រាជធានីភ្នំពេញ ៖ ក្រសួងរៀបចំដែនដីនគរូបនីយកម្ម និងសំណង់ នាថ្ងៃទី២២ ខែកក្កដា ឆ្នាំ២០២០ បានដឹកនាំកិច្ចប្រជុំអន្តរក្រសួង ស្តីពីអំពីការងារចុះបញ្ជីដីរដ្ឋ ការចុះបញ្ជីដីឯកជនរបស់ប្រជាពលរដ្ឋ ចុះបញ្ជីដីសហគមន៍ជនជាតិដើមភាគតិច ការដោះស្រាយវិវាទដីធ្លី ការកាត់ឆ្វៀលដី និងការរៀបចំផែនការប្រើប្រាស់ដី ខេត្តមណ្ឌលគិរី ។
យោងតាមរបាយការណ៍មកទល់ពេលនេះ ក្រសួងបានចេញបណ្ណកម្មសិទ្ធលើដីរដ្ឋបានចំនួន២០០៨ស្មើនឹង៨៧ម៉ឺនហិកតា ដែលក្នុងនោះដីសម្បទានសេដ្ឋកិច្ច មាន២០១១បណ្ណ ស្មើនឹង ៧៤ម៉ឺនហិកតា និងដីរដ្ឋផ្សេងៗទៀតបាន១០៧បណ្ណស្មើនឹង ១៣ ម៉ឺនហិកតា ។
ដោយឡែកនៅខេត្តមណ្ឌលគិរី ក្រសួងបានចេញបណ្ណកម្មសិទ្ធ លើដីរដ្ឋបាន ចំនួន ១៦៧ បណ្ណទំហំប្រមាណ ១៥ ម៉ឺនហិកតា ។ មកទល់ខែកក្កដាឆ្នាំ២០២០ ការងារចុះបញ្ជីដីធ្លីនៅខេត្តមណ្ឌលគិរី ទទួលបានលទ្ធផលដូចជា ៤៦ ភូមិត្រូវបានចុះបញ្ជី និងចេញបណ្ណកម្មសិទ្ធរួចរាល់លើផ្ទៃដីទំហំ១៩១ពាន់១៨ហិកតាស្មើនឹង២៤២១៨បណ្ណក្នុងនោះការចុះបញ្ជីដីជូនប្រជាពលរដ្ឋលើផ្ទៃដីទំហំប្រមាណ៣៩២២៦ហិកតាស្មើនឹង២៣៧៥៥បណ្ណ ចុះបញ្ជីដីរដ្ឋទំហំប្រមាណ១៤៥ពាន់៦៣៣ហិកតាស្មើនឹង១៦៧បណ្ណ ដីសហគមន៍ជនជាតិដើមភាគតិច ចុះបញ្ជីបាន ៧ សហគមន៍លើផ្ទៃដីទំហំ ៦១៥៦ ហិកតា ស្មើនឹង២៧៨បណ្ណ និងមាន១០ភូមិកំពុងដំណើរការចុះបញ្ជីដីធ្លីមានលក្ខណះជាប្រព័ន្ធ ចំពោះដីសហគមន៍ជនជាតិដើមភាគតិចចំនួន៦សហគមន៍ដែលកំពុងដំណើរការនិងបានបញ្ចប់ការបិទផ្សាយជាសាធារណះរួចរាល់។
ការដោះស្រាយវិវាទដីធ្លី គឺដោះស្រាយបាន២២ករណី និងកំពុងបន្តដោះស្រាយចំនួន៣៨ករណី ។ ក្រសួងបានបង្កើតគណៈកម្មការគាំទ្រការចុះបញ្ជីដីរដ្ឋ ដីឯកជនរបស់ប្រជាពលរដ្ឋ ដីសហគមន៍ជនជាតិដើមភាគតិច ដោះស្រាយវិវាទដីធ្លី និងរៀបចំផែនការប្រើប្រាស់ដីនៅខេត្តមណ្ឌលគិរីដែលមានសមាសភាពសរុប៣១៣រូបចែកចេញជា៤អនុគណះកម្មការនិងក្រុមការងារចុះបញ្ជីដីមាន១២ក្រុមស្មើនឹង២២៥រូប ។
ក្រសួងរៀបចំដែនដីនគរូបនីយកម្ម និងសំណង់បានសហការជាមួយក្រសួងកសិកម្មរុក្ខាប្រមាញ់ និងនេសាទ ក្រសួងបរិស្ថាន អាជ្ញាធរជាតិដោះស្រាយទំនាស់ដីធ្លី និងអាជ្ញាធរខេត្តមណ្ឌលគិរី ចាត់ចែងពន្លឿនការងារចុះបញ្ជីដីរដ្ឋ ការដោះស្រាយវិវាទដីធ្លី និងការរៀបចំផែនការប្រើប្រាស់ដីនៅខេត្តមណ្ឌលគិរី ។ គណៈកម្មការនេះនឹងចុះបំពេញការងារចាប់ពីថ្ងៃទី២៨ ខែកក្កដា ឆ្នាំ២០២០ ដើម្បីជំរុញពន្លឿនការងារចុះបញ្ជីដីរដ្ឋ ចុះបញ្ជីដីឯកជនរបស់ប្រជាពលរដ្ឋ ចុះបញ្ជីដីសហគមន៍ជនជាតិដើមភាគតិច ដោះស្រាយវិវាទដីធ្លី និងរៀបចំផែនការប្រើប្រាស់ដីនៅខេត្តមណ្ឌលគិរីដែលនៅសេសសល់ក្នុងភូមិទាំង៤៦ដែលបានចុះបញ្ជីរួច ភូមិចំនួន១០ដែលកំពុងដំណើរការចុះបញ្ជីនិងដំណើរការចុះបញ្ជីក្នុងភូមិចំនួន៣៦ផ្សេងទៀតផងដែរ។
គួរបញ្ជាក់ផងដែរថា លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ បានដឹកនាំកិច្ចប្រជុំអន្តរក្រសួងនេះ ហើយក្នុងកិច្ចប្រជុំនេះ ក៏មានការអញ្ជើញចូលរួមពី លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និង លោក សាយ សំអាល់ រដ្ឋមន្ត្រីក្រសួងបរិស្ថានផងដែរ៕
ចែករំលែកព័តមាននេះ