាំងមណ្ឌលកម្សាន្តទេសចរណ៍មនុស្សពេញវ័យ បៀរហ្គាឌិន (មានការប្រគំតន្ត្រី)៤កន្លែង ស្ថិតនៅក្នុងភូមិជន្លង់ សង្កាត់សាលាកំរើក ក្រុងសៀមរាប ខេត្តសៀមរាប ដែលមាន ឈ្មោះ ដូចខាង ក្រោម៖
១-សែនសប្បាយហ្កាឡាក់ស៊ី (អាជ្ញាបណ្ណទេសចរណ៍ហួសសុពល ភាព) ។ ២-សែនមនោរម្យ ក្លាស៊ិក ៥ (គ្មានអាជ្ញាបណ្ណទេសចរណ៍)។៣-សែន មនោរម្យ ក្លាស៊ិក (គ្មានអាជ្ញាបណ្ណទេស ចរណ៍។៤-ផ្លាទីនឹម សែនសប្បាយ (គ្មានអាជ្ញាបណ្ណទេសចរណ៍)។ទីតាំងមណ្ឌលកម្សាន្តទេសចរណ៍មនុស្សពេញវ័យ បៀរ ហ្គាឌិន (មានការប្រគំតន្ត្រី)ទាំង៤ខាងលើនេះ មានច្បាប់អនុញ្ញាតអាជីវកម្ម ០៣ កន្លែង អាជ្ញាប័ណ្ណហួសសុពលភាព ០១កន្លែង ព្រមទាំងលួចបើកអាជីវកម្មល្មើសនឹងបទបញ្ជារបស់រាជរដ្ឋា ភិបាល ព្រមទាំងសេចក្តីណែនាំរបស់រដ្ឋបាលខេត្តសៀម រាប ក្នុងដំណាក់កាលនៃការបង្ការ និងទប់ស្កាត់ការរីករាលដាលនៃជំងឺកូវី១៩នេះ។
ក្រុមការងារចំរុះបានធ្វើកំណត់ហេតុ និងណែនាំឲ្យម្ចាស់អាជីវកម្មផ្អាកអាជីវកម្មរបស់ខ្លួន និងដាក់ពាក្យស្នើសុំច្បាប់នៅច្រកចេញចូលតែមួយរដ្ឋបាលខេត្ត និងអនុវត្តតាមវិធានសុវត្ថិភាពរបស់ ក្រសួងសុខាភិបាល និងក្រសួងទេស ចរណ៍ ដើម្បីប្រែក្លាយទៅជាភោជនីយ ដ្ឋានឲ្យបានត្រឹមត្រូវ ទើបអាចបើកដំណើរការអាជីវកម្មបានវិញ។
សូមបញ្ជាក់ថា ជុំវិញករណីខាងលើនោះដែរ អាជ្ញាធរមូលដ្ឋាន សូមអំពាវនាវដល់ម្ចាស់អាជីវកម្មបៀរហ្គាឌិន ស្កាយបារ បារបារាំង ក្នុងក្រុងសៀមរាបទាំងអស់ អញ្ជើញដាក់ពាក្យស្នើសុំច្បាប់នៅច្រក ចេញចូលតែមួយរបស់រដ្ឋបាលខេត្ត និងអនុវត្តតាមវិធានសុវត្ថិភាពរបស់ក្រសួងសុខាភិបាល ក៏ដូចជាក្រសួងទេសចរណ៍ ដើម្បីប្រែ ក្លាយទៅជាភោជនីយដ្ឋាន ទើបអាចប្រកបអាជីវកម្មបាន៕
ចែករំលែកព័តមាននេះ