ខេត្តមណ្ឌលគិរី ៖ អស់រយៈពេលមួយសប្តាហ៍មកហើយ ដែលភ្លៀងបានបន្តធ្លាក់ឥតឈប់ឈរនៅតំបន់ឦសាន ជាពិសេសខេត្តមណ្ឌលគិរី ក្នុងកម្រិតមធ្យមទៅខ្លាំង ដោយអាកាសធាតុផ្ទៃមេឃស្រទុំមិនបើកថ្ងៃសោះតែម្ដង ដែលកត្តានេះបានជះឥទ្ធិពលអាក្រក់ដល់បណ្តាញផ្លូវគមនាគមន៍មួយចំនួននៅតំបន់ឆ្ងាយប្រជុំជន ។ ហើយបាតុភូតនេះ ក៏បណ្តាលឲ្យមានរន្ទះបាញ់សម្លាប់ស្ត្រីម្នាក់ និងបុរសម្នាក់រងរបួសផងដែរ។
បើយើងសង្កេតមើលលើទិដ្ឋភាពជាក់ស្ដែងក្នុងក្រុងសែនមនោរម្យ ខេត្តមណ្ឌលគិរី គឺគ្របដណ្ដប់ទៅដោយផ្ទៃមេឃស្រទុំ មានលាយឡំជាមួយពពកខ្មៅជាប់ជានិច្ច និងមានភ្លៀងធ្លាក់ក្នុងកម្រិតតិច ទៅមធ្យមនៅពេលរសៀល ចំណែកពេលល្ងាចនិងយប់ អាចភ្លៀងធ្លាក់ខ្លាំងលាយជាមួយខ្យល់ និងផ្គររន្ទះផងដែរ។ ចំណែកសីតុណ្ហភាពគឺបានធ្លាប់ចុះទាបនៅពេលព្រឹកត្រឹម២១អង្សាសេ និងឡើងខ្ពស់នៅពេលថ្ងៃត្រង់នៅ ត្រឹម២៦ទៅ២៧អង្សារសេ ។
អាជ្ញាធរខេត្តបានឲ្យដឹងថា ក្នុងអំឡុងពេលភ្លៀងប៉ុន្មានថ្ងៃនេះ ខេត្តមណ្ឌលគិរីក៏បានរងនូវសម្ពាធធម្មជាតិ ដែលបង្កជាភ្លៀងធ្លាក់រួមជា មួយខ្យល់ក្នុងកម្រិតធម្យម តែបញ្ហាមិនបណ្ដាលឲ្យរងគ្រោះថ្នាក់ដល់អាយុជីវិតប្រជាពលរដ្ឋ ឬកើតជាគ្រោះមហន្តរាយលិច លង់ផ្ទះសម្បែងប្រជាពលរដ្ឋនោះទេ ។តែមានករណីដាច់ដោយឡែកមួយ ដោយកាលពីចុងខែកក្កដាកន្លង ទៅ មានបាតុភូតរន្ទះបាញ់បណ្ដាលឲ្យស្ត្រីម្នាក់ស្លាប់ ចំណែកប្តីរបស់គាត់រងរបួសធ្ងន់។
ក្រសួងធនធានទឹកនិងឧតុនិយមបានប្រកាសថា នៅប្រទេសកម្ពុជា ក្នុងចន្លោះថ្ងៃទី០១ រហូតដល់ថ្ងៃទី០៤ សីហា ២០២០ មានឥទ្ធិពលនៃវិសម្ពាធ(TD)ដែលបច្ចុប្បន្ននៅក្នុងសមុទ្រ ចិនខាងត្បូងក្បែរកោះហៃណាំលក្ខណៈបែបនេះបង្កឲ្យប្រទេសកម្ពុជាទទួលនូវសម្ពាធអាកាសធាតុ ដោយមានភ្លៀងខ្យល់ និងរលកធំៗនៅឯខាងនាយសមុទ្រ ។
បើទោះជាស្ថានភាពអាកាសធាតុហាក់មិនអំណោយផល ប៉ុន្តែភ្ញៀវទេសចរណ៏ជាតិនៅតែសម្រុកទៅលេងខេត្តមណ្ឌលគិរី យ៉ាងច្រើនកុះករ។ខណៈវត្តមានរបស់ភ្ញៀវទេសចរនៅរដូវភ្លៀងនេះ ក៏ជាឧកាសដ៏ល្អសម្រាប់ពួកគាត់ទទួលបាននូវបទពិសោធន៍ប្លែក
អារម្មណ៍ដូចនៅឯនាយសមុទ្រ គឺសីតុណ្ហភាពត្រជាក់ដល់ឆ្អឹងខ្នង និងផ្សែងអ័ព្ទហោះជុំវិញខ្លួនប្រៀបបានឋានសួគ៌លើដីអ៊ីចឹង៕
ចែករំលែកព័តមាននេះ