ខេត្តពោធិ៍សាត់ ៖ ក្នុងឱកាសដោះស្រាយបញ្ហាក្រៅប្រព័ន្ធតុលាការជូនប្រជាពលរដ្ឋជារៀងរាល់សប្ដាហ៍ ក្នុងមួយសប្ដាហ៍២ដងរបស់ឯកឧត្តមអភិបាលខេត្ត នាព្រឹកថ្ងៃទី២៦ ខែកក្កដាឆ្នាំ២០២០ ព្រះតេជគុណ ឡាយ កន ព្រះគ្រូចៅអធិការវត្តបាកាន បាននិមន្តមកចូលរួមព្រមទាំងនាំយកនូវអង្ករចំនួន២.៥០០គីឡូក្រាម មកផ្ដល់ជូនឯកឧត្តម ម៉ៅ ធនិន អភិបាលខេត្ត ដើម្បីទុកជួយសង្គ្រោះដល់គ្រួសារក្រីក្រពិតប្រាកដ និងជនចាស់ជរាគ្មានទីពឹង ក្នុងកាលទេសៈដែលសកលលោកកំពុងទទួលរងផលប៉ះពាល់ដោយជំងឺកូវីដ-១៩ ។
ព្រះតេជគុណ ឡាយ កន ព្រះគ្រូចៅអធិការវត្តបាកាន មានថេរដីកាថា ដោយមើលឃើញពីតម្រូវការចាំបាច់របស់រដ្ឋបាលខេត្ត ក្នុងការបម្រើសេវាមនុស្សធម៌ជួយជនចាស់ជរាគ្មានទីពឹង និងប្រជាពលរដ្ឋក្រីក្រពិតប្រាកដ ក្នុងអំឡុងកូវីដ-១៩នេះ ព្រះអង្គរួមជាមួយព្រះសង្ឃគ្រប់ព្រះអង្គនិងគណៈកម្មការអាចារ្យវត្តបាកានទាំងមូល បានឯកភាពគ្នាផ្ដល់អង្ករចំនួន២.៥០០គីឡូក្រាម ដល់រដ្ឋបាលខេត្តពោធិ៍សាត់ ដើម្បីចូលរួមក្នុងកម្មវិធីមនុស្សធម៌នេះ ។
អង្ករទាំងនេះបានមកពីថវិការបស់ពុទ្ធបរិស័ទចំណុះជើងវត្ត យកមកប្រគេនព្រះសង្ឃក្នុងរដូវបុណ្យប្រពៃណីផ្សេងៗ ហើយព្រះតេជគុណក្នុងនាមព្រះចៅអធិការវត្ត ក៏បានរៀបចំចាត់ចែងយកមកចូលរួមជាមួយឯកឧត្តមអភិបាលខេត្តនាពេលនេះ ព្រោះថាវិស័យពុទ្ធចក្រនិងអាណាចក្រត្រូវដើរទន្ទឹមគ្នា មិនអាចខ្វះមួយណាបានឡើយ ។
ឯកឧត្តម ម៉ៅ ធនិន អភិបាលខេត្ត បានថ្លែងអំណរព្រះគុណយ៉ាងជ្រាលជ្រៅព្រះតេជគុណ ឡាយ កន ព្រះគ្រូចៅអធិការវត្តបាកាន ដែលមានព្រះទ័យគិតគូរនិងយកចិត្តទុកដាក់ដល់ការងារ
សង្គមគ្រប់ពេលវេលា ។ ទង្វើនិងសកម្មភាពមនុស្សធម៌របស់ព្រះអង្គនាពេលនេះ ក៏ដូចពេលមុនៗដែរ បានសបញ្ជាក់ឱ្យឃើញពីព្រះទ័យជ្រះថ្លាជាមួយរាជរដ្ឋាភិបាល អាជ្ញាធរដែនដី ជាពិសេសជាមួយរដ្ឋបាលខេត្ត ក្នុងការប្រយុទ្ធប្រឆាំងការរីករាលដាលជំងឺកូវីដ-១៩ ។
នេះមិនមែនជាលើកទី១ទេ ដែលព្រះសង្ឃ អាចារ្យ និងគណៈកម្មការវត្តបាកាន ចូលរួមក្នុងវិស័យមនុស្សធម៌ ផ្ដល់ស្បៀង សម្ភារប្រើប្រាស់ និងប្រាក់កាសដល់សាខាកាកបាទក្រហម ចែកអំណោយជូនប្រជាពលរដ្ឋទីទ័លក្រ អ្នកជំងឺ កុមារកំព្រា កងទ័ព និងជួយសាងសង់ព្រះវិហារ សាលាឆាន់ កុដិ ដល់វត្តខ្វះខាតនៅឆ្ងាយដាច់ស្រយាលជាដើម ៕
ចែករំលែកព័តមាននេះ