ខេត្តព្រៃវែង ៖ បុរស២នាក់ដែលទើបវិលត្រឡប់មកពីប្រទេសឥណ្ឌូនេស៊ី ហើយត្រូវបាននាំខ្លួនមកធ្វើចត្តាឡីស័ក នៅក្នុងមណ្ឌលវិទ្យាល័យ ហ៊ុន សែន កំពង់លាវ ក្រុងព្រៃវែង តាំងពីថ្ងៃទី២៣…
ខេត្តព្រៃវែង ៖ បុរស២នាក់ដែលទើបវិលត្រឡប់មកពីប្រទេសឥណ្ឌូនេស៊ី ហើយត្រូវបាននាំខ្លួនមកធ្វើចត្តាឡីស័ក នៅក្នុងមណ្ឌលវិទ្យាល័យ ហ៊ុន សែន កំពង់លាវ ក្រុងព្រៃវែង តាំងពីថ្ងៃទី២៣ កក្តដានោះ ស្រាប់តែនាំគ្នារត់គេចខ្លួនបាត់ ធ្វើអោយអាជ្ញាធរ និងសមត្ថកិច្ចក្នុងខេត្តព្រៃវែងផ្អើលឆោឡោ និងនាំគ្នាចេញស្វែងរកទាំងយប់ ។
ទោះជាយ៉ាងណាក៏ដោយ ៦ម៉ោងក្រោយមកសមត្ថកិច្ចបានរកឃើញ ហើយក៏បាននាំខ្លួនអ្នកទាំង២ ត្រឡប់មកមណ្ឌលចត្តាឡីស័កវិញដែរ ។ លោក ចាន់ ថា អភិបាលរងខេត្តព្រៃវែង បានប្រាប់អោយដឹងថា បុរសដែលបានរត់គេចខ្លួនទាំង២នាក់នោះ ទី១-ឈ្មោះ កំសត់ វិស័យ អាយុ២១ឆ្នាំ និងទី២-ឈ្មោះ ចន កំសាន អាយុ៣២ឆ្នាំ អ្នកទាំង២មានទីលំនៅក្នុងភូមិបឹងជ័រ ឃុំព្រៃទឹង ស្រុកស៊ីធរកណ្តាល ខេត្តព្រៃវែង ។ អ្នកទាំង២ទើបតែត្រឡប់មកពីប្រទេសឥណ្ឌូនេស៊ី មកដល់កម្ពុជានៅថ្ងៃទី២៣ កក្កដា ហើយត្រូវបានបញ្ជូនមកដល់មណ្ឌលចត្តាឡីស័ក វិទ្យាល័យ ហ៊ុន សែន កំពង់លាវ នៅយប់ថ្ងៃដដែលនោះ ។
លោកអភិបាលរងខេត្តបានបន្តទៀតថា នៅក្នុងមណ្ឌលចត្តាឡីស័ក បុរសទាំង២នាក់នេះ ត្រូវបានមន្ត្រីជំនាញយកកំហាកទៅពិនិត្យនៅរាជធានីភ្នំពេញ ចំនួន៣ដងរួចមកហើយ គឺនៅថ្ងៃទី២៣ កក្កដា ថ្ងៃទី២៦ កក្កដា និងថ្ងៃទី២៩ កក្កដា ហើយលទ្ធផលគឺអវិជ្ជមាន ហើយតាមគំរោងនៅថ្ងៃទី៦ សីហា ខាងមុខនេះ ក្រុមគ្រូពេទ្យនឹងយកកំហាកអ្នកទាំង២ទៅពិនិត្យម្តងទៀត ប៉ុន្តែមិននឹកស្មានថា នៅវេលាម៉ោង៤ល្ងាច ថ្ងៃទី៣ សីហា ខណៈមេឃកំពុងរៀបភ្លៀង អ្នកទាំង២បែរជានាំគ្នារត់ចេញពីកន្លែងធ្វើចត្តាឡីស័ក ធ្វើអោយមានការផ្អើលឆោឡោឡើងតែម្តង ។
លោក ចាន់ ថា បានបញ្ជាក់ប្រាប់ក្រុមអ្នកសារពត៌មានថា ក្រោយពីដឹងថាបុរសទាំង២នាក់ខាងលើ បានរត់គេចចេញពីកន្លែងធ្វើចត្តាឡីស័កភ្លាម លោក ជា សុមេធី អភិបាលខេត្តព្រៃវែង ក៏បានបញ្ជាអោយសមត្ថកិច្ចពាក់ពន្ធ័ទាំងអស់ ចេញស្រាវជ្រាវតាមរកអ្នកទាំង២ភ្លាម ហើយ៦ម៉ោងក្រោយមក សមត្ថកិច្ចក៏បានរកឃើញបុរសទាំង២ នៅនឹងផ្ទះរបស់ពួកគេនៅឃុំព្រៃទឹង ស្រុកស៊ីធរកណ្តាល ហើយក៏បាននាំខ្លួនអ្នកទាំង២ យកមកមណ្ឌលចត្តាឡីស័កវិញទាំងយប់តែម្តង ។
ជាមួយគ្នានោះ អ្នកដែលពាក់ព័ន្ធជាមួយនឹងបុរសទាំង២ ក្នុងពេលដែលពួកគេរត់ចេញទៅនោះ ដែលរួមមានសាច់ញាតិ មិត្តភក្តិ និងម៉ូតូឌុប ដែលដឹកពួកគេទៅផ្ទះផងនោះ នឹងត្រូវប្រមូលយកមកធ្វើចត្តាឡីស័កទាំងអស់ នៅព្រឹកថ្ងៃទី៤សីហានេះ ៕
ចែករំលែកព័តមាននេះ