រាជធានីភ្នំពេញ ៖ ប្រជាពលរដ្ឋប្រមាណជាង១០០នាក់ បានអះអាងថា មកពី៥ភូមិបានលើកគ្នាមកបិទផ្លូវលេខ ១៥១(ផ្លូវទៅភ្នំប្រសិទ្ធ) ដើម្បីទាមទារឲ្យដោះលែងអ្នកភូមិម្នាក់ដែលជនមិនស្គាល់មុខ មួយក្រុមប្រមាណ ជាង១០នាក់ ប្រដាប់អោយអាវុធខ្លីចាប់ខ្លួនអូសដាក់រថយន្ត និងបាញ់ចំនួន៣គ្រាប់ ដើម្បីគំរាមឲ្យលក់ដីទំនាស់។ ការតវ៉ាបានផ្ទុះឡើងកាលពីវេលាម៉ោងប្រមាណ៣រសៀល ថ្ងៃទី០២ ខែសីហា ឆ្នាំ២០២០ ដោយអ្នកស្រុក បាននាំគ្នាយករ៉ឺម៉កម៉ូតូមកស្ទាក់បិទផ្លូវនៅមុខមណ្ឌលសុខភាពពញាពន់ ជាប់សាលាសង្កាត់ពញាពន់ ខណ្ឌព្រែកព្នៅ រាជធានីភ្នំពេញបណ្តាលឲ្យស្ទះចរាចរណ៍។
ការបិទនេះ ត្រូវបានអ្នកភូមិឲ្យដឹងថា ដើម្បីទាមទារ ឲ្យដោះលែងអ្នកភូមិម្នាក់ឈ្មោះ ញិល ក្រិល ភេទស្រី អាយុ៥៤ឆ្នាំ ដែលត្រូវបានជនមួយក្រុម ចាប់ខ្លួន កាលពីវេលាម៉ោងប្រមាណ២ និង៣០នាទី រសៀល ខណៈពេលដែលគាត់បានទៅច្រូតស្មៅនៅក្នុងភូមិធំត្បូង ហើយត្រូវបានមួយក្រុមដែលជាបក្ខពួកម្ចាស់ដីទំនាស់មកចាប់ដាក់រថយន្ត និងបាញ់គំរាមអ្នកភូមិ ចំនួន៣គ្រាប់ ដើម្បីគំរាមដោយលក់ដីទំនាស់ក្នុងតម្លៃថោកតែ១ម៉ែត្រការ៉េ ៥កាក់។
តាមក្រុមអ្នកតវ៉ា បានឲ្យដឹងថា ពួកគាត់ ប្រមាណជាង១០០នាក់ ក្នុងចំណោមប្រជាពលរដ្ឋចំនួន១៧៧គ្រួសារ នៅក្នុងភូមិចំនួន៥គឺភូមិ ធំត្បូងភូមិ ត្រពាំងស្នោរ, ភូមិបឹង, ភូមិព្រៃពង្រ និងភូមិវែង សង្កាត់ពញាពន់ មានទំនាស់ដីធ្លី ជាមួយលោកស្រី ឈ្មោះ អ៊ុយ បូវី ដែលឃុបឃិតគ្នាស៊ីដាច់ដីចិនប្រមាណជាង៣០០ហិតតា។ តាមប្រជាពលរដ្ឋឲ្យយដឹងថា ដីប្រមាណ៣០០ហិកតា ជាដីចិន ដែលបានទិញពីពួកគាត់ កាលពីឆ្នាំ១៩៩៣ ដោយខ្លះពុំទាន់ឲ្យលុយគ្រប់ផងហើយបាត់ដំណឹងរហូតមក ដីនោះត្រូវបានគាត់កាន់កាប់អាស្រ័យផលរហូតមក។ នៅឆ្នាំ២០០៥ ស្រាប់តែលេចមុខ ឈ្មោះ អ៊ុយ បូវី អះអាងថា ជាម្ចាស់ដី ហើយប្រជាពលរដ្ឋដែលជាអ្នកថែរក្សាអាស្រ័យផល ក៏បាននាំគ្នាតវ៉ា និងសូមឲ្យ ម្ចាស់ដីជាជនជាតិចិន ចេញមុខដោះស្រាយ។
ប្រជាពលរដ្ឋបន្តទៀត នៅពេលថ្មីស្រាប់តែក្រុមហ៊ុនក៏បានយកគ្រឿងចក្រមកឈូសឆាយ ព័ទ្ធដី ហើយត្រូវពួកគាត់រារាំងតវ៉ា ហើយត្រូវបានជនមិនមួយក្រុមមកគំរាមគំហែង ហើយនៅវេលាម៉ោង ប្រមាណ២ និង៣០នាទីរសៀល ថ្ងៃទី០២ ខែសីហា នេះ ជនទាំងនោះក៏បានចាប់ខ្លួនអ្នកភូមិម្នាក់ទើបពួកគាត់នាំគ្នា បិទផ្លូវតែម្តង។ ការបិទផ្លូវអស់រយៈពេលប្រមាណ១ម៉ោងកន្លះ អ្នកតវ៉ាក៏បានបើកឲ្យចរាចរឡើងវិញ ខណៈពេលដែលភ្លៀងបានបង្អុរធ្លាក់។ លុះក្រោយមក អ្នកភូមិក៏បាននាំគ្នាទិញអាវភ្លៀងបន្តបិទផ្លូវរហូតដល់ យប់ទៀត។
តាមអ្នកស្រុកបានឲ្យដឹងថា បើសិនមិនមានការដោះលែង និងដោះស្រាយ រឿងដីទំនាស់នោះទេ ពួកគាត់នឹងបន្តបិទផ្លូវនៅព្រឹកថ្ងៃទី០៣ ខែសីហា ទៀត។ ចំពោះការចាប់ខ្លួន សមត្ថកិច្ចខណ្ឌព្រែកព្នៅ បានអះអាងថា មិនដឹងថា កម្លាំងខាងណានោះទេមកចាប់នោះ។ តាមលោក គួ អឿន ចៅសង្កាត់ពញាពន់ បានឲ្យដឹងថា ប្រជាពលរដ្ឋដែលអាស្រ័យផលដែលមានទំនាស់នោះ ចំនួន ៣០០គ្រួសារ ហើយ ត្រូវបានម្ចាស់ដីឈ្មោះ អ៊ុយ បូវី ធ្វើការដោះស្រាយ បានប្រមាណជាង១០០គ្រួសារ នៅសល់ប្រមាណជិត២០០គ្រួសារ បានបន្តតវ៉ារហូតមកតាំងពីឆ្នាំ ២០០៥មកម្លេះ។ ចំពោះការចាប់ខ្លួនអ្នកភូមិ លោកពុំបានដឹងនោះទេ។ ទោះបីជាយ៉ាងណា កោះសន្តិភាពពុំទទួលបានការបំភ្លឺណាមួយពីភាគី ដែលគេអះអាងថា ជាម្ចាស់ដីក្រោយដែលផ្ទេរពីចិននោះឡើយ៕ ដោយ ៖ ម៉េង ធា
ចែករំលែកព័តមាននេះ