ខេត្តបន្ទាយមានជ័យ ៖ ច្រកម៉ាឡៃ ដែលជាច្រកតំបន់រវាងប្រទេសទាំង២កម្ពុជា-ថៃ ត្រូវបានថៃនាំចូលទំនិញរបស់ខ្លួនម៉ាសេរីបម្រើសេចក្តីត្រូវការរបស់ពលរដ្ឋខ្មែរ តែសម្រាប់ទំនិញកម្ពុជាវិញ គឺខាងថៃមិនទាន់ឱ្យនាំចេញនៅឡើយទេ ។ លោក ជា…
ខេត្តបន្ទាយមានជ័យ ៖ ច្រកម៉ាឡៃ ដែលជាច្រកតំបន់រវាងប្រទេសទាំង២កម្ពុជា-ថៃ ត្រូវបានថៃនាំចូលទំនិញរបស់ខ្លួនម៉ាសេរីបម្រើសេចក្តីត្រូវការរបស់ពលរដ្ឋខ្មែរ តែសម្រាប់ទំនិញកម្ពុជាវិញ គឺខាងថៃមិនទាន់ឱ្យនាំចេញនៅឡើយទេ ។
លោក ជា សេងអាន ប្រធានស្នាក់ការច្រកព្រំដែនម៉ាឡៃ បានប្រាប់កាលពីថ្ងៃទី៣ ខែសីហា ឆ្នាំ២០២០ថា ក្រោយកិច្ចប្រជុំរវាងអភិបាលខេត្តបន្ទាយមានជ័យ-កម្ពុជា និងអភិបាលខេត្តស្រះកែវ-ថៃ បានសម្រេចបើកច្រកព្រំដែនម៉ាឡៃកាលពីថ្ងៃទី១៥ ខែកក្កដា ឆ្នាំ២០២០កន្លងមក ។
លោកបញ្ជាក់ថា ក្រោយពេលសម្រេចបើកច្រកព្រំដែនម៉ាឡៃ គឺមានតែទំនិញថៃទេទើបអាចនាំចូល ដែលមានគ្រឿងសំណង់ ដែក ស៊ីម៉ង់ត៍ ក្បឿង និងគ្រឿងឧបភោគបរិភោគ និងជ្រូករស់ដែលក្រុមហ៊ុននាំចូលឆ្លងកាត់ទៅវៀតណាម ។
លោក ជា សេងអាន បញ្ជាក់ថា ដោយឡែកទំនិញកម្ពុជាមិនទាន់បានឱ្យនាំចេញនៅឡើយទេ ដែលកសិផលកម្ពុជាមានដំឡូងមី ពោត សណ្តែក របស់ប្រជាកសិករនៅស្រុកម៉ាឡៃគឺឈ្មួញទិញនាំចេញតាមច្រកភ្នំដី ហៅច្រកសំពៅលូន ស្ថិតក្នុងស្រុកសំពៅលូន ខេត្តបាត់ដំបង ។ ជ្រូករស់ថៃត្រូវបាននាំចូលក្នុង១ថ្ងៃៗប្រមាណ៥០០ក្បាល ដែលមានក្រុមហ៊ុន២នាំចូលដោយស្របច្បាប់តាមច្រកម៉ាឡៃ ។
លោក ហ៊ុយ ទូច ប្រធានការិយាល័យផលិតកម្មនិងបសុព្យាបាលខេត្តឲ្យដឹងថា ក្រុមហុ៊ន២ដែលនាំជ្រូករស់ចូលពីថៃមាន ក្រុមហ៊ុនចាន់ធូមានជ័យ នាំចូលក្នុង១ថ្ងៃប្រមាណ១០០ទៅ២០០ក្បាល និងក្រុមហ៊ុនស្រ៊ីភីអេច នាំចូលប្រមាណជាង២០០ក្បាលតាមច្រកម៉ាឡៃ ស្រុកម៉ាឡៃ ។
លោកបញ្ជាក់ថា ជ្រូករស់ដែលនាំចូលពីប្រទេសថៃដឹកចូលដោយរថយន្តថៃ ដាក់សាងនៅចម្ងាយប្រមាណ៥គីឡូម៉ែត្រពីច្រកទ្វារព្រំដែនម៉ាឡៃ និងធ្វើការត្រួតពិនិត្យដោយមន្ត្រីការិយាល័យផលិតកម្មនិងបសុព្យាបាលខេត្តនៅច្រកព្រំដែន និងកន្លែងដាក់សាងពីរថយន្តថៃដាក់ចូលរថយន្តខ្មែរដើម្បីការពារជំងឺឆ្លង ៕
ចែករំលែកព័តមាននេះ