ខេត្តកំពត ៖ ពលរដ្ឋជាច្រើននាក់មកពីឃុំផ្សេងៗគ្នា ក្នុងស្រុកបន្ទាយមាស បាននាំគ្នាចុះដងត្រីពុលនៅក្នុងព្រែកទូកមាស រយៈពេល២ថ្ងៃជាប់ៗគ្នាមកហើយ គឺថ្ងៃទី២៧ និងថ្ងៃទី២៨ ខែកក្កដា ២០២០ ។
បើយោងតាមការអោយដឹងពីពលរដ្ឋមកពីភូមិចម្លងជ្រៃ ឃុំទូកមាសខាងលិច ស្រុកបន្ទាយមាសបានប្រាប់អោយដឹងថា ត្រីនៅក្នុងព្រែកនេះចាប់ផ្ដើមពុល កាលពីព្រឹកថ្ងៃទី២៧ ខែកក្កដា ២០២០ មកម៉្លេះ។ ពេលនោះគាត់មិនសូវហ៊ានចុះទៅក្នុងទឹកដងត្រីទេ ដោយសារតែក្លិនទឹកនោះស្អុយខ្លាំងពេក ថែមទាំងរមាស់ទៀតផង ។
ចំណែកពលរដ្ឋម្នាក់ទៀតមកពីភូមិព្រៃចេក ឃុំទូកមាសខាងលិច ដែលកំពុងតែអង្គុយចាំដងត្រីពុលនៅក្នុងព្រែក បាននិយាយរៀបរាប់ថា ពិតជាគួរអោយភ្ញាក់ផ្អើលមួយ ដែលកាលពីម្សិលមិញមានពលរដ្ឋជាច្រើននាក់បានចុះដងត្រីពុលងាប់ នៅក្នុងព្រែកទូកមាស ដោយម្នាក់ៗបានត្រីរាប់រយគីឡូឯណោះ ។ ដោយសារបរិភោគមិនអស់ ថែមទាំងយកទៅលក់នៅទីប្រជុំជនទៀតផង។
លុះនៅរសៀលថ្ងៃទី២៨ ខែកក្កដា នេះ មានពលរដ្ឋម្នាក់ទៀតបានដេញចាប់អណ្ដើកមួយក្បាល មានទម្ងន់ប្រហែល២០គីឡូក្រាម ។
បើតាមលោកចាន់ រឹទ្ធ ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកំពត បាននិយាយប្រាប់អោយដឹងកាលពីរសៀលថ្ងៃទី២៨ ខែកក្កដា នេះថា លោកបានប្រាប់ទៅមន្ត្រីជលផលប្រចាំការនៅស្រុកកំពង់ត្រាច រឿងពាក់ពន្ធ័ករណីត្រីពុលនៅឯស្រុកបន្ទាយមាសនេះ ។
លោក ប៉ោ វី អភិបាលរងស្រុកបន្ទាយមាស ក៏បានថ្លែងប្រាប់អោយដឹងនៅរសៀលថ្ងៃទី២៨ ខែកក្កដា នេះថា ទំនប់ទឹកមួយនៅព្រែកទូកមាស ត្រូវបានបាក់ហូរចុះតាមដងព្រែកកាលពីព្រឹកថ្ងៃទី២៧ ខែកក្កដា ។ ទឹកដែលបាក់ទំនប់ហូរទៅក្រោមនោះ គឺជាទឹកមានកាកសំណល់ស្អុយរលួយ ក្រសួងធនធានទឹកបានទប់សាងសង់ទ្វារស្ទាក់ទឹកក្នុងព្រែកទូកមាស ។
លោក ប៉ោ វី បាននិយាយថា នៅពេលដែលទឹកកខ្វក់នោះហូរទៅក្នុងព្រែក ធ្វើឱ្យត្រីពុល និងងាប់ ។ លោកថា បើមានភ្លៀងមួយមេមកធ្វើអោយទឹកនោះបាត់ក្លិន ត្រីក៏ឈប់ពុលផងដែរ ៕
ចែករំលែកព័តមាននេះ