រាជធានីភ្នំពេញ ៖ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល នៃព្រះរាជាណាចក្រកម្ពុជា បានអោយដឹងតាមរយៈសារអេឡិចត្រូនិច នៅម៉ោង១០ និង៣៥នាទីយប់ថ្ងៃទី០៣ សីហា ២០២០នេះថា បុរសពីរនាក់ ដែលបានរត់ចេញពីកន្លែងធ្វើចត្តាឡីស័ក នៅក្នុងខេត្តព្រែវែង កាលពីវេលាម៉ោង៤ល្ងាចនោះ ត្រូវបានអាជ្ញាធរតាមរកឃើញពួកគាត់ទាំង២នាក់វិញហើយ បច្ចុប្បន្នអាជ្ញាធរបាននាំមកកន្លែងចត្តាឡីស័កវិញ រួចហើយដែរ ។
សូមជម្រាបថា បុរស២នាក់ រត់ចេញពីកន្លែងចត្តាឡីស័ក នាំអោយភ្ញាក់ផ្អើល កាលពីវេលាម៉ោង៤ល្ងាច ថ្ងៃទី០៣ ខែសីហា ឆ្នាំ២០២០នេះ នៅក្នុងខេត្តព្រែវែង ។ រហូតមកដល់ពេលនេះ គេមិនដឹងពីមូលហេតុ នៃការរត់ចេញនោះនៅឡើយទេ។ ប៉ុន្តែវាមានភាពចាំបាច់ថា ត្រូវតែមានវិធានការទប់ស្កាត់ កុំអោយមានមនុស្សរត់ចេញពីកន្លែងចត្តាឡីស័កតទៅទៀត ហើយគេក៏ត្រូវរកអោយឃើញមូលហេតុ នៃការរត់ចេញនោះ និងដោះស្រាយបញ្ហានោះ ដើម្បីកុំអោយមានការត់ចេញបន្តទៀត ។
នេះជាលើកទីពីរហើយ ដែលមានការរត់ចេញពីកន្លែងចត្តាឡីស័ក ។ ករណីទីមួយកើត មានទាក់ទងនឹងស្ត្រីខ្មែរ-អាមេរិក ។ ការត់ចេញបែបនេះ បង្កហានិភ័យអាចនឹងចម្លងមេរោគកូវីដ-១៩ ដល់អ្នកដទៃ បើសិនជាក្នុងករណីដ៏អាក្រក់ បុរសនោះ អាចត្រូវរកឃើញមានផ្ទុកមេរោគកូវីដ១៩ នឹងនាំអោយមានការរាតត្បាតជាសហគមន៍ ។ នេះជាឧទាហរណ៍ដ៏អាក្រក់ និងប្រកបដោយគ្រោះថ្នាក់ ដែលមិនត្រូវកើតមាន ដើម្បីចៀសវាង ការរាលដាលមេរោគកូវីដ-១៩ដល់សហគមន៍ ។ ដូច្នេះគេ ត្រូវតែ ប្រយ័ត្នបំផុតហើយមិនត្រូវអោយមានកើតទៀត ៕
ចែករំលែកព័តមាននេះ