ខេត្តកំពង់ឆ្នាំង ៖ លោកអ៊ុយ សំអាត ប្រធាននាយកដ្ឋានគ្រប់គ្រងគ្រោះមហន្តរាយកាកបាទក្រហមកម្ពុជា និងជាតំណាងដ៏ខ្ពង់ខ្ពស់របស់សម្តេចគតិព្រឹត្តបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា កាលពីល្ងាចថ្ងៃទី១៦ មករា ២០១៥ បាននាំយកអំណោយជាថវិកា និងគ្រឿងឧបភោគ បរិភោគរបស់កាកបាទក្រហមកម្ពុជា ទៅចែកជូនជនរងគ្រោះ២គ្រួសារដែលមានកូន និងប្តីស្លាប់ដោយសារដីភ្នំបាក់សង្តត់ និងលោកយាយក្រីក្រ លោកតាទុរគត៌២គ្រួសារទៀតនៅក្នុងឃុំពង្រ ស្រុករលាប្អៀរ។
អំណោយដែលបានចែកជូននោះមាន ១-ក្រុមគ្រួសារឈ្មោះភុន សុផែន អាយុ២៣ឆ្នាំ នៅលីវជាព្រូបើកបរអេសស្កាវ៉ាត់ទ័រ រស់នៅក្នុងខ្វិត ឃុំពង្រ ២-ក្រុមគ្រួសារឈ្មោះយន់ សៅនឿន អាយុ៣១ឆ្នាំ ជាអ្នកបើកគ្រឿងចក្រអេសស្កាវ៉ាទ័រ មានប្រពន្ធ និងកូនតូច៣នាក់ រស់នៅភូមិស្រាំងខ្ពស់ ឃុំពង្រ ទាំង២នាក់ បានស្លាប់ពេលបើកអេស្កវ៉ាទ័រកាយដីភ្នំត្រូវដីភ្នំបាក់សង្កត់។ អំណោយដែលបានចែកក្នុងពេលនោះមានមួយគ្រួសារៗទទួលបានថវិកា២លានរៀល អង្ករ១០០គីឡូក្រាម, ទឹកក្រូច៥កេស, ទឹកបរិសុទ្ធ៥កេស, មី៥កេស, ត្រីខ១កេស និងខីត៣កញ្ចប់ (ក្នុងនោះមានមុង ភួយ និងសម្លៀកបំពាក់)។
ដោយឡែកលោកយាយ និងលោកតាក្រីក្រ២គ្រួសារទៀតមាន ១-លោកយាយឈ្មោះជួប លុត អាយុ៨២ឆ្នាំ ចាស់ជរារកស៊ីវាយថ្មលក់ចិញ្ចឹមជីវិត មានកូន៣នាក់ ម្នាក់ជាជនពិការគមខ្នង រស់នៅភូមិ ស្រាំងខ្ពស់ ឃុំពង្រ និង២-លោកតាឈ្មោះឡៅ ហៀង អាយុ៩៦ឆ្នាំ ជាជនទុរគត៌គ្មានកូនចៅរស់នៅតែ ម្នាក់ឯងក្នុងភូមិស្រាងខ្ពស់ បានជិតខាងជួយចិញ្ចឹម។ លោកយាយទទួលបានថវិកា១៥ម៉ឺនរៀល ចំណែកលោកតាទទួលបានថវិកា២៣ម៉ឺនរៀល ក្រៅពីនោះម្នាក់ៗទទួលបានអង្ករ៥០គីឡូក្រាម, មី២កេស, ត្រីខ១កេស, ទឹកបរិសុទ្ធ២កេស និងខីត២កញ្ចប់ដូចៗគ្នាផងដែរ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ