ADផ្ទាំងផ្សព្វផ្សាយពាណិជ្ជកម្ម

ផ្អើលពលរដ្ឋចោមរោមមើល! បុរសម្នាក់ត្រូវម៉ូតូសង្កត់ពីលើក្នុងប្រឡាយទឹក

3 ឆ្នាំ មុន

ភ្នំពេញ
០៥ ខែ សីហា ឆ្នាំ ២០២០ ម៉ោង ១៦:០៩

រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជនជាជាងដែកម្នាក់បានទៅផឹកស៊ីនៅផ្ទះមេជាងរបស់ខ្លួន លុះពេលស្រវឹងធ្លាក់ភ្នែកក៏បានបែកគ្នារួចជិះម៉ូតូត្រឡប់ទៅកាន់កន្លែងស្នាក់នៅវិញ ស្រាប់តែបាត់ដំណឹងឈឹងតែម្ដង។ ក្រោយមកក៏ត្រូវអ្នកភូមិប្រទះឃើញដេកបាត់បង់ជីវិតដោយត្រូវម៉ូតូសង្កត់ពីលើក្នុងប្រឡាយទឹកដែលគេដាក់លូមិនទាន់ហើយ បង្កឲ្យមានការភ្ញាក់ផ្អើលកាលពីម៉ោង១១និង៣០យប់ ថ្ងៃទី៤ ខែសីហា…

សេចក្តីរាយការណ៍បន្តថា យុវជនរងគ្រោះខាងលើនោះឈ្មោះបូ ហួរ អាយុ២៣ឆ្នាំ មុខរបរជាងដែក ស្នាក់នៅកន្លែងធ្វើការនៅក្នុងភូមិត្រពាំងអណ្ដូង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ និងមានទីលំនៅបច្ចុប្បន្ននៅក្នុងភូមិព្រែកគ្រោះ ឃុំព្រែកអំបិល ស្រុកស្អាង ខេត្តកណ្ដាល ដែលបានបាត់បង់ជីវិតក្នុងប្រឡាយទឹកដោយមានម៉ូតូ១គ្រឿងម៉ាកហុងដាវ៉េវ ពណ៌ខ្មៅ ពាក់ស្លាកលេខ កណ្ដាល1B-4299 សង្កត់ជាប់ពីលើ ហើយនៅក្បែរមាត់ប្រឡាយនោះមានវ៉ែនតាខ្មៅ២ ឆ្នាំងសាកទូរស័ព្ទ និងស្បែកជើងផ្ទាត់ផងដែរ។

តាមប្រភពព័ត៌មានបានឲ្យដឹងថា យុវជនរងគ្រោះទើបតែមកស្នាក់នៅធ្វើការនៅកន្លែងជាងដែកស្ថិតក្នុងភូមិត្រពាំងអណ្ដូងបានរយៈពេល១ខែប៉ុណ្ណោះ ដោយឡែកនៅល្ងាចថ្ងៃទី៤ ខែសីហា យុវជនរងគ្រោះបានទៅចូលរួមផឹកស៊ីនៅផ្ទះមេជាងដែកនៅក្នុងភូមិសាមគ្គីទី៤ សង្កាត់ត្រពាំងក្រសាំង។ ខណៈនោះផឹកជុំគ្នា៣នាក់ ហើយផឹកស្រាបៀរអស់១កេសកន្លះលុះដល់ពេលយប់ជ្រៅក្រោយពីស្រវឹងធ្លាក់ភ្នែក ទើបបែកគ្នាទៅរកកន្លែសម្រាករៀងៗខ្លួន ចំណែក យុវជនរងគ្រោះក៏បានជិះម៉ូតូ១គ្រឿងត្រឡប់ទៅកន្លែងស្នាក់នៅវិញ រួចក៏ស្រាប់តែបាត់ខ្លួនរហូតតែម្ដង។

ប្រភពដដែលបន្តថា រហូតដល់ម៉ោង១១និង៣០នាទីយប់ថ្ងៃដដែល ទើបត្រូវបានអ្នកភូមិធ្វើដំណើរឆ្លងកាត់តាមផ្លូវបេតុងខាងលើ ប្រទះឃើញម៉ូតូ១គ្រឿងនៅក្នុងប្រឡាយទឹកដែលគេជីកដាក់លូមិនទាន់ហើយ ក៏ចូលទៅមើលជិត ស្រាប់តែឃើញជនរងគ្រោះត្រូវម៉ូតូសង្កត់ពីលើ និងដេកបាត់បង់ជីវិតនៅក្នុងទឹកប្រឡាយលិចបាត់ ដោយមើលឃើញតែដៃ និងជើងប៉ុណ្ណោះ។

បន្ទាប់មកក៏រាយការណ៍ជូននគរបាលប៉ុស្តិ៍ត្រពាំងក្រសាំង ឲ្យចុះទៅពិនិត្យមើល ហើយនគរបាលប៉ុស្តិ៍បានការពារកន្លែងកើតហេតុ និងរាយការណ៍បន្តទៅកាន់នគរបាលផ្នែកចរាចរ និងផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យ បានដឹង ដើម្បីចុះសហការគ្នាធ្វើការតាមជំនាញ ព្រោះក្រៅពីការសង្ស័យថា ជាករណីគ្រោះថ្នាក់ចរាចរណ៍ ក៏សង្ស័យថាជាអំពើឃាតកម្មផងដែរ។

ប្រភពដដែលបានបន្ថែមទៀតថា រហូតដល់ម៉ោង៧ព្រឹក ថ្ងៃទី៥ ខែសីហានេះ ទើបកម្លាំងនគរបាលចុះទៅកាន់កន្លែងកើតហេតុ និងពិនិត្យជុំវិញទីនោះ ព្រមទាំងលើកម៉ូតូ និងសាកសពចេញពីក្នុងទឹកប្រឡាយ។ ហើយជាជំហានដំបូងសមត្ថកិច្ចបានសង្ស័យថា ជាឧប្បត្តិហេតុគ្រោះថ្នាក់ចរាចរណ៍ ព្រោះឃើញម៉ូតូរងការខូចខាតផ្នែកខាងមុខ ដោយសារតែបុកជាមួយមាត់លូ ។

ចំណែកសាកសពជនរងគ្រោះបែកក្បាលយ៉ាងដំណំដែលសង្ស័យថា ពេលជិះម៉ូតូធ្លាក់ប្រឡាយ ដោយជនរងគ្រោះបានធ្លាក់ទៅមុនម៉ូតូ ហើយក្បាលជនរងគ្រោះបុកជាមួយមាត់លូ រួចទើបម៉ូតូធ្លាក់តាមក្រោយសង្កត់ពីលើជនរងគ្រោះតែម្តង ។

ទោះបីជាបែបណា ក្រោយពីស្រង់ចេញពីក្នុងប្រឡាយទឹករួច សមត្ថកិច្ចបានដឹកយកសពទៅកាន់ឈាបនដ្ឋានវត្តអរុណវតី ដើម្បីធ្វើកោសល្យវិច័យបន្ត និងប្រគល់សពជូនក្រុមគ្រួសារទៅធ្វើបុណ្យតាមប្រពៃណី៕