រាជធានីភ្នំពេញ ៖ លោក ឌុច សុខសារិន ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី២១ កក្កដា ឆ្នាំ២០២០ បានប្រកាសសាលក្រមផ្តន្ទាទោសលើសំណុំរឿង(ហិង្សាដោយចេតនាមានស្ថានទម្ងន់ទោស)…
រាជធានីភ្នំពេញ ៖ លោក ឌុច សុខសារិន ចៅក្រមជំនុំជម្រះសាលាដំបូងរាជធានីភ្នំពេញ កាលពីព្រឹកថ្ងៃទី២១ កក្កដា ឆ្នាំ២០២០ បានប្រកាសសាលក្រមផ្តន្ទាទោសលើសំណុំរឿង(ហិង្សាដោយចេតនាមានស្ថានទម្ងន់ទោស) លើករណីវាយកាបកាប់គ្នាបណ្តាលមរណភាពជនរងគ្រោះ ដែលមានជនជាប់ចោទនៅក្នុងឃុំចំនួន៥នាក់ ។ ទោសគឺជនដៃដល់ជាប់១០ឆ្នាំ រីឯ៣នាក់ទៀត ក្នុងម្នាក់ជាប់៣ឆ្នាំ ហើយម្នាក់ទៀតឱ្យយរួចផុតពីបទចោទប្រកាន់ ។
សាលក្រមផ្តន្ទទោស លើជនជាប់ចោទឈ្មោះ ហង់ សុខេន ហៅភ្លើង ភេទប្រុស អាយុ២៦ឆ្នាំ ដាក់ពន្ធនាគារកំណត់១០ឆ្នាំ (ជាជនដៃដល់) ។ ឈ្មោះ មិ ម៉េងហុង ភេទប្រុស អាយុ១៨ឆ្នាំ ។ ២-ឈ្មោះ ហៀង យូលាង ភេទប្រុស អាយុ១៩ឆ្នាំ ។៣-ឈ្មោះ លាភ សុខរាជ ភេទប្រុស អាយុ២០ឆ្នាំ ។ ទាំង៣នាក់នេះដាក់ពន្ធនាគារកំណត់ក្នុងម្នាក់ ៣ឆ្នាំ ។
ចំណែកឈ្មោះ សូ ពេជ្រ ភេទប្រុស អាយុ១៨ឆ្នាំ ត្រូវបានលើកលែងទោសឲ្យរួចផុតពីការចោទប្រកាន់ ។សាលក្រមបានបើកផ្លូវទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ ។
សូមរំលឹកថា កាលពីថ្ងៃទី២៦ ខែធ្នូឆ្នាំ២០១៩ នៅក្នុងអធិការដ្ឋាននគរបាលខណ្ឌសែនសុខ រាជធានីភ្នំពេញ មានធ្វើសន្និសិទបង្ហាញមុខក្រុមជនដៃដល់ចំនួន៨នាក់ ក្រោយពីបានធ្វើសកម្មភាពវាយកាប់ចាក់គ្នា នៅក្លិបកម្ដាន្ត ហ្គោលឡាញ បណ្ដាលឲ្យស្លាប់យុវជនម្នាក់ ។
ក្នុងពិធីបង្ហាញមុខជនសង្ស័យទាំង៨នាក់
១.ឈ្មោះ សួន សារិទ្ធ ភេទប្រុស អាយុ ២៣ឆ្នាំ
២.ឈ្មោះ ប៉ែន សំអាត ភេទប្រុស អាយុ២៣ឆ្នាំ
៣.ឈ្មោះ ឆន គឹមថុង ភេទប្រុស អាយុ២៧ឆ្នាំ
៤.ឈ្មោះ គង់ ឈិនលី
៥.ឈ្មោះ លាភ សុខរាជ
៦.ឈ្មោះ សូ ពេជ្រ
៧.ឈ្មោះ មិ ម៉េងហុង
៨.ឈ្មោះ ហង់ សុខេន ហៅភ្លើង ភេទប្រុស អាយុ២៧ឆ្នាំ
នឹងដកហូតម៉ូតូចំនួន ៥គ្រឿង ។
ចំណែកជនរងគ្រោះស្លាប់បាត់បង់ជីវិតមានឈ្មោះ គីម ឈុនលី ភេទប្រុសអាយុ២៩ ឆ្នាំ មុខរបរអ្នកដឹកឥវាន់តាមអនឡាញ ស្នាក់នៅភូមិទ្រា៤ សង្កាត់ស្ទឹងមានជ័យទី៣ ខណ្ឌមានជ័យ មានស្រុកកំណើតភូមិព្រែកក្របៅ២ ឃុំព្រែកអំពិល ស្រុកខ្សាច់កណ្ដាល ខេត្តកណ្ដាល ។
សូមរំលឹកទៀតថា កាលពីវេលាម៉ោង១២ និង៤០ នាទី រំលងអាធ្រាត្រឈានចូលយប់ថ្ងៃទី២៥ ខែធ្នូឆ្នាំ ២០១៩ នៅចំណុចមុខផ្ទះលេខ៤៦៥ ផ្លូវលេខ១៩៨៨ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញក្រុមជនសង្ស័យមានគ្នាចំនួន១០នាក់ បានជួបជុំគ្នាផឹកសុីរាំលែងនៅក្នុងក្លិបហ្គោលឡាញសង្កាត់ភ្នំពេញថ្មីចូលរួមក្នុងកម្មវិធីខួបកំណើតរបស់ឈ្មោះ សុខរាជ ។
លុះរំលងអាធ្រាតឈានចូលថ្ងៃទី២៥ ខែធ្នូ ដោយឈ្មោះ ហង់ សុខេន ហៅភ្លើង មានសភាពស្រវឹងស្រា បានដើរចេញពីក្នុងក្លឹបមកឈរនៅខាងក្រៅ ហើយបានមើលឃើញក្រុមបក្សពួកជនរងគ្រោះ២នាក់ ដែលទើប តែចេញមកពីផឹកស៊ីហាងមួយកន្លែងផ្សេងទៀតក្នុងស្ថានភាពស្រវឹង មានគោលបំណងចូលមករាំនៅក្នុងក្លិបហ្គោលឡាញនេះដែរ ។
ដោយសារភាគីទាំងពីរធ្លាប់មានទំនាស់គ្នាកន្លងមក ជនដៃដល់បានស្ទុះទៅវាយជនរងគ្រោះ២ នាក់ ចំនួន២ដៃចំលើផ្ទៃមុខ រួចស្រែកឡូឡាផ្អើលដល់ក្រុមបក្សពួក រត់ចេញពីក្នុងក្លិបមកវាយកាប់ចាក់គ្នាទៅវិញទៅមក បណ្តាលឲ្យក្រុមសន្តិសុខយាមនៅក្នុងក្លិបនោះ ឃាត់ខ្លួនឈ្មោះ ហង់ សុខេន ហៅភ្លើង ជាដើមភ្លើង បានម្នាក់ ចំណែកភាគីជនរងគ្រោះបានឡើងជិះម៉ូតូចេញទៅ ។
តែភ្លាមនោះក្រុមជនដៃដល់ក៏បានជិះម៉ូតូដេញតាមពីក្រោយ ដល់ចំណុចកើតហេតុលើកទី២ ក្រុមជនសង្ស័យបានដេញវាយកាប់ចាក់ទៅលើភាគីជនរងគ្រោះ ដែលប្រដាប់ដោយដំបង ដុំថ្ម ដុំឥដ្ឋ បណ្ដាលឲ្យស្លាប់ភាគីខាងជនរងគ្រោះម្នាក់ រួចបានប្លន់យកគ្រឿងអលង្ការនៅជាប់ខ្លួន ដូចជាខ្សែកមាសមួយដំឡឹង ចិញ្ចៀនផ្លាកទីន៥ ជី និងនាឡិកាដៃមួយគ្រឿង រួចជនសង្ស័យបាននាំគ្នារត់គេចខ្លួនបាត់អស់ ។
បន្ទាប់ពីកើតមានអំពើហឹង្សានោះសមត្ថកិច្ច នគរបាលខណ្ឌសែនសុខ ចុះធ្វើការស្រាវជាវ ឈានដល់ការឃាត់ខ្លួនជនសង្ស័យជាបន្តបន្ទាប់ចំនួន ៨នាក់ រួមទាំងដកហូតបានម៉ូតូចំនួន៥គ្រឿង នាំមកបង្ហាញមុខជាសាធារណៈ នឹងបញ្ជូនទៅកាន់សាលា ដំបូងរាជធានីភ្នំពេញ ។
ជនសង្ស័យក្រោយពីចៅក្រមស៊ើបសួរបើកការស៊ើបអង្កេត ដោយរកមិនឃើញមាន
ជាប់ពាក់ពន្ធនឹងអំពើហឹង្សានោះ មនុស្ស៣ នាក់ត្រូវបានឲ្យរួចផុតពីការចោទប្រកាន់ ។ ដូច្នេះ សំណុំរឿងនេះមានតែជនសង្ស័យ៥ នាក់ ដូចមានឈ្មោះខាងលើត្រូវបានឃុំខ្លួន រហូតដល់មានសាលក្រមផ្តន្ទាទោសនេះ ៕
ចែករំលែកព័តមាននេះ