រាជធានីភ្នំពេញ ៖ រវល់ការងារ ផ្លូវស្ទះខ្លាំង សាំងថ្លៃ បានធ្វើមនុស្សមួយចំនួនទទួលទានអាហារក្រៅផ្ទះ ពិសេសអាហារថ្លៃត្រង់ ។ ដោយសារម្នាក់ៗរវល់ពេញៗមួយថ្ងៃបានធ្វើឲ្យប្តីមិនបានជួបមុខប្រពន្ធ ប្រពន្ធមិនបានជួបប្តី…
រាជធានីភ្នំពេញ ៖ រវល់ការងារ ផ្លូវស្ទះខ្លាំង សាំងថ្លៃ បានធ្វើមនុស្សមួយចំនួនទទួលទានអាហារក្រៅផ្ទះ ពិសេសអាហារថ្លៃត្រង់ ។ ដោយសារម្នាក់ៗរវល់ពេញៗមួយថ្ងៃបានធ្វើឲ្យប្តីមិនបានជួបមុខប្រពន្ធ ប្រពន្ធមិនបានជួបប្តី កូនមិនបានជួបឪពុក-ម្តាយ ។ ព្រលឹមចេញព្រលប់ចូល នេះ គឺជានិន្នាការរស់នៅរបស់មនុស្សម័យថ្មីនៅក្នុងទីក្រុង ។
និន្នាការនេះបានធ្វើឲ្យអ្នកខ្លះនិយាយថា ធ្វើឲ្យគ្រួសារបាត់បង់ភាពកក់ក្តៅទៅវិញ ពិសេសអាចឲ្យបុរសជាប្តីផិតក្បត់ប្រពន្ធបាន ។
អ្នកស្រី សម្ផស្ស ជាបុគ្គលិកក្រុមហ៊ុនឯកជននៅភ្នំពេញ និយាយថា ប្រមាណ៥ឆ្នាំហើយដែលអ្នកស្រី និងស្វាមី មិនបានបាយជុំគ្នានៅពេលអាហារថ្ងៃត្រង់ ដោយសារម្នាក់ៗរវល់រៀងៗខ្លួន និងផ្ទះនៅជាយក្រុងភ្នំពេញ ។ «ស្វាមីខ្ញុំគាត់ទទួលទានបាយនៅជិតកន្លែងធ្វើការគាត់ ។ ចំណែកខ្ញុំទទួលទានអាហារដែលដាក់មកពីផ្ទះនៅនឹងកន្លែងធ្វើការ ។ វាពិតជាធ្វើឲ្យយើងបាត់បង់ភាពកក់ក្តៅ ប៉ុន្តែធ្វើយ៉ាងមេច បើសង្គមវាទៅអញ្ចឹងហើយ» ។
អ្នកស្រីសម្ផស្ស បាននិយាយថា និន្នាការបែបនេះមិនមែនមានតែគ្រួសារគាត់ទេដែលបានអនុវត្ត អ្នកធ្វើការជាមួយគាត់ភាគច្រើនគេបានធ្វើបែបនេះដែរ ។ ស្ត្រីដែលមានកូនពីរនាក់រូបនេះបានបញ្ជាក់ថា ចំណែកកូនៗរបស់គាត់វិញ គឺរៀនមួយថ្ងៃពេញនៅសាលាតែម្តង ។ « តាមពិតទៅ សូម្បីតែពេលល្ងាចជួនកាលយើងមិនបានបាយជុំគ្នាផង ។ កាលពីមិនទាន់មានកូវីដ១៩ ពេលចេញពីធ្វើការខ្ញុំទៅយកកូនចេញពីសាលា ហើយកូនៗ គេចង់ញ៉ាំអីក្រៅផ្ទះ យើងញ៉ាំក្រៅផ្ទះទៀត ។ មកដល់ផ្ទះចូលរៀបរយផ្ទះតិចតូចដល់ពេលសម្រាក ។ ជីវិតពិតជាមិនបានជជែកគ្នាច្រើនឡើយក្នុងមួយថ្ងៃៗ» ។ អ្នកស្រីសម្ផស្ស បានបញ្ជាក់ ។ នៅពេលសួរថា តើអ្នកស្រី បារម្ភពីសុភមង្គលគ្រួសារទេ នៅពេលការរស់នៅខ្វះភាពកក់ក្តៅបែបនេះ ពិសេសនៅពេលសា្វមីមិនបានបាយនៅផ្ទះនោះ ។ ស្ត្រីមេផ្ទះវ័យជាង៣០ឆ្នាំរូបនេះបានសើច នៅពេលឭសំណួរនេះ ហើយពោលថា «ខ្ញុំឭគេនិយាយថា បុរសឥឡូវខិលខូចក្រៅផ្ទះពេលនៅថ្ងៃ ។ ពួកគាត់ឈប់ខូចពេលយប់ហើយ» ។
អ្នកស្រីថែមទាំងពោលពាក្យដូច្នេះថា «ខ្ញុំឮប្រុសៗនិយាយថា អ្នកខូចខិលពេលយប់អត់ទាន់សម័យទេ» ។ អ្នកស្រីសម្ផស្សបន្ថែមជាមួយ ការញញឹមៗ ថា «ខ្ញុំមិនបារម្ភចំពោះស្វាមីខ្ញុំទេ ពីរឿងនេះ ។ យើងទុកចិត្តគ្នា ខ្ញុំជឿជាក់គាត់» ។ សម្រាប់ស្ត្រីរូបនេះ គាត់បានទទួលយកនិន្នាការរស់នៅបាយក្រៅផ្ទះនេះ ។
ចំណែក នារីម្នាក់ទៀត គាត់ក៏មិនជំទាស់ទម្លាប់បាយក្រៅផ្ទះនេះដែរ ដោយគាត់បានបញ្ជាក់ថា របៀបរស់នៅប្រទេសជឿនលឿនគេធ្វើបែបនេះគ្រប់គ្នា ដោយសារម្នាក់ៗរវល់រៀងៗខ្លួន។ កញ្ញា មួយគាង ជាបុគ្គលិកឯកជនម្នាក់ទៀត ។ កញ្ញាបានទទួលស្គាល់ថាដោយសារតែភាពរវល់របស់មនុស្សសម័យថ្មីពិតជាមិនមានពេលវេលាច្រើន ដើម្បីបាយជុំប្តី-ប្រពន្ធដូចមនុស្សសម័យមុននោះឡើយ ។ ទោះជាកញ្ញាមិនទាន់មានស្វាមីយ៉ាងណាក្តី តែកញ្ញាព្រមទទួលយកនិន្នការថ្មីនេះ ។ «យើងរវល់រៀងៗខ្លួន។ បើគិតតែរកពេលមកទទួលអាហារជាមួយគ្នាពិតជាមិនអាចធ្វើកើតឡើយ» ។
មួយគាងបានបញ្ជាក់ថា បើទោះបីជាថ្ងៃក្រោយទៅគាត់ត្រូវបានមានស្វាមី គឺគាត់ព្រមទទួលយករបត់រស់នៅបែបថ្មីនេះ ។ នាងបានបន្តថា «បើយើងមិនទទួលទានអាហារថ្ងៃត្រង់ជាមួយគ្នា តែខ្ញុំនឹងព្យាយាមដើម្បីឲ្យមានពេលសម្រាប់គ្នាទៅវិញទៅមកនៅពេលអាហារពេលល្ងាច» ។ នារីដែលមានផ្គត់គំនិតបែបជាអ្នកដឹកនាំរួបនេះ មិនមានទុទ្ទិដ្ឋិនិយមថា បុរសបាយក្រៅផ្ទះ អាចមានឱកាសខិលខូចស្រីញ៉ីខាងក្រៅនោះទេ។ «សម័យនេះយើងយកគូជីវិតមិនមានការបង្ខំទេ គឺយើងពេញចិត្តគ្នាទៅវិញទៅមក ដូច្នេះប្រាកដជាយល់គ្នា អាចជឿទុកចិត្តគ្នា ហើយអាចជជែកគ្នាបានពីរឿងនេះ» ៕
ចែករំលែកព័តមាននេះ