រាជធានីភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ ការនាំចូលនិងចែកចាយគ្រឿងសំណង់ក្នុងប្រទេសកម្ពុជាឃើញថាមានកំណើនជាបន្តបន្ទាប់ ពីមួយឆ្នាំទៅមួយឆ្នាំ ដោយសារកម្ពុជាជាប្រទេសកំពុងអភិវឌ្ឍន៍ ហើយវិស័យសំណង់ក៏ឃើញថាមានសកម្មភាពសាងសង់ជាហូរហែរផងដែរ ។ ប៉ុន្តែក្នុងរយៈពេល១ឆមាសឆ្នាំ២០២០នេះជាពិសេសនៅក្នុងត្រីមាសទី២ ការលក់គ្រឿងសំណង់បានធ្លាក់ចុះស្ទើរតែគ្រប់ផ្នែក ។
យោងតាមរបាយការណ៍ដែលចេញផ្សាយដោយធនាគារជាតិនៃកម្ពុជាសម្រាប់ឆមាសទី១ឆ្នាំ ២០២០នេះ ការនាំចូលសម្ភារនិងបរិក្ខាសំណង់មកកាន់ទីផ្សារប្រទេសកម្ពុជាមានការធ្លាក់ចុះ១៤ភាគរយ ដែលតួលេខនេះ មិនធ្លាប់មានពីមុនមកនោះទេ ។ របាយការណ៍ក៏បានបង្ហាញផងដែរពីការធ្លាក់ចុះខ្លាំងនៃការនាំចូលដែកពីក្រៅប្រទេសដែលមានរហូតដល់-៤៤ភាគរយខណៈស៊ីម៉ងត៍ កើនឡើង៣ភាគរយ ។
បើយោងតាមរបាយការណ៍អាជីវកម្មរបស់ក្រុមហ៊ុន SCGប្រចាំនៅកម្ពុជាបានបង្ហាញថាក្នុងត្រីមាសទី២ នៃឆ្នាំ ២០២០នេះចំណូលពីការលក់គ្រឿងសំណង់ នៅក្នុងប្រទេសកម្បុចាមានការធ្លាក់ចុះរហូតដល់៦ភាគរយបើធៀបនឹងត្រីមាសទី២កាលពីឆ្នា ២០១៩ ។ ក៏ប៉ុន្តែបើបូកសរុបក្នុងឆមាសទី១នៃឆ្នា ២០២០ ឃើញថាចំណូលពីក្រុមហ៊ុននេះ មានកំណើន០,២ភាគរយ ដោយសារតែចំណូលពីការលក់កាលពីត្រីមាសទី១នៅមានភាពប្រសើរ ។
លោក Roongrote Rangiyopash ប្រធាននិងជានាយកប្រតិបត្តិរបស់អេសស៊ីជី បានអោយដឹងថា ក្នុងកំឡុងពេលនៃវិបត្តិកូវីដ១៩ បើទោះបីជាក្រុមហ៊ុនរបស់ខ្លួន មិនស្ថិតក្នុងវិស័យដែលរងផលប៉ះពាល់ធ្ងន់ធ្ងរដូចវិស័យទេសចរណ៍ ឬក៏អាកាសចរណ៍ក្ដី តែក្រុមហ៊ុនខ្លួនបានធ្វើការតាមដាននិងវាយតម្លៃស្ថានការណ៍ជាប់ជាប្រចាំ ដើម្បីអាចគ្រប់គ្រងស្ថានការណ៍បាននៅក្នុងបរិយាកាសមួយដែលពោរពេញទៅដោយភាពមិនច្បាស់លាស់ ។
លោកថា៖« យើងបានដាក់ចេញនូវផែនការលក់ និងការរៀបចំដឹកជញ្ជូនសម្រាប់ស្ថានការណ៍បិទទីក្រុងធ្វើផែនការសម្រាប់ភាពប្រសើរបំផុត ដោយបង្កើននូវប្រសិទ្ធផលផលិតកម្ម ដើម្បីបំពេញតម្រូវការដែលកើនឡើង ការផ្លាស់ប្តូរទៅរកឌីជីដល ដើម្បីបង្កើតនូវគំរូដែលមានប្រសិទ្ធភាពបំផុត ។
លោកបន្តថា ក្រុមហ៊ុនបានអនុវត្តន៍យុទ្ធសាស្ត្រដែលមានភាពបត់បែនបំផុត ដោយផ្ដល់ដំណោះស្រាយ ផលិតផលនិងសេវាកម្ម ដែលឆ្លើយតបទៅនឹងតម្រូវការកាន់តេប្រសើរថែមទៀត និងចាប់យកទីផ្សារសក្ដានុពល នៅខណៈដែលមានការកើនឡើងនូវនិន្នាការនិងសុខុមាលភាព ។ជាលទ្ធផលនៃកិច្ចប្រឹងប្រែងទាំងនេះ ប្រតិបត្តិការអាជីវកម្មរបស់ខ្លួនសម្រាប់ត្រីមាសទី២និងឆមាសទី១ មិនសូវរងផលប៉ហពាលខ្លួនដោយសារតែការធ្លាក់ចុះនៃសេដ្ឋកិច្ចសកលខណៈវិស័យផ្សេងទៀតបានរងផលប៉ះពាល់ខ្លាំងមិនធ្លាប់មាន ។
ដោយឡែកសម្រាប់ការលក់រាយនៃគ្រឿងសំណង់នៅកម្ពុជា ក្នុងរយៈពេលប៉ុន្មានខែ ដើមឆ្នាំ ២០២០នេះ ក៏ឃើញថាមានការថយចុះគួរអោយកត់សម្គាល់ដែរ ជាក់ស្ដេងបើតាមលោកទឹម បូរីប្រធានផ្នែកទីផ្សារនៃក្រុមហ៊ុនលក់គ្រឿងសំណង់ម៉ាកឃីនៅកម្ពុជាក៏បាននិយាយដែរថាចាប់តាំងពីដើមឆ្នាំ២០២០មកការលក់មានការថយចុះ ដោយកត្តាមួយចំនួន ។កត្តាធំពីរដែលធ្វើអោយការធ្លាក់ចុះ ទី១គឺជំងឺកូវីដ១៩ បានធ្វើអោយសកម្មភាពនៃការសាងសង់ថយតិចតួច និងកត្តាទី២ គឺកំណើនអ្នកលក់កាន់តែច្រើនធ្វើអោយចំណែកទីផ្សាររបស់អ្នកលក់មួយចំនួនក៏ធ្លាក់ចុះដែរ ៕
ចែករំលែកព័តមាននេះ