រាជធានីភ្នំពេញ ៖ ខណៈវិស័យសំខាន់ដែលចូលរួមចំណែកយ៉ាងសំខាន់ដល់កំណើនសេដ្ឋកិច្ចជាតិកំពុងរងគ្រោះដោយវិបត្តិជំងឺកូវីដ១៩ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានអះអាងថា កម្ពុជាបានចាត់ទុកវិស័យកសិកម្ម គឺជាវិស័យនាំមុខមួយក្នុងចំណោមវិស័យដទៃទៀត ដែលបានរួមវិភាគទានដល់ការអភិវឌ្ឍសេដ្ឋកិច្ចជាតិ របស់ប្រទេសកម្ពុជា និងបានរួមចំណែកក្នុងកំណើនផលទុនជាតិ ហើយវិស័យនេះក៏បានជួយផ្តល់ការងារ និងប្រាក់ចំណូលដល់ប្រជាពលរដ្ឋនៅជនបទ ដែលមានជីវភាពរស់នៅពឹងអាស្រ័យលើការងារកសិកម្ម ។
ហើយមានតែវិស័យកសិកម្មទេ ដែលនៅមានសក្តានុពលអាចស្តារសេដ្ឋកិច្ចនាសម័យកូវីដ១៩ ។ ដោយសម្លឹងឃើញថា វិស័យកសិកម្មមិនបានរងគ្រោះព្រោះជំងឺរាតត្បាតនេះ រាជរដ្ឋាភិបាលក៏មានមហិច្ឆតាក្នុងការធ្វើទំនើបកម្មវិស័យកសិកម្មកម្ពុជាឱ្យមានលក្ខណៈប្រកួតប្រជែង បរិយាប័ន្នធន់ និងការប្រែប្រួលអាកាសធាតុ និងនិរន្តរភាពសំដៅបង្កើនប្រាក់ចំណូលគ្រួសារកសិករ វិបុលភាព និងសុខុមាលភាពរបស់ប្រជាពលរដ្ឋកម្ពុជា ។
ដើម្បីសម្រេចបាន និងឆ្លើយតបទៅនឹងចក្ខុវិស័យវែងឆ្ងាយនេះគោលដៅចម្បងដែលត្រូវសម្រេចឱ្យបានគឺ ៖ ទី១- ជំរុញកំណើននៃតម្លៃបន្ថែមសរុបរបស់វិស័យកសិកម្មឱ្យកើនក្នុងរង្វង់៣% ក្នុងមួយឆ្នាំ ទី២- ផលិតភាពពលកម្មកសិកម្មត្រូវរុញឱ្យកើនពី១៨៣៩ ដុល្លារអាមេរិកនៅឆ្នាំ២០១៩ ដល់ ៤ ៦២៥ ដុល្លារអាមេរិក/ម្នាក់/ឆ្នាំ នៅឆ្នាំ២០៣០។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានឆ្លើយតប និងសំនួរជាច្រើនទាក់ទងនឹងវិស័យនេះ លោកបានឱ្យដឹងថា «កសិកម្មនៅតែសំខាន់នាពេលនេះ គឺដោយសារវិស័យឧស្សាហកម្ម និងសេវាកម្មបានធ្លាក់ចុះពោល គឺមានតែវិស័យកសិកម្មទេដែលនៅមានសក្តានុពលអាចស្តារ សេដ្ឋកិច្ចនាពេលនេះបាន»។
លោករដ្ឋមន្ត្រីបានបន្តថា សេដ្ឋកិច្ចកម្ពុជានឹងអាចធ្លាក់ចុះ -១,៩% នាឆ្នាំ២០២០ នេះដែលក្នុងនោះវិស័យឧស្សាហកម្ម និងសេវាកម្មអាចមានកំណើនជាអវិជ្ជមាន ហើយវិស័យកសិកម្មនឹងអាចមានកំណើនប្រមាណជាង + ១% ។ សក្តានុពលកសិកម្មនៅរឹងមាំ លទ្ធភាពផលិតនៅមានច្រើន ពលកម្មចំណាកស្រុកបានហូរចូលមកវិញដែលទាំងនេះ នឹងអាចជួយរុញវិស័យកសិកម្ម ឱ្យរីកលូតលាស់បាន ក្នុងដំណាក់កាលកូវីដ១៩នេះ។
កសិករមានឱកាសច្រើនជាងមុនក្នុងការបង្កើនផលិតកម្មដំណាំស្បៀងអាហារត្រីសាច់ ដោយហេតុថាមានតម្រូវការច្រើនពីអ្នកប្រើប្រាស់ ក្នុងខណៈពេលដែលការនាំចូលត្រូវបានថយចុះ (បញ្ហាកូវីដ១៩នាពេលកន្លងមក បានធ្វើឱ្យថមថយការដឹកជញ្ជូនទំនិញ ក៏ដូចជាការធ្វើពាណិជ្ជកម្មឆ្លងដែន)។
ជាមួយគ្នានេះផងដែរ ក្នុងរយៈពេលនេះក៏មានបណ្តាប្រទេសមួយចំនួន នៅតែបញ្ជាទិញទំនិញ ស្បៀងពីកម្ពុជាដដែល (អង្ករ ពោត ដំឡូងមី ស្វាយ ចេក ។ល។) មិនមានការថយចុះឡើយ ហើយក៏មានការកើននូវបរិមាណច្រើនជាងមុន។
ជារួម លទ្ធភាពនៃផលិតកម្មកសិកម្មកម្ពុជា អាចផ្គត់ផ្គង់ទីផ្សារក្នុងប្រទេសបាន ដូចជាអង្ករ ត្រី សាច់ ផ្លែឈើមួយចំនួនដែលមានសក្តានុពល។ ប៉ុន្តែ ក៏មានការនាំចូលនូវផលិតផលកសិកម្មដែលកម្ពុជាមិនមានការផលិតច្រើនផងដែរ ពិសេសនៅពេលដែលមានការពាក់ព័ន្ធនឹងរដូវកាលដាំដុះ ដែលកម្ពុជាមិនអាចដាំបាន។
គួរបញ្ជាក់ផងដែរថា ទីផ្សារកសិកម្មប្រកបដោយ សក្តានុពលនៅកម្ពុជារួមមាន ទីផ្សារអង្ករ ពោត ដំឡូងមី ស្វាយ ចេក កៅស៊ូ ចន្ទីម្រេច ផលវារីវប្បកម្ម ជាដើម។ល។ ហើយ មុខផលិតផលជាទំនិញកសិកម្មទាំងនេះ អាចមានការប្រកួតប្រជែងបាន ពិសេសភាពអនុគ្រោះជាច្រើន ដែលរាជរដ្ឋាភិបាល បានផ្តល់ជូននាពេលកន្លងមក (ភាពអនុគ្រោះក្រោមច្បាប់វិនិយោគ និងការសម្រួលបន្ថែមទៀតនាពេលថ្មីៗនេះ) ៕
ចែករំលែកព័តមាននេះ