រាជធានីភ្នំពេញ ៖ ការប្រកួតកីឡាយុទ្ធសិល្ប៍ចម្រុះពានរង្វាន់សម្ដេចក្រឡាហោម ស ខេង លើកទី៣ ឆ្នាំ២០២០ បានបិទការប្រកួតជាផ្លូវការហើយកាលពីថ្ងៃទី២៥ កក្កដា បន្ទាប់ពីបានរៀបចំធ្វើតាំងពីថ្ងៃទី២៣ កក្កដា នៅទីលានមជ្ឈមណ្ឌលកីឡាក្នុងពហុកីឡដ្ឋានជាតិ។
លោក ជាតិ ខេមរា ប្រធានគណៈកម្មការរៀបចំការប្រកួតបានឱ្យដឹងថា ការប្រកួតកីឡាយុទ្ធសិល្ប៍ចម្រុះនេះមាន៣ប្រភេទកីឡាចូលរួមក្នុងនោះមានតេក្វាន់ដូWTដែលមានកីឡាករចូលរួមចំនួន១៥នាក់ ចែកចេញជា៣ប្រភេទម្ងន់គឺទម្ងន់៥៨គីឡូក្រាម ៦៨គីឡូក្រាម និង៨០គីឡូក្រាម។
ប្រភេទកីឡាយូដូ មានកីឡាករ-កីឡាការិនីចូលរួមចំនួន១៧នាក់ចែកចេញជា៣ប្រភេទទម្ងន់គឺទម្ងន់៧៣គីឡូក្រាមឡើង ចម្រុះបុរសនារីទម្ងន់៦០គីឡូក្រាម ឯកត្តជនបុរស និងទម្ងន់៥៧គីឡូក្រាមឡើងឯកត្តជននារី និងកីឡាការ៉ាតេមានកីឡាករចូលរួមចំនួន១៧នាក់ចែកចេញជា៤ប្រភេទទម្ងន់គឺផ្នែកប្រយុទ្ធបុរសទម្ងន់៦០គីឡូក្រាម និងក្រោម៦០គីឡូក្រាម ផ្នែកប្រយុទ្ធបុរសទម្ងន់៦៧គីឡូក្រាមនិងក្រោម៦៧គីឡូក្រាម ផ្នែកប្រយុទ្ធបុរសទម្ងន់៧៥គីឡូក្រាមនិងក្រោម៧៥គីឡូក្រាម និងផ្នែកប្រយុទ្ធបុរសទម្ងន់៨០គីឡូក្រាមនិងក្រោម៨០គីឡូក្រាម។
ចំពោះលទ្ធផលបច្ចេកទេសវិញ ប្រភេទកីឡាតេក្វាន់ដូWT សមាគមកីឡាក្រសួងមហាផ្ទៃដណ្ដើមបានមេដាយច្រើនជាងគេគឺមេដាយមាស៤គ្រឿង មេដាយប្រាក់២គ្រឿង និងមេដាយសំរឹទ្ធ១គ្រឿង ។ ក្លិបI Canដណ្ដើមបានមេដាយសំរឹទ្ធ២គ្រឿង និងនិងក្លិបហូសាណាដណ្ដើមបានមេដាយសំរឹទ្ធ២គ្រឿងដូចគ្នា ។ ប្រភេទកីឡាយូដូ សមាគមកីឡាក្រសួងមហាផ្ទៃដណ្ដើមបានមេដាយមាស៣គ្រឿង និងមេដាយប្រាក់៣គ្រឿង ។ ក្លិបឥន្ទ្រីដណ្ដើមបានមេដាយសំរឹទ្ធ៦គ្រឿង និងប្រភេទកីឡាការ៉ាតេ សមាគមកីឡាក្រសួងការពារជាតិដណ្ដើមបានមេដាយមាស៣គ្រឿង មេដាយប្រាក់១គ្រឿង។ ចំណែកសមាគមកីឡាក្រសួងមហាផ្ទៃដណ្ដើមបានមេដាយមាស១គ្រឿង និងមេដាយប្រាក់២គ្រឿង។
ក្នុងឱកាសនោះ លោកឧត្តមសេនីយ៍ឯក ជា ប៊ុនហេង ប្រធានអង្គភាពកីឡានគរបាលជាបានមានប្រសាសន៍ផ្ដាំផ្ញើទៅដល់កីឡាករកីឡាការិនីទាំងអស់ឱ្យខិតខំប្រឹងប្រែងហ្វឹកហាត់ជាបន្តទៀត ព្រោះការប្រកួតកីឡាស៊ីហ្គេមលើកទី៣២ឆ្នាំ២០២៣កាន់តែខិតជិតមកដល់ហើយ។
លោកថា មានតែពួកយើងទាំងអស់គ្នានេះហើយដែលជាអ្នកតំណាងឱ្យជាតិក្នុងការដណ្ដើមយកមេដាយមកជូនជាតិ ។ ជាមួយគ្នានេះ លោកបានសន្យាថា ព្រឹត្តិការណ៍បែបនេះនៅឆ្នាំក្រោយនឹងរៀបចំធ្វើឱ្យធំជាងនេះ រីឯប្រាក់រង្វាន់ក៏កើនឡើងទ្វេដងដែរ៕
ចែករំលែកព័តមាននេះ