ខេត្តកំពង់ធំ ៖ យុវជនម្នាក់ត្រូវសមត្ថកិច្ចឃាត់ខ្លួន បន្ទាប់ពីឪពុកមាប្តឹងថា ជនសង្ស័យជាក្មួយបានទាញចបកាប់ វាយសំពង បណ្តាលឱ្យរងរបួសធ្ងន់ ។
ហេតុការណ៍ខាងលើនេះបានកើតឡើងកាលពីព្រឹកថ្ងៃទី២៩ កក្កដា ស្ថិតនៅភូមិសាស្ត្រភូមិអូអង្គរ ឃុំសាគ្រាមស្រុក ប្រាសាទបល្ល័ង្ក ខេត្តកំពង់ធំ លុះដល់វេលាម៉ោង១២ថ្ងៃទី៣០ ខែកក្កដា ឆ្នាំ២០២០ ទើបមានការចាប់ឃាត់ខ្លួនជនសង្ស័យជាក្មួយ ។
ជនសង្ស័យជាក្មួយឈ្មោះ ផល ផាត ភេទប្រុស អាយុ២២ឆ្នាំ ។ ចំណែកជនរងគ្រោះជាឪពុកមាឈ្មោះគៀន គឿន ភេទប្រុស អាយុ៥៦ឆ្នាំ ។ អ្នកទាំង២រស់នៅក្នុងភូមិឃុំកើតហេតុខាងលើ ។
លោកវរសេនីយ៍ត្រី អ៊ាត គឹមអ៊ាន់ អធិការរងនគរបាលស្រុកប្រាសាទបល្ល័ង្ក បានឱ្យដឹងថា ករណីខាងលើនេះបានកើតឡើងកាលពីថ្ងៃទី២៩ កក្កដា មកម៉្លេះ បង្កឡើងដោយជនសង្ស័យម្នាក់ដែលត្រូវជាក្មួយបង្កើតរបស់ជនរងគ្រោះបានយកចបកាប់ទៅវាយសំពងជនរងគ្រោះជាឪពុកមា បណ្តាលឲ្យរយះសាច់ និងបាក់ស្មងជើងខាងស្តាំ ក្នុងពេលឈ្លោះប្រកែកជេរគ្នា រហូតដល់ព្រឹកថ្ងៃទី៣០ ខែកក្កដា នៅពេលដែលសមត្ថកិច្ចនគរបាលទទួលបានពាក្យបណ្តឹងពីជនរងគ្រោះរួចមក ក៏ធ្វើការស្រាវជ្រាវឃាត់ខ្លួនជនសង្ស័យនិងដកហូតវត្ថុតាងបញ្ជូនមកអធិការដ្ឋាននគរបាលស្រុកប្រាសាទបល្ល័ង្ក ដើម្បីកសាងសំណុំរឿងចាត់ការតាមនីតិវិធី។
លោកអធិការរងបានបន្តថា នៅចំពោះមុខសម្ថកិច្ច ជនសង្ស័យបានឆ្លើយសារភាពថាមូលហេតុដែលខ្លួនកាប់ឪពុកមា គឺដោយសារតែខឹងឪពុកមាស្រវឹងស្រាហើយស្រែកឡូឡាជេរខ្លួន ដែលជាហេតុធ្វើឲ្យខ្លួនទប់កំហឹងមិនបាន ក៏ទាញចបកាប់វាយ បណ្តាលឱ្យរងរបួសធ្ងន់តែម្តង ៕ (កែសម្រួលដោយ ៖ ធីតា)
ចែករំលែកព័តមាននេះ