ស្ថានភាពកូវីដ១៩ នៅកម្ពុជាកាន់តែធ្ងន់ធ្ងរ បន្ទាប់ពីការបើកអោយមានការហោះហើរចូលប្រទេសកម្ពុជាដោយជំរុញអោយមន្ត្រីជំនាញព្រមានថា ការឆ្លងរាលដាលជាសហគមន៍មិនមែនមិនអាចកើតនៅកម្ពុជាឡើយ ហើយអំពាវនាវអោយប្រជាជនកម្ពុជាបង្កើនការប្រុងប្រយ័ត្ន ។
ក្រសួងសុខាភិបាលបានអោយដឹង នៅថ្ងៃសៅរ៍នេះថា បានរកឃើញអ្នកមានផ្ទុកមេរោគកូវីដ១៩ចំនួន២៣នាក់ទៀត ដោយក្នុងនោះមានជនជាតិខ្មែរចំនួន១៩នាក់ និងឥណ្ឌូនេស៊ីចំនួន៤នាក់ ។
តាមរយៈសេចក្តីប្រកាសព័ត៌មាន ចុះថ្ងៃទី២៥ ខែកក្កដានេះ ក្រសួងសុខាភិបាលនិយាយថា ក្នុង ចំណោម២៣នាក់នោះ គឺមាន៨នាក់បានធ្វើដំណើរតាមយន្តហោះមកពីឥណ្ឌូនេស៊ី ដោយឆ្លងកាត់ម៉ាឡេស៊ី និងមកដល់កម្ពុជា នៅថ្ងៃទី២៣ ខែកក្កដា ។
ចំណែក១៥នាក់ទៀត គឺធ្វើដំណើរមកពីរុស្សី និងអារ៉ាប់ប៊ីសាអូឌីតហើយមកដល់កម្ពុជាកាល ពីថ្ងៃទី១៩ ខែកក្កដា ។ ការរកឃើញថ្មីនេះ បានធ្វើអោយចំនួនអ្នកជំងឺកូវីដ១៩ ដែលបានរកឃើញសរុបមានចំនួន២២៥នាក់ ក្នុងនោះជាសះស្បើយចំនួន១៤៣នាក់ ។ ខែកក្កដានេះ គឺជាខែដែលមានការឆ្លងមេរោគកូវីដ១៩ច្រើនជាងគេបំផុត ដោយករណីទាំងអស់ គឺទាក់ទងនឹងការនាំចូលពីក្រៅប្រទេសមក ។
ខណៈដែលក្រសួងសុខាភិបាលបានព្យាយាមទប់ទល់អស់លទ្ធភាព តាមព្រលានយន្តហោះនោះ គេត្រូវតែទទួលស្គាល់ការពិតដែលថា ការទប់ទល់នឹងកូវីដ១៩ មានលក្ខណៈស្មុគ្រស្មាញ ហើយតម្រូវអោយមានការចូលរួមទាំងអស់គ្នានៅក្នុងយុទ្ឋនាការមួយនេះ ។ ប៉ុន្តែតើយើងទាំងអស់គ្នាប្រយ័ត្នគ្រប់គ្រាន់ហើយ ឬនៅ ? ចម្លើយនោះវាប្រហែលជាមិនទាន់គ្រប់គ្រាន់ទេនៅពេលដែលយើងសម្លឹងមើលសកម្មភាពនានានៅក្រុងភ្នំពេញ និងកន្លែងកម្សាន្តមួយចំនួន ។
ខណៈដែលភោជនីយដ្ឋានមួយចំនួនអនុវត្តបានល្អ តាមគោលការណ៍ណែនាំរបស់ក្រសួងសុខាភិបាលនោះ ភោជនីយដ្ឋាន ឬក៏កន្លែងលក់ដូរជាច្រើន មិនទាន់អនុវត្តបានល្អនៅឡើយ ។ ដូចជា អ្នកលក់ដូរ ឬអ្នកបម្រើសេវាកម្មមិនមានការពាក់ម៉ាស កន្លែងអង្គុយមិនរក្សាគម្លាតពីរម៉ែត្រ មិនមានការពិនិត្យកំដៅ ឬក៏ដាក់អាល់កុល ឬជែលសម្រាប់សម្លាប់មេរោគអោយភ្ញៀវប្រើប្រាស់ឡើយ ។
ចំណែកប្រជាជនជាច្រើនក៏មិនបានពាក់ម៉ាសហើយ មិនខ្វល់អ្វីដែលហៅថា គម្លាតសង្គមឡើយ ។ ឥរិយាបថទាំងអស់នេះបង្កជាហានិភ័យច្រើន ដែលអាចនាំអោយមានការឆ្លងរាលដាលជាសហគមន៍បាន បើសិនជាយើងទាំងអស់គ្នានៅតែភ្លេចខ្លួន ហើយមិនគោរពគោលការណ៍ពាក់ម៉ាស លាងដៃអោយស្អាត និងរក្សាគម្លាតសង្គម ។
កំណើននៃការរកឃើញអ្នកផ្ទុកមេរោគកូវីដ១៩ គួរតែអាចដាស់តឿនប្រជាជនកម្ពុជាទាំងអស់អោយបង្កើនការប្រយ័ត្ន ។ ជាមួយការចូលរួមរបស់ប្រជាជនទាំងអស់កម្ពុជានឹងមិនរងទុក្ខខ្លាំងដោយសារកូវីដ១៩ឡើយ ។ ប៉ុន្តែបើយើងប្រហែសនោះយើងនឹងមើលឃើញអនាគតមួយដែលយើងមិនចង់ឃើញ ។ នោះ គឺការរាលគួរអោយខ្លាចនៃកូវីដ១៩ ដែលឆ្លងដល់មនុស្សជិត១៦លាននាក់ និងសម្លាប់មនុស្សជាង៦៤ ម៉ឺននាក់ទូទាំងពិភពលោក ៕
ចែករំលែកព័តមាននេះ