ខេត្តកំពង់ស្ពឺ ៖ រថយន្តដឹកឈើរបស់ថៅកែស្រីដ៏ល្បីឈ្មោះមួយរូបប្រចាំខេត្តពោធិ៍សាត់ ដែលកន្លងមក គ្មានសមត្ថកិច្ចណាហ៊ានបង្ក្រាបទាល់តែសោះ បើទោះជាការដឹកជញ្ជូនឈើដោយខុសច្បាប់នេះឆ្លងកាត់ខេត្តជាច្រើនក៏ដោយ ទម្រាំដល់គោលដៅ ពេលនេះតោទ្រាហើយ។
ក្នុងអំឡុងខែកក្កដានេះ បើតាមការរៀបរាប់របស់អ្នកបើកបរបានប្រាប់ថា គេរត់ដឹកជញ្ជូនឈើពីខេត្តពោធិ៍សាត់ យកទៅលក់នៅខេត្តកំពតនេះ បានចំនួន 20 ជើងរួចមកហើយ ទើបតែលើកនេះ ជើងទី21 ត្រូវបានសមត្ថកិច្ចធ្វើការបង្ក្រាបតែម្ដង។ ក្រោយពីបង្ក្រាប សមត្ថកិច្ចបានសុំគោលការណ៍ថ្នាក់លើអូសយកទៅរក្សាទុកនៅសាលាខេត្តកំពង់ស្ពឺ ដើម្បីធ្វើការវាស់វែង និងចាត់ចែងតាមនីតិវិធី។
ការបង្ក្រាបរថយន្តដឹកឈើលើកនេះធ្វើឡើងកាលពីព្រឹកថ្ងៃទី២៦ ខែកក្កដា ឆ្នាំ២០២០ នៅលើកំណាត់ផ្លូវជាតិលេខ៥១ ជិតស្នាក់ការសង្កាត់រដ្ឋព្រៃឈើឧដុង្គ ដែលមានលោក ឌុច វណ្ឌី ជានាយសង្កាត់ជើងចាស់រាប់ឆ្នាំមកហើយ ស្ថិតនៅក្នុងឃុំវាំងចាស់ ស្រុកឧដុង្គ ខេត្តកំពង់ស្ពឺ។
ប្រភពពីសមត្ថកិច្ចកងរាជអាវុធហត្ថបានឲ្យដឹងថា ក្រោយពីទទួលសេចក្តីរាយការណ៍ថារថយន្តដឹកឈើខាងលើ បានធ្វើដំណើរចេញពីខេត្តពោធិ៍សាត់ ឆ្លងកាត់ខេត្តកំពង់ឆ្នាំង ឆ្ពោះមកខេត្តកំពង់ស្ពឺ និងបន្តយកទៅលក់នៅដេប៉ូមួយកន្លែងក្នុងស្រុកឈូកខេត្តកំពត កម្លាំងសមត្ថកិច្ចក៏បានស្នើសុំគោលការណ៍ធ្វើការបង្ក្រាបរហូតបានសម្រេច។
ប្រភពបន្តទៀតថា រថយន្តរបស់ថៅកែឈើនេះ សមត្ថកិច្ចបានធ្វើការតាមដានជាយូរមកហើយ ទើបតែលើកនេះមានឱកាសក៏ធ្វើការបង្ក្រាបជាក់ស្ដែងបានទាំងឈើ និងរថយន្តតែម្ដង។
បើតាមការរៀបរាប់របស់តៃកុងរថយន្តនិយាយមុនពេលរត់គេចខ្លួនបានឱ្យដឹងថា ថៅកែខ្លួនអាចដឹកជញ្ជូនឈើបានយ៉ាងរលូនបែបនេះ គឺចែ ផល្លី គាត់បានបង់លុយគ្រប់សមត្ថកិច្ចតាមដងផ្លូវ គ្រប់ខេត្តដែលឆ្លងកាត់អស់ហើយ ។ សូម្បីតែមន្ត្រីការិយាល័យច្រកចេញចូលតែមួយរបស់ស្រុកឧដុង្គ ក៏ថៅកែរបស់គេបង់លុយឱ្យដែរ។
បើតាមមន្ត្រីអាវុធហត្ថស្រុកមួយរូបបាននិយាយផងដែរថា រថយន្តដឹកឈើរបស់មេឈ្មួញល្បីឈ្មោះនោះ ម៉ាកហ៊ីយ៉ាន់ដាយ ពណ៌ស លាយត្រួយចេកឆ្នូតខៀវ ពាក់ស្លាកលេខ ព្រះសីហនុ 3A.2361 ដែលគេស្គាល់ច្បាស់ថាជា រថយន្តរបស់ (ចែ ផល្លី) មេឈ្មួញដ៏ល្បីឈ្មោះប្រចាំតំបន់វាលវែង ខេត្តពោធិ៍សាត់។
មន្ត្រីដដែលបានបន្តថា នៅមុនពេលបង្ក្រាបរថយន្តដឹកឈើខាងលើនេះ គឺមានការរាយការណ៍ពីបណ្តាញ ហើយក៏សុំគោលការណ៍ចាំស្ទាក់បង្ក្រាបតែម្តង។ ចំពោះឈើគ្រឿងផ្ទះ មានដូចជា សសរ និង ឃ្នាប មិនក្រោម២០ម៉ែត្រគូបនោះទេ ។ ឈើទាំងនេះត្រូវបានដឹងថា ដឹកចេញពីម្តុំប្រមោយ ចិនយំ វាលវែង បើកបរតាមផ្លូវជាតិលេខ៥៥ ឆ្លងកាត់មុខស្នាក់ការអង្គការ (ស៊ីអាយ វ៉ាយអេដ) ឆ្លងផ្លូវជាតិលេខ៥ កាត់ស្រុកក្រគរ កាត់ខេត្តកំពង់ឆ្នាំង និងខេត្តកំពង់ស្ពឺ ខេត្តតាកែវ ហើយបើមិនមានបញ្ហានោះទេ គឺគេយកទៅលក់នៅក្នុងស្រុកឈូក ខេត្តកំពតតែម្តង។
ដោយឡែកបើតាមតៃកុងរថយន្តឈ្មោះ ប្រុស អាយុជាង៤០ឆ្នាំ និយាយមុនពេលគេចខ្លួនថា គេជាអ្នកស៊ីឈ្នួលបើករថយន្តឱ្យ ចែ ផល្លី ដោយក្នុងខែកក្កដានេះ ដឹកជញ្ជូនបានចំនួន២០រថយន្តមកហើយ ចេញពីកន្លែងលើកក្នុងស្រុកវាលវែង ខេត្តពោធិ៍សាត់ យកទៅលក់បន្តនៅស្រុកឈូកខេត្តកំពត។
តាមការបង្ហើបពីតៃកុងរថយន្តថា ការចរាចរណ៍ដឹកជញ្ជូនឈើរបស់ ចែ ផល្លី នេះគឺតាមដឹងគាត់បានបង់លុយអោយសមត្ថកិច្ចតាមដងផ្លូវរួចរាល់អស់ហើយ មានខេត្តដែលឆ្លងកាត់ទាំងអស់ បូករួមទាំងក្រុមអ្នកកាសែតថែមទៀតផង បើគិតជើងក្នុង១រថយន្តអស់លោកយកចំនួន២០ដុល្លារ ឬស្មើនឹង៨ម៉ឺនរៀល បើសរុប១ខែម្តង គឺ១០០ដុល្លារ ឬ៤០ម៉ឺនរៀល ជាថ្នូរនឹងការមិនរាយការណ៍ ឬចាប់បង្ក្រាប ជាពិសេសគឺអស់លោកមេព្រៃតែម្តង បើមិនបង់លុយអោយពួកគាត់ទេ ច្បាស់ជាត្រូវបង្ក្រាបជាក់ជាមិនខានឡើយ។ ស្របពេលដែលកម្លាំងកំពុងតែរវល់ ស្រាប់តែបុរសជាតៃកុងរថយន្តខាងលើ មានឱកាសល្អបានរត់គេចខ្លួនបាត់ទៅ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ