មនុស្សជាច្រើនមានគំនិតល្អៗក្នុងការចាប់ផ្តើមអាជីវកម្មមួយដោយខ្លួនឯង ប៉ុន្តែមិនមានមនុស្សច្រើនទេដែលមានភាពក្លាហាន និងពេលវេលាក្នុងការធ្វើឲ្យក្តីសុបិនរបស់ខ្លួនក្លាយជាការពិត។ តើមានកត្តាអ្វីដែលរារាំងពួកគេ? ជាក់ស្តែង ការចាប់ផ្តើម និងគ្រប់គ្រងអាជីវកម្មទាមទារនូវធនធាន កម្លាំាង និងពេលវេលាច្រើនណាស់ ដែលជាហេតុធ្វើឲ្យអាជីវករភាគច្រើនត្រូវបោះបង់ការងាររបស់ខ្លួនដើម្បីវិនិយោគទាំងស្រុងលើអាជីវកម្មរបស់ពួកគេ។
ប៉ុន្តែអ្នកមិនចាំបាច់ត្រូវបោះបង់ឱកាសរកលុយមួយដើម្បីចាប់យកឱកាសរកលុយមួយទៀតទេ ជាពិសេសនៅពេលដែលអ្នកទើបតែចាប់ផ្តើមដំបូងនិងមិនទាន់ច្បាស់លាស់ថាអាជីវកម្មរបស់អ្នកនឹងជោគជ័យឬទេ។ ខាងក្រោមគឺជាវិធីងាយៗដែលនឹងជួយឲ្យអ្នករកបានពេលវេលាដើម្បីចាប់ផ្តើមនិងគ្រប់គ្រងអាជីវកម្មខណៈដែលនៅបន្តធ្វើការពេញម៉ោង៖
១. រកមនុស្សមកជួយ
មនុស្សជាច្រើនតែងតែសួរថា “តើអ្នកធ្វើកិច្ចការទាំងអស់នេះបានដោយម្នាក់ឯងយ៉ាងដូចម្តេច?” ចម្លើយគឺ អ្នកមិនចាំបាច់ធ្វើដូច្នេះទេ។ ផ្ទុយមកវិញ មានកិច្ចការជាច្រើនដែលអ្នកមិនចាំបាច់ត្រូវរ៉ាប់រងដោយខ្លួនឯងដោយរកមនុស្សមកជួយអ្នកជាដើម។
២. រួមបញ្ចូលការងារ
ពេលដែលអ្នកទើបតែចាប់ផ្តើមដំបូង អ្នកនឹងជួបការលំបាកក្នុងការបែងចែកពេលវេលាសម្រាប់ការងារ អាជីវកម្ម និងជីវិតផ្ទាល់ខ្លួន។ វិធីងាយមួយក្នុងការសន្សំសំចៃពេលវេលាគឺការរួមបញ្ចូលកិច្ចការដើម្បធ្វើក្នុងពេលតែមួយ។ ឧទាហរណ៍ដូចជា ការចម្អិនអាហារពេលល្ងាច ព្រឹក និងថ្ងៃត្រង់សម្រាប់ថ្ងៃបន្ទាប់ក្នុងពេលតែមួយជាដើម។ អ្នកក៏អាចយកពេលដែលអ្នកបើកបរសម្រាប់ការស្តាប់ព័ត៌មាន ឬកម្មវិធីអប់រំផ្សេងៗផងដែរ។
៣. ទុកពេលសម្រាប់សម្រាក
អ្នកមិនចាំបាច់បង្ខំខ្លួនឲ្យធ្វើការរាប់ម៉ោងដោយមិនមានពេលសម្រាកដើម្បីជោគជ័យទេ។ មនុស្សត្រូវការពេលសម្រាកជាពិសេសបន្ទាប់ពីបានប្រើកម្លាំងច្រើនសម្រាប់កិច្ចការអ្វីមួយ។ ឧទាហរណ៍ដូចជាបន្ទាប់ពីធ្វើការបាន ២៥នាទី អ្នកត្រូវសម្រាក ៥នាទីជាដើមដើម្បីដើរចុះឡើង ឬងាកទៅធ្វើអ្វីផ្សេងសិន។
៤. កំណត់ពេលវេលាសម្រាប់កិច្ចការក្រៅម៉ោង
អ្នកគួរតែកំណត់ពេលវេលាឲ្យបានច្បាស់លាស់ដើម្បីធ្វើការលើអាជីវកម្មរបស់អ្នក ហើយអ្នកត្រូវតែចាត់ទុកវាដូចជាការណាត់ជួបសំខាន់ផងដែរ។ ក្រៅពីនេះហើយ អ្នកគួរតែព្យាយាមរៀនបែងចែងការងារដែលសំខាន់ និងការងារកំប៉ិកំប៉ុក ៕
ចែករំលែកព័តមាននេះ