រាជធានីភ្នំពេញ ៖ បុរសអប្រិយម្នាក់ ព្រោះតែខឹងប្រពន្ធមិនដើរសុំម្ហូបអាហារដែលគេហូបសល់នៅតាមសួនច្បារមកឲ្យហូប បានវាយដំប្រពន្ធរហូតយកដុំថ្មវាយដើមទ្រូងបណ្តាលឱ្យរងរបួសធ្ងន់ ហើយគេចខ្លួនបាត់ស្រមោល ។ ហេតុការណ៍នេះ កើតឡើងកាលពីវេលាម៉ោងប្រមាណ៧និង២០នាទីយប់ថ្ងៃទី២១ ខែកក្កដា ឆ្នាំ២០២០ នៅសួនច្បារខាងក្រោមស្ពានអាកាស៧មករា ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
ប្រភពព័ត៌មានពីស្ត្រីជាអាជីវករលក់ភេសជ្ជៈនៅសួនច្បារខាងលើ បានឲ្យដឹងថា មុនពេលកើតហេតុគេឃើញស្ត្រីរងគ្រោះជិះម៉ូតូកង់បីមកចុះនៅក្បែរនោះ ។ លុះមួយសន្ទុះក្រោយមក បុរសជាប្តីបានជិះម៉ូតូមួយគ្រឿងម៉ាកហុងដាគុប មិនចាំផ្លាកលេខមកតាមពីក្រោយ រួចចុះពីលើម៉ូតូដើរសំដៅទៅរកប្រពន្ធ ។ ទាំង២នាក់ប្តីប្រពន្ធបានឈ្លោះប្រកែកគ្នាយ៉ាងខ្លាំង ដែលនៅពេលនោះក៏មានមនុស្សម្នាជាច្រើនកំពុងអង្គុយលំហែកាយនៅសួនច្បារនោះដែរ ។
ក្នុងជម្លោះគ្នានេះ បុរសជាប្តីបានវាយប្រពន្ធរហូតដល់ទ្រមខ្លួនដើរលែងចង់រួច និងបានព្យាយាមអូសប្រពន្ធដើរសំដៅទៅរកម៉ូតូ រហូតប្រពន្ធអស់កម្លាំងខ្លាំងក៏ដួលដេកទៅនឹងដី ។ ខណៈនោះ ស្រាប់តែបុរសជាប្តីរើសដុំថ្មយកទៅវាយដើមទ្រូងនិងក្បាលប្រពន្ធបណ្តាលឲ្យរងរបួសយ៉ាងធ្ងន់ ។ បន្ទាប់មក បុរសជាប្តីក៏ឡើងជិះម៉ូតូគេចខ្លួនចេញពីកន្លែងកើតហេតុបាត់ស្រមោលទៅ ចំណែកអ្នកឃើញហេតុការណ៍ក៏បានរាយការណ៍ទៅសមត្ថកិច្ចមូលដ្ឋានឲ្យមកជួយធ្វើអន្តរាគមន៍ដែរ ។
ប្រភពដដែលបន្តថា កន្លងមកគេឧស្សាហ៍ឃើញប្តីប្រពន្ធនេះជិះម៉ូតូឌុបគ្នាមកសួនច្បារខាងលើជាញឹកញាប់ ដើម្បីឲ្យប្រពន្ធដើរសុំអាហារដែលនៅសល់ពីអ្នកមកលេងនៅទីនោះយកទៅឲ្យខ្លួនហូប ។ បុរសនេះ ក៏ធ្លាប់ប្រើអំពើហិង្សាទៅលើប្រពន្ធជាច្រើនដងមកហើយដែរ នៅពេលប្រពន្ធមិនបានដើរសុំអាហារពីគេយកមកឲ្យខ្លួនហូប តែក៏មិនដល់ថ្នាក់រងរបួសដូចយប់ថ្ងៃនេះទេ។
នៅយប់ថ្ងៃទី២១ ខែកក្កដានោះ ដោយសារតែប្រពន្ធមិនសូវស្រួលខ្លួន ទើបមិនបានដើរសុំអាហារពីគេក៏ធ្វើឲ្យកើតជាហិង្សាតែម្តង ។ ក្រោយពេលកើតហេតុ ស្ត្រីរងគ្រោះត្រូវបានរថយន្តរបស់គ្លីនិកមួយមកដឹកយកទៅព្យាបាល។
ពិតជាថោកទាបណាស់ សម្រាប់បុរសជាប្តីកំណាចនេះដែលសមត្ថកិច្ចគួរតែចាប់យកមកដុសក្អែលហើយ ៕
ចែករំលែកព័តមាននេះ