កូវីដ-១៩ ៖ ខណៈកម្ពុជារហូតមកទល់ពេលនេះទប់ស្កាត់កូវីដ-១៩បានល្អនោះ កំណើនចុងក្រោយបានធ្វើឲ្យ មានការព្រួយបារម្ភខ្លាំងថា ស្ថានភាពអាចនឹងកាន់តែធ្ងន់ធ្ងរ បើសិនជាប្រជាជនទាំងអស់មានការធ្វេសប្រហែស។ អ្វីដែលកើតមាននៅវៀតណាមបានក្លាយជាការទាក់ទាញមួយសម្រាប់អ្នកជំនាញវេជ្ជសាស្ត្រនៅកម្ពុជាឲ្យយល់ថាស្ថានភាពកូវីដ-១៩ នៅកម្ពុជានៅផុយស្រួយហើយបើគ្មានការចូលរួមទាំងអស់គ្នាទេ ការឆ្លងរាល ដាលជាសហគមន៍អាចនឹងកើតមានឡើងដូចដែលអ្វីបានកើតមាននៅវៀតណាមនៅពេលនេះ។
គិតមកដល់ត្រឹមថ្ងៃអាទិត្យនេះ វៀតណាម មានមនុស្សស្លាប់ចំនួនដល់៥នាក់ហើយ និងមានអ្នកឆ្លងមេរោគកូវីដ-១៩ ទាំងអស់៥៩០នាក់។ ដំបូងវៀតណាមត្រូវពិភពលោកសរសើរថា ជោគជ័យក្នុងការទប់ស្កាត់ការរាលដាលកូវីដ-១៩ ដែលកំពុងគំរាមកំហែងពិភពលោកទាំងមូល។ ប៉ុន្តែបន្ទាប់ពី១០០ថ្ងៃ នៃភាពស្ងប់ស្ងាត់ រលកទីពីរបានចាប់ផ្តើមផ្ទុះចេញពីខេត្តដាណាង ជាខេត្ត ទេសចរណ៍ដ៏សំខាន់មួយរបស់វៀតណាម។ នៅក្នុងរយៈពេល៥ថ្ងៃចុងក្រោយនេះ វៀតណាមបានរាយការណ៍ ករណីកូវីដ-១៩ ថ្មីចេញពីខេត្ត ដាណាងចំនួន៣៤នាក់។ វៀតណាមក៏សម្រេចចិត្តបិទខេត្តមួយនេះ។
រលកទីពីរនៃការរាលដាលមេរោគកូវីដ-១៩ នៅវៀតណាមចាប់ផ្តើមចេញពីខេត្តដាណាង ហើយរាលដាល ដល់ហាណូយ ហូជីមិញ និងខេត្តដាក់ឡាក់។ ស្ថានភាពជំរុញឲ្យនាយរកដ្ឋមន្ត្រីវៀតណាម ព្រមានពីលទ្ធភាព នៃការរាដាលមេរោគកូវីដ-១៩ នៅគ្រប់ខេត្តក្រុងនៃប្រទេសវៀតណាម ហើយតម្រូវឲ្យមានការចាត់វិធានការ ខ្លាំងក្លា និងបន្ទាន់។ កម្ពុជាមានព្រំដែនជាប់ជាមួយប្រទេសវៀតណាម។ អ្វីដែលកំពុងកើតនៅវៀតណាមអាច ធ្វើឲ្យកម្ពុជាញាក់សាច់ដោយសារកូវីដ-១៩។
ប្រជាជនកម្ពុជាត្រូវតែបង្កើតការប្រុងប្រយ័ត្ន តាមការអំពាវនាវ របស់សម្តេចតេជោ ហ៊ុន សែន និងក្រសួងសុខាភិបាល បើសិនជាមិនចង់ស្រក់ទឹកភ្នែកដោយសារកូវីដ-១៩។ ខណៈវៀតណាមកំពុងគំរាមកំហែងដោយរលកទីពីរនៃការរាលដាលកូវីដ-១៩ ប្រទេសកម្ពុជាបានចេញ បញ្ជាឲ្យខេត្តតាមព្រំដែនវៀតណាមបង្កើនការប្រុងប្រយ័ត្ន។ ក្រសួងសុខាភិបាលបានចេញសេចក្តីណែនាំ ដល់ខេត្តកំពត តាកែវ កណ្តាល ព្រៃវែង ស្វាយរៀង ត្បូងឃ្មុំ ក្រចេះ មណ្ឌលគីរី និងរតនគីរី ត្រូវបង្កើនការប្រុងប្រយ័ត្ន។
រហូតមកទល់ពេលនេះ កម្ពុជាមានអ្នកឆ្លងកូវីដ-១៩ ចំនួន២៤០នាក់ ប៉ុន្តែមិនមាននរណាម្នាក់ស្លាប់ឡើយ ហើយក៏មិនមានការឆ្លងក្នុងសហគមន៍ដែរ ដោយករណីរកឃើញថ្មី ទាំងអស់គឺទាក់ទងនឹងការនាំចូលពីខាងក្រៅប្រទេស។ ប៉ុន្តែប្រទេសកម្ពុជានឹងអាចប្រឈមមុខស្ថានភាពកូវីដ-១៩ ធ្ងន់ធ្ងរដូចវៀតណាមអត់នោះ វានឹងអាស្រ័យ លើការចូលរួមទាំងអស់គ្នារបស់ប្រជាជនកម្ពុជា ដើម្បីប្រឆាំងនឹងមេរោគនេះ។
ការមិនធ្វើការប្រមូលផ្តុំមនុស្សច្រើន ការរក្សាគម្លាតសង្គម ការពាក់ម៉ាសការពារ ការធ្វើអនាម័យបានល្អដោយលាងដៃជាមួយសាប៊ូ ឬអាកុលឬទឹកជែលសម្លាប់រោគ និងការគោរពតាមការណែ នាំនានារបស់ក្រសួងសុខាភិបាលនឹងជួយកម្ពុជាឲ្យរួចផុតពីរលកទីពីរនៃកូវីដ-១៩។ ប៉ុន្តែការសប្បាយភ្លេចខ្លួន ហើយមិនព្រមអនុវត្តតាមវិធីខាងលើនឹងបង្កើនហានិភ័យ ខ្លាំងសម្រាប់ការរាលដាលនៃកូវីដ-១៩នៅកម្ពុជា៕ ដោយ ៖ ប្រេវីន
ចែករំលែកព័តមាននេះ