រាជធានីភ្នំពេញ ៖ ដោយសារតែជីវភាពក្រីក្រមានតែម្តាយចាស់ដើររើសអេតចាយយកប្រាក់ចិញ្ចឹមកូនប្រុសដែលជាកម្មករសំណង់ធ្លាក់ពីលើរន្ទាកម្ពស់២ជាន់រយៈពេល៣ឆ្នាំមកហើយដេកនៅផ្ទះ ទាល់តែធ្លាក់ខ្លួនឈឺខ្លាំងទើបសម្រេចចិត្តយកទៅព្យាបាលនៅមន្ទីរពេទ្យព្រះកុសុមៈ កាលពី១៦ មករា កន្លងមកនេះ ។
បើតាមសម្តីលោកយាយឈ្មោះ វ៉ា ស៊ីវ អាយុ៧៦ឆ្នាំ មុខរបររើសអេតចាយ និងដើរបេះត្រកួនលក់ ស្នាក់នៅក្នុងខ្ទមធ្វើពីស័ង្កសីទំហំ៣គុណ៤ម៉ែត្រ នៅជាប់របងមន្ទីរពេទ្យព្រះកុសុមៈ សង្កាត់ទឹកល្អក់ទី២ ខណ្ឌទួលគោក បានឲ្យដឹងថា ជីវភាពគាត់ក្រីក្រណាស់ អត់ផ្ទះ សម្បែងស្នាក់នៅទេ កូនខ្ទមដែលរស់នៅរស់ថ្ងៃសុំដីគេស្នាក់នៅបណ្តោះអាសន្នទេ ហើយគាត់ជាស្ត្រីមេម៉ាយមានកូនប្រុស២នាក់ ដែលកូនប្រុសបងឈ្មោះ វ៉ា គង់ អាយុ៥២ឆ្នាំ អតីតជាកម្មករសំណង់ មានប្រពន្ធ ប៉ុន្តែពេលដែលប្តីទៅធ្វើការសំណង់ហើយធ្លាក់ពីលើរន្ទាកម្ពស់២ជាន់បណ្តាលឲ្យរងរបួសធ្វើការលែងកើតប្រពន្ធបានរត់ចោល ។
ម្តាយចាស់បានឲ្យដឹងទៀតថា កូនទី២ដែលជាកូនប្រុសពៅរបស់គាត់ឈ្មោះ វ៉ា ឌី អាយុ៣២ឆ្នាំ រយៈពេលជាង២ខែមកហើយបានទៅឈរមើលគេវាយគ្នាត្រូវបានគេចោទថា កូនរបស់គាត់ជាអ្នកបង្កបានចាប់ដាក់ពន្ធនាគារព្រៃសទៀត ធ្វើឲ្យជីវភាពរបស់គាត់កាន់តែដុនដាបដោយសារតែនៅក្នុងគ្រួសារមានតែគាត់ម្នាក់ខំដើររើសអេតចាយ ដើរបេះត្រកួនយកប្រាក់ទិញថ្នាំព្យាបាលជម្ងឺកូននៅផ្ទះ មិនបានទៅព្យាបាលនៅមន្ទីរពេទ្យទេ ដោយសារតែអត់មានលុយ រហូតកូនធ្លាក់ខ្លួនឈឺធ្ងន់ធ្ងរទើបគាត់សម្រេចចិត្តយកកូនទៅព្យាបាលនៅមន្ទីរពេទ្យព្រះកុសុមៈ ។
កូនលោកយាយសម្រាកនៅមន្ទីរពេទ្យដោយមិនមានបង់ថ្លៃពេទ្យទេ ប៉ុន្តែលោកយាយអត់មានលុយទិញអាហារហូបទេ បានអ្នកជម្ងឺនៅគ្រែជិតគ្នាឲ្យម្នាក់បន្តិចយកទៅទិញអាហារឲ្យកូនហូប ។ ដូនចាស់សូមអំពាវនាវឲ្យសប្បុរសជនទាំងអស់មេត្តាជួយគាត់ និងកូនប្រុសរបស់គាត់ផង ៕
ចែករំលែកព័តមាននេះ