រាជធានីភ្នំពេញ ៖ លោក សុខ អាងអគ្គលេខាធិការសហព័ន្ធកីឡាគុនដាវកម្ពុជាបានប្រាប់ឱ្យដឹងកាលពីពេលថ្មីៗនេះថា សហព័ន្ធកីឡាគុនដាវអន្តរជាតិបានប្រកាសជាផ្លូវការពីសេចក្ដីសម្រេចរបស់គណៈកម្មាធិការប្រតិបត្តិក្នុងកិច្ចប្រជុំមួយដឹកនាំដោយលោក អាលី ហ្សាអូស្មាណូវ ប្រធានសហព័ន្ធកីឡាគុនដាវអន្តរជាតិថា នឹងលុបចោលថ្លៃសមាជិភាពសម្រាប់ឆ្នាំ២០២០…
រាជធានីភ្នំពេញ ៖ លោក សុខ អាងអគ្គលេខាធិការសហព័ន្ធកីឡាគុនដាវកម្ពុជាបានប្រាប់ឱ្យដឹងកាលពីពេលថ្មីៗនេះថា សហព័ន្ធកីឡាគុនដាវអន្តរជាតិបានប្រកាសជាផ្លូវការពីសេចក្ដីសម្រេចរបស់គណៈកម្មាធិការប្រតិបត្តិក្នុងកិច្ចប្រជុំមួយដឹកនាំដោយលោក អាលី ហ្សាអូស្មាណូវ ប្រធានសហព័ន្ធកីឡាគុនដាវអន្តរជាតិថា នឹងលុបចោលថ្លៃសមាជិភាពសម្រាប់ឆ្នាំ២០២០ ។ ចំពោះអ្នកដែលបានបង់រួចហើយនឹងធ្វើការទូទាត់វិញនៅឆ្នាំ២០២១ ឯការប្រកួតនានាជាច្រើនទៀតក៏ត្រូវបានលុបចោលផងដែរ។
លោក សុខ អាង បានបញ្ជាក់ឱ្យដឹងថា បច្ចុប្បន្ន ពិភពលោកកំពុងតែប្រយុទ្ធប្រឆាំងជាមួយជំងឺឆ្លងរាតត្បាតកូវីដ-១៩ធ្វើឱ្យប៉ះពាល់ដល់ខឿនសេដ្ឋកិច្ចជាសាកល សុខុមាលភាពពិភពលោក និងកម្លាំងចិត្តគ្រប់គ្នាថែមទៀត ។
ហេតុដូចនេះហើយ កីឡាករ កីឡាការិនី ព្រមទាំងសហព័ន្ធកីឡាជាតិទាំងអស់ ត្រូវបង្ខំចិត្តកាត់បន្ថយនិងបញ្ឈប់សកម្មភាពស្ទើរតែទាំងអស់ ក្នុងន័យសាមគ្គីភាពនិងធ្វើការរួបរួមជាពិសេស បង្វែរទៅជួយដល់គ្រួសារកីឡាគុនដាវរបស់ពួកយើងក្នុងដំណាក់កាលដ៏លំបាកនេះ។ ទន្ទឹមជាមួយគ្នានេះដែរ សមាជិកគណៈកម្មាធិការប្រតិបត្តិទាំងអស់បានធ្វើសេចក្ដីសម្រេចដោយឥតព្រាងទុកក្នុងការជួយដល់ក្រុមគ្រួសារកីឡាមួយនេះ។
សេចក្ដីសម្រេចរបស់គណៈកម្មាធិការប្រតិបត្តិអន្តរជាតិរួមមាន ការលុបចោលថ្លៃសមាជិកភាពសម្រាប់ឆ្នាំ២០២០ ចំពោះអ្នកដែលបានបង់រួចហើយនឹងធ្វើការទូទាត់សងវិញនៅឆ្នាំ២០២១។ ផ្ដល់ជូននូវទឹកប្រាក់ចំនួន៤០០០ហ្វ្រង់ស្វីសជាពិសេសទៅដល់គ្រប់សហព័ន្ធកីឡាគុនដាវជាតិនានាជាសមាជិក និងសហព័ន្ធប្រចាំទ្វីបនីមួយៗ ផ្ដល់ថវិកាចំនួន១០០០យូរូ៉ដល់អាជ្ញាកណ្ដាលដែលបានចាត់ចែងដោយសហព័ន្ធអន្តរជាតិក្នុងឆ្នាំ២០២០-២០២១ព្រមទាំងលុបចោលថ្លៃសេវារៀបចំការប្រកួតទាំងអស់ចាប់ពីខែមីនា ឆ្នាំ២០២១ និងថវិកាដែលត្រៀមផ្ដល់ជូនកីឡាករ-កីឡាការិនីម្នាក់ៗសម្រាប់ចូលរួមប្រកួតក្របខណ្ឌយុវជនពិភពលោកឆ្នាំ២០២០ត្រូវធ្វើការបង្វែរទុកសម្រាប់ការប្រកួតកម្រិតទ្វីបឆ្នាំ២០២១វិញ។
ស្របពេលដែលគណៈកម្មាធិការប្រតិបត្តិអន្តរជាតិសម្រេចលុបចោលការប្រកួតជើងឯកយុវជនពិភពលោកនេះផងដែរ ក៏មានការផ្ដល់យោបល់ពីគណៈកម្មការវេជ្ជសាស្ត្រ ក្រុមប្រឹក្សាកីឡាគុនដាវវ័យចាស់ និងគណៈកម្មការអត្តពលិកថា ការលុបចោលនេះមិនត្រឹមតែការប្រកួតកីឡាគុនដាវជើងឯកយុវជនពិភពលោកឆ្នាំ២០២០នោះទេ ក៏មានការលុបចោលការប្រកួតកីឡាគុនដាវវ័យចាស់ឆ្នាំ២០២០ ការប្រកួតជើងឯកយុវជនពិភពលោកឆ្នាំ២០២២ និងការប្រកួតជើងឯកវ័យចាស់ឆ្នាំ២០២២ផងដែរ ៕
ចែករំលែកព័តមាននេះ