សហរដ្ឋអាមេរិក ៖ បណ្ដាសារព័ត៌មានអាមេរិករាយការណ៍នាថ្ងៃទី២០ កក្កដាថា បន្លំខ្លួនជាអ្នកបើករថយន្តរបស់ក្រុមហ៊ុនចែកចាយ FEDEX បុរសប្រដាប់អាវុធម្នាក់កាលពីថ្ងៃទី១៩ កក្កដា បានបាញ់ស្លាប់កូនប្រុសរបស់លោកស្រីចៅក្រមសហព័ន្ធមួយរូបនៅសហរដ្ឋអាមេរិក ហើយស្វាមីរបស់គាត់រងរបួសក្នុងការបាញ់ប្រហារលើផ្ទះពួកគេ នៅទីក្រុងញូវចឺស៊ី។ ទូរទស្សន៍ ABC NEWSរាយការណ៍ថាលោកស្រីចៅក្រម ESTHER SALAS ពុំរងរបួសឡើយ ។
កូនប្រុសរបស់ស្ត្រីចៅក្រមរូបនេះឈ្មោះDANIEL ANDERL អាយុ២០ឆ្នាំត្រូវគ្រាប់កាំភ្លើងស្លាប់ពេលរូបគេបើកទ្វារផ្ទះ ។ រូបគេត្រូវគ្រាប់ចំកណ្ដាលទ្រូង ។ ស្វាមីលោកស្រីលោកMARK ANDERL ជាមេធាវីនិងជាអតីតរដ្ឋអាជ្ញារងរបួសកំពុងស្ថិតក្នុងសភាពដុនដាប ក្រោយវះកាត់ ។
ប៉ូលិសសហព័ន្ធFBIនិយាយថា ខ្លួនកំពុងធ្វើការស៊ើបអង្កេតចំពោះការបាញ់ប្រហារនេះ ដែលកើតមាននៅគេហដ្ឋានចៅក្រមរូបនោះនិងតាមរកជនសង្ស័យដែលគេចខ្លួនបាត់ ៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ