រាជធានីភ្នំពេញ៖ ក្រោយពីប្រមុខដឹកនាំរាជរដ្ឋាភិបាលអនុញាតិឲ្យផ្អាកជាបណ្តោះអាសន្ននូវជើងហោះហើរពីប្រទេសម៉ាឡេស៊ីនិងឥណ្ឌូនេស៊ី និងចាប់អនុវត្តចាប់ពីថ្ងៃទី ១ ខែសីហានេះតទៅ ក្រសួងសុខាភិបាលនៅថ្ងៃទី ២៥ កក្កដា ឆ្នាំ ២០២០…
រាជធានីភ្នំពេញ៖ ក្រោយពីប្រមុខដឹកនាំរាជរដ្ឋាភិបាលអនុញាតិឲ្យផ្អាកជាបណ្តោះអាសន្ននូវជើងហោះហើរពីប្រទេសម៉ាឡេស៊ីនិងឥណ្ឌូនេស៊ី និងចាប់អនុវត្តចាប់ពីថ្ងៃទី ១ ខែសីហានេះតទៅ ក្រសួងសុខាភិបាលនៅថ្ងៃទី ២៥ កក្កដា ឆ្នាំ ២០២០ បានបញ្ជាក់ថាមូលហេតុគឺដោយសារតែមួយរយៈពេលចុងក្រោយនេះគឺកម្ពុជារកឃើញករណីឆ្លងវីរុសកូវីដ ១៩ មានការកើនឡើងគួរឲ្យកត់សម្គាល់ចេញពីជើងហោះហើរនៃប្រទេសទាំងពីរ ។
ក្រសួងសុខាភិបាលបានបញ្ជាក់នៅក្នុងសេចក្តីប្រកាសព័ត៌មានថា «ក្នុងរយៈពេលចុងក្រោយចាប់ពីថ្ងៃទី ២០ ខែមិថុនា ឆ្នាំ២០២០ ដល់ថ្ងៃទី ២៥ ខែកក្កដា ឆ្នាំ ២០២០នេះ ក្រសួងសុខាភិបាល សង្កេតឃើញថា មានអ្នកដំណើរតាមជើងហោះហើរមកពីប្រទេសម៉ាឡេស៊ី និងឥណ្ឌូនេស៊ី បានរកឃើញករណីឆ្លងវីរុសកូវីដ ១៩ មានការកើនឡើងគួរឲ្យកត់សម្គាល់ ជាក់ស្តែងចំនួនអ្នកវិជ្ជមាននៃវីរុសកូវីដ ១៩ មាន ១០៨នាក់ ក្នុងនោះភាគច្រើនតាមជើងហោះហើរពីប្រទេសម៉ាឡេស៊ី (៥៥នាក់ លើ១០៨នាក់) និងឥណ្ឌូនេស៊ី លើអ្នកដំណើរសរុបចំនួន ២៣,៥៦៧នាក់» ។
ក្រសួងបានបន្តថា «ម្យ៉ាងវិញទៀត ចាប់ពីខែសីហា និងខែកញ្ញា តទៅ ប្រទេសយើងនឹងមានការឈប់សម្រាកក្នុងពិធីបុណ្យជាតិជាច្រើនថ្ងៃ ដែលតម្រូវឲ្យយើងបង្កើនការប្រុងប្រយ័ត្នខ្ពស់ក្នុងកិច្ចការពារការចម្លងវីរុសកូវីដ ១៩» ។ នេះជាការបញ្ជាក់របស់ក្រសួងសុខាភិបាល ដោយក្នុងនោះក្រសួងបន្តអំពាវនាវឲ្យពលរដ្ឋទាំងអស់ «ត្រូវបន្តអនុវត្តវិធានការពារខ្លួនជាចាំបាច់ ដើម្បីការពារការចម្លងវីរុសកូវីដ១៩ ពីបុគ្គលម្នាក់ទៅបុគ្គលម្នាក់ទៀត និងកុំឲ្យមានរលកទីពីរនៃការចម្លងវីរុសកូវីដ ១៩» ។
សូមបញ្ជាក់ថា គិតត្រឹមព្រឹកថ្ងៃទី ២៥ កក្កដា កម្ពុជារកឃើញករណីវិជ្ជមានកូវីដ ១៩ សរុប ២២៥នាក់ (ស្រី ៤៦ នាក់និងបុរស ១៧៩នាក់) ដែលក្នុងនោះព្យាបាលជាសះស្បើយបានចំនួន ១៤៣ នាក់ ឬស្មើនឹង ៦៣,៥៥% ធៀបនឹងចំនួនឆ្លងសរុបទូទាំងប្រទេស និងករណីស្លាប់ «គ្មាន» ៕ (កែសម្រួលដោយ ៖ ធីតា)
ចែករំលែកព័តមាននេះ