រាជធានីភ្នំពេញ ៖ យុវសិស្សម្នាក់ក្នុងចំណោមគ្នា២នាក់ត្រូវក្រុមជនស្ទាវ១ក្រុមជិះម៉ូតូដេញតាមវាយបណ្តាលឱ្យបែកក្បាល ក្នុងពេលកំពុងជិះម៉ូតូចេញពីសាលារៀនឆ្ពោះទៅផ្ទះ។ ហេតុការណ៍នោះកើតឡើងកាលពីវេលាម៉ោង៧យប់ ថ្ងៃទី២៨ ខែតុលា ឆ្នាំ២០១០ នៅជិតសាលាភាសាឯកជនមួយ ស្ថិតក្នុងភូមិប៉ប្រកខាងជើង សង្កាត់កាកាប ខណ្ឌដង្កោ រាជធានីភ្នំពេញ។ យុវជនរងគ្រោះឈ្មោះស៊ឹម កក្កដា អាយុ២០ឆ្នាំ រងរបួសបែកក្បាលធ្ងន់កំពុងសំរាកព្យាបាលនៅមន្ទីរពេទ្យ។ គេមានទីលំនៅក្នុងភូមិដីថ្មី សង្កាត់ភ្នំពេញថ្មី ខណ្ឌសែនសុខ។ ចំណែកឯក្រុមជនស្ទាវមានគ្នា៨នាក់ជិះម៉ូតូ៤គ្រឿងប្រដាប់ដោយដុំថ្ម និងខ្សែក្រវាត់ក្បាលដែក។ ក្រោយពីវាយជនរងគ្រោះរួចមកពួកនោះជិះម៉ូតូគេចខ្លួនបាត់អស់។
តាមប្រភពព័ត៌មានឱ្យដឹងថា ពេលយុវសិស្សរងគ្រោះចេញពីរៀនជិះម៉ូតូជាមួយមិត្តភក្តិម្នាក់ទៀតឆ្ពោះទៅផ្ទះបានបន្តិច ស្រាប់តែក្រុមជនស្ទាវទាំង៨នាក់នោះជិះម៉ូតូដេញតាមស្ទាក់វាយតែម្តង។ ក្នុងខណៈនោះមិត្តិភក្តិរបស់ជនរងគ្រោះរត់រួច ហើយចូលទៅក្នុងសាលាវិញស្រែកឱ្យគេជួយ ចំណែកឯជនរងគ្រោះរត់មិនរួចត្រូវគេវាយបែកក្បាលតែម្តង។ ពេលនោះបង្កឱ្យមានការភ្ញាក់ផ្អើលយ៉ាងខ្លាំង ហើយក្រុមជនដៃដល់នាំគ្នាជិះម៉ូតូគេចខ្លួនបាត់ សមត្ថកិច្ចទៅមិនទាន់ទេ។ ជនរងគ្រោះត្រូវគេនាំទៅសង្គ្រោះនៅមន្ទីរពហុព្យាបាលចាន់ វ៉ែន ដែលនៅជិតនោះ ហើយក្រោយមកទើបបញ្ជូនបន្តទៅព្យាបាលនៅពេទ្យមួយទៀត។ សមត្ថកិច្ចនិយាយថា តាមការសន្និដ្ឋានរឿងនោះអាចកើតចេញពីរឿងគំនុំអ្វីមួយ ឬអាចមកពីរឿងដណ្តើមស្រីគ្នា។ ពេលនេះសមត្ថកិច្ចជំនាញកំពុងស្រាវជ្រាវរកមូលហេតុ និងតាមរកចាប់ខ្លួនក្រុមជនដៃដល់៕
ចែករំលែកព័តមាននេះ