ខេត្តបន្ទាយមានជ័យ ៖ ករណីបាត់ខ្លួនអ្នកឃ្វាលគោម្នាក់ដែលបង្ករភ្ញាក់ផ្អើលនៅភូមិព្រៃគប់ សង្កាត់ប៉ោយប៉ែត ក្រុងប៉ោយប៉ែត តាំងពីព្រឹកថ្ងៃទី ៣០កក្កដា ២០២០ ហើយគ្រប់គ្នាសង្ស័យថាជនរងគ្រោះអាចលង់លិចក្នុងស្រះចាក់សម្រាមដ៏ជ្រៅនោះ ខណៈសមត្ថកិច្ចបន្តរុករកអស់រយៈពេល៥ថ្ងៃហើយ…
ខេត្តបន្ទាយមានជ័យ ៖ ករណីបាត់ខ្លួនអ្នកឃ្វាលគោម្នាក់ដែលបង្ករភ្ញាក់ផ្អើលនៅភូមិព្រៃគប់ សង្កាត់ប៉ោយប៉ែត ក្រុងប៉ោយប៉ែត តាំងពីព្រឹកថ្ងៃទី ៣០កក្កដា ២០២០ ហើយគ្រប់គ្នាសង្ស័យថាជនរងគ្រោះអាចលង់លិចក្នុងស្រះចាក់សម្រាមដ៏ជ្រៅនោះ ខណៈសមត្ថកិច្ចបន្តរុករកអស់រយៈពេល៥ថ្ងៃហើយ នៅតែបាត់ស្រមោលដដែល។ គួររំលឹកថា បាត់ខ្លួនអ្នកឃ្វាលគោម្នាក់ បន្សល់ដាននៅកន្លែងចាក់សំរាម (វីដេអូ) , ករណីបាត់មនុស្សម្នាក់ ចេញទូកមួយគ្រឿងទៀតស្វែងរកបន្ត
សម្រាមរាប់តោនត្រូវបានអាជ្ញាធរយកគ្រឿងចក្រកាយចេញពីស្រះវិញ ហើយក្រុមយោធានិងនគរបាលការពារព្រំដែនគោកក៍ដូចជាអ្នកស្រុកខ្លះប្រើប្រាស់ទូកជ័រនិងខ្លះពាក់អាវពោងសុវត្ថិភាពចុះកៀសម្រាម ឯក្រុមសមត្ថកិច្ចចាំទាញខ្សែពីលើគោកឲ្យគ្រឿងចក្រចូកកាយឡើងគោក ក្រែងប្រទះឃើញជនរងគ្រោះ ។
បើទោះជាអ្នកស្រុកខ្លះដាក់កាសង្ស័យថា ពេលឃើញគោ២ក្បាលធ្លាក់ស្រះអ្នកឃ្វាលអាចភ័យខ្លាចម្ចាស់គោរករឿង ហើយគេចខ្លួន តែក្រុមសាច់ញាតិបញ្ជាក់ថាជនរងគ្រោះស្រឡាញ់ប្រពន្ធកូនណាស់ មិនអាចទៅណាចោលឡើយ ។ ម្យ៉ាងបើទៅទីណា ក៍គង់តែទាក់ទងប្រាប់តាមទូរស័ព្ទដល់សាច់ញាតិដែរ។
កាន់តែច្បាស់ និងសង្ស័យថា ជនរងគ្រោះអាចបាត់បង់ជីវិតក្នុងស្រះចាក់សម្រាមខាងលើ បុរសចំណាស់វ័យ៦១ឆ្នាំម្នាក់ឈ្មោះធៀម សៀម ដែលផ្ទះរបស់គាត់នៅជាប់មាត់ស្រះកើតហេតុនិយាយថា ថ្ងៃបាត់ខ្លួនបុរសជាអ្នកឃ្វាលគោខាងលើនោះ គាត់ស្ថិតក្នុងហេតុការណ៍ជួយលើកគោ២ក្បាលចេញពីស្រះដែរ ពោលគាត់ឃើញមានរំពាត់ឃ្វាលគោ, មួក និងដបមានទឹកពេញរបស់អ្នកឃ្វាលគោនៅក្នុងប្រហោងសម្រាម ។
តាមប្រភពដដែលបានបន្តថា លុះពេលគេយកដំបងរុកៗប្រហោងនោះ ស្រាប់តែផុសចេញប្រអប់បាយដែលជនរងគ្រោះយកតាមខ្លួន ទើបភ្ញាក់ផ្អើលថាជនរងគ្រោះអាចធ្លាក់ចូលចំណុចប្រហោងសម្រាមនោះបាត់បង់ជីវិត។
ទោះបីជាបែបណា អាជ្ញាធរនិងសមត្ថកិច្ចមិនត្រឹមតែរុករកជនរងគ្រោះតែក្នុងទឹកទេ ពេលនេះបែងចែកគ្នាតាមរកក្នុងចំការដំឡូងអ្នកស្រុកនិងតាមព្រៃផងដែរ។
អាជ្ញាធរអះអាងថា ក្រោយកាយសម្រាមអស់មួយស្រះ និងប្រើប្រាស់គ្រឿងចក្រអេស្កាវ៉ាទ័រលូកកូរក្នុងទឹកស្រះថែមទៀត ក្រែងសពនៅក្រោមសម្រាមផ្សេងៗដែលមិនអណ្តែត ព្រោះស្រះចាក់សម្រាមខាងលើមានជម្រៅជ្រៅរហូត៧ទៅ៩ម៉ែត្រ ៕ (កែសម្រួលដោយ ៖ ធីតា)
ចែករំលែកព័តមាននេះ