រាជធានីភ្នំពេញ ៖ បុរសម្នាក់មិនស្គាល់អត្តសញ្ញាណម្នាក់ត្រូវបានរថយន្តកុងតឺន័រ១គ្រឿងបុកនិងកិន បណ្ដាលឲ្យបែកខ្ទេចក្បាល និងខ្លួនបាត់បង់ជីវិតភ្លាមៗនៅនឹងកន្លែង ។ ពាក់ព័ន្ធនឹងករណីនេះ មានប្រភពចំនួន២បានអះអាងផ្សេងពីគ្នា ដោយអ្នកខ្លះថា បុរសរងគ្រោះម្នាក់នោះរត់ចូលឲ្យរថយន្តកុងតឺន័របុក…
រាជធានីភ្នំពេញ ៖ បុរសម្នាក់មិនស្គាល់អត្តសញ្ញាណម្នាក់ត្រូវបានរថយន្តកុងតឺន័រ១គ្រឿងបុកនិងកិន បណ្ដាលឲ្យបែកខ្ទេចក្បាល និងខ្លួនបាត់បង់ជីវិតភ្លាមៗនៅនឹងកន្លែង ។ ពាក់ព័ន្ធនឹងករណីនេះ មានប្រភពចំនួន២បានអះអាងផ្សេងពីគ្នា ដោយអ្នកខ្លះថា បុរសរងគ្រោះម្នាក់នោះរត់ចូលឲ្យរថយន្តកុងតឺន័របុក ទើបបណ្តាលឱ្យបាត់បង់ជីវិត និងអ្នកខ្លះទៀតបានអះអាងថា បុរសរងគ្រោះម្នាក់នោះលូកដៃសុំលុយអ្នកដំណើរតាមផ្លូវ ហើយបានជំពប់ជើងដួល ស្របពេលនោះរថយន្តកុងតឺន័រមកដល់ក៏បុកនិងកិនតែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង១០និង២០នាទីព្រឹកថ្ងៃទី២៤ ខែកក្កដា ឆ្នាំ២០២០ នៅលើផ្លូវជាតិលេច៤ ត្រង់ចំណុចច្រកចូលសាលារៀនសុវណ្ណភូមិ និជិតសាលាសង្កាត់ចោមចៅទី៣ ភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
បុរសរងគ្រោះមិនត្រូវបាននរណាម្នាក់បានស្គាល់ឈ្មោះនិងអាស័យដ្ឋាននោះទេ មានអាយុប្រហែល៣០ឆ្នាំ ហើយក៏មិនដឹងថាគាត់មានវិបត្តិអ្វីដែរ ទើបបានជារត់ចូលឲ្យរថយន្តបុកនិងកិនរហូតបាត់បង់ជីវិតបែបនេះ ប៉ុន្តែគេក៏សង្ស័យថា បុរសរងគ្រោះមានសតិមិនគ្រប់ផងដែរ។ ម្យ៉ាងទៀត សពជនរងគ្រោះត្រូវបានរថយន្តបុកនិងកិន មើលលែងស្គាល់ទៅហើយ ចំណែករថយន្តកុងតឺន័រ ពណ៍ស ពាក់ស្លាកលេខ ភ្នំពេញ 3E-8201 អ្នកបើកបរមិនទាន់ត្រូវបានស្គាល់ឈ្មោះនៅឡើយ ហើយត្រូវនគរបាលឃាត់ខ្លួន។
តាមប្រភពពីអ្នកឃើញហេតុការណ៍ម្នាក់បាននិយាយថា នៅមុនពេលកើតហេតុ គាត់បានឃើញបុរសរងគ្រោះអង្គុយផឹកស្រាបៀរ ២កំប៉ុងនិងក្លែមស្វាយខ្ចីនៅលើចិញ្ចើមផ្លូវ តែម្នាក់ឯងនៅត្រង់ចំណុចកើតហេតុខាងលើ ហើយក៏គ្មាននរណាបានចាប់អារម្មណ៍ថាមានរឿងអ្វីកើតឡើងចំពោះបុរសរងគ្រោះឡើយ ។
តាមប្រភពដដែលបានបន្តថា លុះក្រោយមក ខណៈពេលឃើញរថយន្តកុងតឺន័រ១គ្រឿងបើកមកដល់ ស្រាប់តែបុរសរងគ្រោះនោះក្រោកឡើង រួចស្ទុះរត់ចូលទៅក្រោមកង់រថយន្តហើយក៏ត្រូវរថយន្តបុកនិងកិន បណ្តាលឱ្យបាត់បង់ជីវិតបែបនេះតែម្ដង ។ ប៉ុន្តែពុំមាននរណាបានដឹងថាគាត់មានវិបត្តអ្វីនោះទេ ទើបសម្រេចចិត្តធ្វើបែបនេះ ហើយក៏មិនដឹងថាមា បុរសរងគ្រោះមានផ្ទះសម្បែងនៅឯណាដែរ។
ដោយឡែកប្រភពផ្សេងមួយទៀតបានឲ្យដឹងថា នៅមុនពេលកើតហេតុ គេក៏បានឃើញបុរសរងគ្រោះអង្គុយផឹកស្រាបៀរ ក្លែមស្វាយខ្ចីនៅលើចិញ្ចើមផ្លូវនោះដែរ ហើយក្រោយមកបុរសនេះបានក្រោកឈរសុំលុយអ្នកដំណើរតាមផ្លូវ ប៉ុន្តែជាអកុសលក៏បានជំពប់ជើងដួល ហើយស្របពេលនោះរថយន្តកុងតឺន័រមកដល់ ក៏បុកនិងកិនខ្ទេចក្បាលខ្ទេចនិងខ្លួនបណ្តាលឱ្យបាត់បង់ជីវិតបែបនេះតែម្តង ។
តាមប្រភពដដែលបានសង្ស័យថា បុរសរងគ្រោះខាងលើមានសតិមិនសូវល្អ ហើយកន្លងមក តែងតែឃើញបុរសរងគ្រោះម្នាក់នេះអង្គុយផឹកស្រាតាមចិញ្ចើមផ្លូវស្ទើររាល់ថ្ងៃថែមទៀតផង។
បន្ទាប់ពីកើតហេតុ រថយន្តកុងតឺន័រមិនបានឈប់ស្ងៀមនោះទេ គឺបានបើកគេចសំដៅឡើងទៅផ្លូវជាតិលេខ៣ ប៉ុន្តែរត់មិនរួចនោះទេត្រូវបាននគរបាលប៉ុស្តិ៍ចោមចៅទី៣ដេញតាមឃាត់បានទាំងរថយន្តនិងអ្នកបើកបរ រួចនាំទៅកាន់ប៉ុស្តិ៍នគរបាល ដើម្បីបញ្ចូនទៅកាន់ការិយាល័យចរាចរណ៍ជើងគោកនៃស្នងការនគរបាលរាជធានីភ្នំពេញចាត់ការបន្តតាមនីតិវិធី៕
ចែករំលែកព័តមាននេះ