ខេត្តកំពង់ធំ ៖ នារីម្នាក់សង្ស័យខឹងម្តាយស្តីបន្ទោស ក៏ផឹកថ្នាំបំពុល បណ្តាលឱ្យបែកពពុះមាត់បាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យ ។ ហេតុការណ៍ខាងលើនេះបានកើតឡើងកាលពីវេលាម៉ោង៨យប់ថ្ងៃទី១ ខែសីហា ឆ្នាំ២០២០ នៅភូមិអូរសាលា…
ខេត្តកំពង់ធំ ៖ នារីម្នាក់សង្ស័យខឹងម្តាយស្តីបន្ទោស ក៏ផឹកថ្នាំបំពុល បណ្តាលឱ្យបែកពពុះមាត់បាត់បង់ជីវិតពេលបញ្ជូនទៅសង្គ្រោះនៅមន្ទីរពេទ្យ ។
ហេតុការណ៍ខាងលើនេះបានកើតឡើងកាលពីវេលាម៉ោង៨យប់ថ្ងៃទី១ ខែសីហា ឆ្នាំ២០២០ នៅភូមិអូរសាលា ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ ។
នារីរងគ្រោះឈ្មោះ ឈាន់ ស្រីល័ក្ខ អាយុ១៨ឆ្នាំ រស់នៅភូមិកើតហេតុខាងលើ ។
បើតាមការបំភ្លឺពីអ្នកស្រី ប៉ែន ហឿង ត្រូវជាម្តាយបង្កើតរបស់នារីរងគ្រោះបានឱ្យដឹងថា នៅថ្ងៃកើតហេតុ វេលាម៉ោងប្រហែល១២ថ្ងៃត្រង់ គាត់បានឲ្យកូនស្រីជិះម៉ូតូឌុបឪពុកបង្កើតជូនទៅឡើងរថយន្តនៅឯក្រុងស្ទឹងសែន ខេត្តកំពង់ធំ ជាមួយម៉ូតូ២គ្រឿងទៀតជាអ្នកភូមិជាមួយគ្នាដែលគេជូនសាច់ញាតិទៅដែរ ។
តាមប្រភពដដែលបានបន្តថា លុះដល់វេលាម៉ោងប្រហែល១រសៀល គាត់ឃើញម៉ូតូគេមក វិញអស់ហើយ បាត់តែម៉ូតូកូនស្រីរបស់គាត់មិនឃើញមកវិញ បន្ទាប់មកគាត់ទូរស័ព្ទរកក៏ខលមិនចូល រហូតដល់វេលាម៉ោង៧យប់ ទើបឃើញកូនស្រីមកដល់ផ្ទះវិញ ។ ពេលនោះគាត់ក៏បានសួរនាំ តែកូនស្រីមិនឆ្លើយធ្វើឲ្យគាត់ខឹងក៏បានជេរស្តីបន្ទោស។
តាមប្រភពដដែលបានបន្តទៀតថា រហូតដល់វេលាម៉ោងប្រហែល៨យប់ កូនស្រីចុះពីលើផ្ទះ ហើយដើរទៅក្រោយផ្ទះ លុះមួយសន្ទុះអ្នកជិតខាងនៅផ្ទះជាប់គ្នាបានស្រែកហៅគាត់ប្រាប់ថា «អ្នកណាកើតអីនៅពំនូកចំបើង» គាត់ក៏ស្ទុះទៅមើល ឃើញកូនស្រីបែកពពុះមាត់ និងមានដបថ្នាំពុលនៅក្បែរនាងទៀត ទើបគាត់ក៏ហៅបងប្អូនឱ្យជួយដឹកយកកូនស្រីទៅសង្គ្រោះនៅមន្ទីរពេទ្យខេត្តទាំងយប់ ហើយនាងក៏បានបាត់បង់ជីវិតនៅមន្ទីរពេទ្យ បន្ទាប់មកគាត់ក៏ដឹកសពកូនស្រីមកផ្ទះវិញ និងរាយការណ៍ទៅសមត្ថកិច្ចឱ្យចុះមកពិនិត្យតែម្តង។
ក្រោយពេលពេលទទួលបានព័ត៌មានខាងលើនេះភ្លាម កម្លាំងប៉ុស្តិ៍ និងអាជ្ញាធរមូលដ្ឋាន បានចុះពិនិត្យមកដល់កន្លែងកើតហេតុ បានឱ្យដឹងថា នៅលើរាងកាយនារីរងគ្រោះពុំមានស្លាកស្នាមអ្វីគួរឱ្យសង្ស័យឡើយ គឺនារីរងគ្រោះបានបាត់បង់ជីវិតដោយសារផឹកថ្នាំពុល ។ បន្ទាប់ពីពិនិត្យរួច សមត្ថកិច្ចបានធ្វើកំណត់ហេតុប្រគល់សពជូនក្រុមគ្រួសារដើម្បីរៀបចំធ្វើបុណ្យតាមប្រពៃណី ៕ (កែសម្រួលដោយ ៖ ធីតា)
ចែករំលែកព័តមាននេះ