ធ្វើសកម្មភាពនៅសៀមរាប លុះ២ថ្ងៃក្រោយជាប់អន្ទាក់នៅក្រចេះ
- សៀមរាប
ខេត្តសៀមរាប ៖ អធិការដ្ឋាននគរបាលក្រុងសៀមរាប ដោយមានការចង្អុល បង្ហាញពីលោកស្នងការ ស្នងការរងទទួលផែនការងារព្រហ្មទណ្ឌ ដឹកនាំកម្លាំងដោយលោកវរសេនីយ៍ ឯក ណុប សារ៉ាក់…
ខេត្តសៀមរាប ៖ អធិការដ្ឋាននគរបាលក្រុងសៀមរាប ដោយមានការចង្អុល បង្ហាញពីលោកស្នងការ ស្នងការរងទទួលផែនការងារព្រហ្មទណ្ឌ ដឹកនាំកម្លាំងដោយលោកវរសេនីយ៍ ឯក ណុប សារ៉ាក់ អធិការ នៃអធិការដ្ឋាននគរបាលក្រុងសៀមរាប បានចុះសហការជាមួយកម្លាំងអធិការដ្ឋានស្រុកស្នួលនៃស្នងការដ្ឋាននគរបាលខេត្តក្រចេះ តាមប្រម៉ាញ់ជនសង្ស័យម្នាក់ដែលធ្វើសកម្មលួចម៉ូតូមួយគ្រឿងក្នុងក្រុងសៀមរាបបានសម្រេច រួចទៅពួនសង្ងំនៅស្រុកកំណើតឯខេត្តក្រចេះ រហូតឈានដល់ធ្វើការឃាត់បានជនសង្ស័យប្រគល់មកឱ្យប៉ូលិសខេត្តសៀមរាបវិញដើម្បីចាត់ការបន្តតាមនីតិវិធី ។
បើតាមការបញ្ជាក់ពីលោកវរសេនីយ៍ ឯក ណុប សារ៉ាក់ អធិការនៃអធិការដ្ឋាននគរបាលក្រុងសៀមរាប បានប្រាប់ថា ជនសង្ស័យឈ្មោះ ឌឿន ម៉ាប់ ហៅសុភ័ក្រ ភេទប្រុស អាយុ២៣ឆ្នាំ មុខរបរមិនពិតប្រាកដ រស់នៅភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប មានស្រុកកំណើតរស់នៅភូមិដារ ឃុំដារ ស្រុកចិត្របុរី ខេត្តក្រចេះ ពាក់ព័ន្ធនឹងករណីអំពើលួចម៉ូតូពីខេត្តសៀមរាប ព្រមទាំងមានប្រើប្រាស់សារធាតុញៀនផង ។ ចំណែកជនរងគ្រោះជនរងគ្រោះឈ្មោះកែវ ចិត្រា ភេទប្រុស អាយុ១៧ឆ្នាំ ជាសិស្ស រស់នៅភូមិត្រពាំងត្រែង សង្កាត់សាលាកំរើក ក្រុងសៀមរាប ខេត្តសៀមរាប ជាម្ចាស់ម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០១៦ ពាក់ផ្លាកលេខ ១S- ៧៧៧០ ។
លោកបានបញ្ជាក់ឱ្យដឹងថា មុនពេលកើតហេតុ កាលពីវេលាម៉ោង៨ព្រឹកថ្ងៃទី១៥ ខែកក្កដា ឆ្នាំ២០២០ ស្ថិតនៅមុខស្នាក់ការគណបក្សប្រជាជន ក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប ខេត្តសៀមរាប ជនរងគ្រោះបានជិះម៉ូតូមួយគ្រឿងខាងលើទៅអង្គុយចាំមិត្តភក្តិ ដោយទុកម៉ូតូនៅក្រោយខ្នង មានទាំងសោនៅជាប់នឹងម៉ូតូនោះផងដែរ លុះពេលជនរងគ្រោះងាកមកក្រោយខ្នងរកមើលម៉ូតូដែលចតទុកនោះ ស្រាប់តែបាត់មិនឃើញ ហើយក៏មកដាក់ពាក្យបណ្តឹងនៅប៉ូលិសមូលដ្ឋានឱ្យជួយអន្តរាគមន៍តែម្តង ។
លោកបានបញ្ជាក់បន្ថែមទៀតថា រហូតដល់ថ្ងៃទី១៧ ខែកក្កដា ឆ្នាំ២០២០ អធិការដ្ឋាននគរបាលស្រុកស្នួល នៃស្នងការដ្ឋាននគរបាលខេត្តក្រចេះ បានប្រាប់មកអធិការនគរបាលក្រុងឱ្យដឹងថា កម្លាំងជំនាញនៃអធិការដ្ឋាននគរបាលស្រុកស្នួលបានចាប់ឃាត់ខ្លួនជនសង្ស័យម្នាក់បានហើយ ដោយជនសង្ស័យជិះម៉ូតូមកលក់ឱ្យគេក្នុងតំលៃមិនប្រក្រតីគួរឱ្យសង្ស័យ ទើបសមត្ថកិច្ចនៅទីនោះបានឃាត់ជនសង្ស័យយកមកកាន់អធិការដ្ឋាននគរបាលស្រុកស្នួលដើម្បីសួរនាំ រហូតដឹងរឿងថា បានលួចម៉ូតូមកពីខេត្តសៀមរាប ទើបកម្លាំងនគរបាលជំនាញ ស្រុកស្នួលទូរស័ព្ទហៅខាងកម្លាំងនគរបាលជំនាញខេត្តសៀមរាបឱ្យចុះទៅទទួលយកទាំងជនសង្ស័យនិងម៉ូតូនៅថ្ងៃទី១៨ ខែកក្កដា ឆ្នាំ២០២០។
ក្រោយពីបានសួរនាំរួចមក ជនសង្ស័យបានឆ្លើយសារភាពប្រាប់សមត្ថកិច្ចថា ខ្លួនបានធ្វើសកម្មភាព លួចម៉ូតូដូចមានភិនភាគខាងលើនៅចំណុចសួនតាមមាត់ស្ទឹង ក្នុងក្រុងសៀមរាប ខេត្តសៀមរាប កាលពីថ្ងៃទី១៥ ខែកក្កដា ឆ្នាំ២០២០ វេលាម៉ោងប្រហែល៧និង ៣០នាទីព្រឹក ពិតប្រាកដមែន ហើយជនសង្ស័យបានសារភាពទៀតថា ខ្លួនក៏មានប្រើប្រាស់នូវថ្នាំញៀនផងដែរ ។
បច្ចុប្បន្ន ជនសង្ស័យ ត្រូវបានកម្លាំងជំនាញផ្នែកនគរបាលព្រហ្មទណ្ឌធ្វើការកសាងសំណុំរឿងបញ្ជូនទៅសាលាដំបូងខេត្ត ដើម្បីធ្វើការផ្ដន្ទាតាមផ្លូវច្បាប់ ។ ចំណែកម៉ូតូមួយគ្រឿងដែលដកហូតបានពីជនសង្ស័យ ត្រូវបានកម្លាំងជំនាញប្រគល់ជូនជនរងគ្រោះយកទៅគ្រប់គ្រងថែរក្សានិងប្រើប្រាស់វិញហើយ៕ (កែសម្រួលដោយ ៖ ធីតា)
ចែករំលែកព័តមាននេះ