ប្រទេសចិន ៖ Oscar អតីតខ្សែបម្រើប្រយុទ្ធឆ្នើមក្រុមតោខៀវ Chelsea ដែលបច្ចុប្បន្នកំពុងប្រកបអាជីពនៅលីគកំពូលចិនជាមួយក្លិប Shanghai SIPG បានបង្ហាញចំណាប់អារម្មណ៍ចង់ចូលរួមជាមួយក្រុមជម្រើសជាតិចិន ប្រសិនបើច្បាប់របស់…
ប្រទេសចិន ៖ Oscar អតីតខ្សែបម្រើប្រយុទ្ធឆ្នើមក្រុមតោខៀវ Chelsea ដែលបច្ចុប្បន្នកំពុងប្រកបអាជីពនៅលីគកំពូលចិនជាមួយក្លិប Shanghai SIPG បានបង្ហាញចំណាប់អារម្មណ៍ចង់ចូលរួមជាមួយក្រុមជម្រើសជាតិចិន ប្រសិនបើច្បាប់របស់ FIFA អនុញ្ញាតឱ្យ។
នៅពេលត្រូវសួរថា តើគេនឹងពិចារណាលេងឱ្យប្រទេសចិនដែរឬទេ? Oscar បានប្រាប់ទូរទស្សន៍ CGTN ថា «ពិតជាអាច ហើយខ្ញុំអាចគិតអំពីវា។ វាពិបាកក្នុងការលេងឱ្យជម្រើសជាតិប្រេស៊ីលពេលឥឡូវនេះ ពីព្រោះខ្ញុំនៅទីនេះ (ចិន)។ ប៉ុន្តែនៅក្នុងប្រទេសចិនអ្នករាល់គ្នាឃើញថា ខ្ញុំលេងបានល្អណាស់។ ហើយប្រសិនបើចិន ត្រូវការខ្សែបម្រើល្អម្នាក់ ដូច្នេះខ្ញុំអាចជួយបាន ប្រសិនបើពួកគេអាចផ្លាស់ប្តូរបាន។ ហើយខ្ញុំគិតថាកីឡាករពេលនេះ បើពួកគេផ្លាស់ប្តូរសញ្ជាតិដើម្បីចូលរួមជាមួយប្រទេសចិន ពួកគេក៏អាចធ្វើបានល្អជាងនេះផងដែរ»។
សូមរំលឹកថាខ្សែប្រយុទ្ធជនជាតិប្រេស៊ីល Elkeson ដែលឥឡូវនេះត្រូវបានគេស្គាល់ថា Ai Kesen (ឈ្មោះចិន) បានចូលសញ្ជាតិចិន និងមានសិទ្ធិលេងឱ្យជម្រើសជាតិចិន ដោយសារតែគេបានស្នាក់នៅក្នុងប្រទេសនេះអស់រយៈពេល៥ឆ្នាំ ប៉ុន្តែរូបគេមិនដែលលេងសម្រាប់ជម្រើសជាតិប្រេស៊ីលឡើយ។
បើយោងតាមពីច្បាប់របស់ FIFA បានចែងថា កីឡាករម្នាក់មិនអាចតំណាងឱ្យប្រទេសមួយផ្សេងទៀតបានទេ នៅពេលដែលពួកគេបានធ្វើការប្រកួតប្រជែងសម្រាប់ប្រទេសមួយផ្សេងទៀត (ប្រទេសដើម)។ ប៉ុន្តែសម្រាប់ Oscar កំពុងតែចង់ឱ្យច្បាប់នេះមានការផ្លាស់ប្តូរ។
ទោះយ៉ាងណា Oscar ដែលបានចុះកុងត្រាជាមួយក្រុម Shanghai SIPG កាលពីខែធ្នូ ឆ្នាំ២០១៦ បានលេងឱ្យជម្រើសជាតិប្រេស៊ីលចំនួន ៤៧ដងដោយរកគ្រាប់បាល់បាន១២គ្រាប់ អាចត្រូវចំណាយ ១ ឬ ២ឆ្នាំបន្ថែមទៀត ដើម្បីអាចចូលសញ្ជាតិចិនបាន។ ខណៈដែលគេមិនបានលេងឱ្យជម្រើសជាតិប្រេស៊ីល ចាប់តាំងពីខែវិច្ឆិកា ឆ្នាំ២០១៥ មកម្ល៉េះ។
ហើយបច្ចុប្បន្នសមាគមបាល់ទាត់ចិន កំពុងសិក្សាពីលទ្ធភាពដើម្បីស្នើការអនុញ្ញាតពី FIFA ដើម្បីដាក់បញ្ចូល Oscar ចូលសញ្ជាតិចិនផងដែរ៕ (ដកស្រង់ចេញពី South China Morning Post)
ចែករំលែកព័តមាននេះ