រាជធានីភ្នំពេញ ៖ ការប្រកួតដណ្ដើមពានពាក់កណ្ដាលអាជីពប្រចាំរដូវកាលថ្មី ២០២០ គឺការប្រកួតដណ្ដើមពាន KMH Champioan League បានឈានដល់ការប្រកួតយកតែ៨ក្រុមចុងក្រោយហើយ ដោយកាលពីថ្ងៃទី២៨ ខែកក្កដា ឆ្នាំ២០២០ មុននេះ ។
ហើយពូល E ដែលចម្រុះដោយក្រុមពាក់កណ្ដាលអាជីពល្អៗ បានប្រកួតបញ្ចប់ហើយ ខណៈដែលក្រុមតារាមហាហង្ស ដែលជាក្រុមពាក់កណ្ដាលអាជីពមានតារាសម្ដែងជាកីឡាករផង បានយកឈ្នះក្រុមខ្លាំង ISI Dangkor Senchey FC ក្នុងលទ្ធផល 1-0 ហើយក្លាយជាលេខ១ ក្នុងពូល ជាមួយនឹងពិន្ទុ៩ពេញ។
ការប្រកួតនេះដែរ ចាប់ផ្ដើមតាំងពីស្ថានភាពកូវីដ19 មានការប្រសើរឡើង នេះគឺជាការប្រកួតដណ្ដើមពានពាក់កណ្ដាលអាជីពប្រចាំឆ្នាំ ដែលការប្រកួតមួយនេះក៏ចាត់ទុកថាជាការប្រកួតពាក់កណ្ដាលអាជីពធំមួយផងដែរ ។ ដោយជារៀងរាល់ឆ្នាំ ការប្រកួតដណ្ដើមពាននេះ រមែងមានក្រុមប្រកួតប្រជែងសុទ្ធតែខ្លាំងៗចូលរួម។
នៅក្នុងរដូវកាលនេះ ដ្បិតតែមានការប៉ះពាល់ដោយកូវីដ19 ក៏ការប្រកួតនេះ នៅតែបានដំណើរការ ទើបការប្រកួតទាំងមូលលេចរូបរាងឡើង ហើយដំណើរការការប្រកួតប្រជែងក្នុងមួយរយៈចុងក្រោយ រហូតឈានដល់ការបញ្ចប់វគ្គជម្រុះក្នុងពូល ដែលមានន័យថា រកឃើញលេខ1 និងលេខ2 ប្រចាំពូលនីមួយៗ ហើយក្រុមដែលបានឡើងបន្តត្រូវប្រកួតខ្វែង ដើម្បីជម្រុះយកតែ4ក្រុមទៅកាន់វគ្គបន្ត។
លោក អ៊ិន សុភិន ប្រធានក្រុម Mohahang All Star FC ដែលជាក្រុមទទួលពិន្ទុលេខ1ប្រចាំពូល E បានថ្លែងបញ្ជាក់ថា ការប្រកួតដណ្ដើមពាននេះ ធ្វើឡើងច្រើនឆ្នាំមកហើយ ដោយក្រុមរបស់លោកទើបតែបានចូលប្រកួតបាន2លើកប៉ុណ្ណោះ។
លោកថា កាលពីលើកទី1 ក្រុមលោកក៏បានចូលក្នុងចំណោម8ក្រុមបែបនេះផងដែរ ប៉ុន្តែនៅពេលប្រកួតយក4ក្រុមក៏ត្រូវធ្លាក់ចេញ។
យ៉ាងណាមិញលោកថា ការប្រកួតនៅក្នុងពេលនោះ ក្រុមរបស់លោកនៅមិនទាន់មានសមត្ថភាព និងមិនទាន់មានសមាជិកក្រុមល្អដូចក្នុងរដូវកាលថ្មីនេះទេ ទើបលោកហាក់មានការរំពឹងនៅពេលមានឱកាសឈានចូលដល់វគ្គ8ក្រុមម្ដងទៀតនៅក្នុងពេលនេះ។
លោកថា ការប្រកួតរដូវកាលនេះ ក្រុមលោកមើលឃើញពីសន្ទុះជោគជ័យល្អជាង បើធៀបនឹងឆ្នាំមុន ទើបលោកហាក់មានទំនុកចិត្តជាងមុន នៅពេលសួរពីអារម្មណ៍ថា សង្ឃឹមកម្រិតណាលើពាននៅវគ្គវុងក្រោយ។
លោកបន្តទៀតថា បន្ទាប់ពីឆ្លងផុតការប្រកួតក្នុងពូល ហើយបានឈរលេខ១ក្នុងពូល ក្រុមរបស់លោកនឹងត្រូវបង្កើនការហ្វឹកហាត់បន្ថែមទៀត ដើម្បីត្រៀមខ្លួនសម្រាប់ឱកាសវគ្គមួយភាគ៤ បើទោះជាក្រុមរបស់លោកត្រូវប៉ះជាមួយនឹងក្រុមខ្លាំងៗនៅក្នុងពូលផ្សេង។
ចែករំលែកព័តមាននេះ