ភាពស្មោះត្រង់មានសារៈសំខាន់ណាស់សម្រាប់អាជីវកម្មនីមួយៗ ប៉ុន្តែវាកាន់តែពិបាកក្នុងការទទួល និងរក្សាវាក្នុងពេលបច្ចុប្បន្ននេះ ព្រោះអ៊ីនធើណេត និងប្រព័ន្ធសង្គមបានធ្វើឲ្យពួកគេមានភាពងាយស្រួលក្នុងការរករបស់ជំនួសថ្មីៗ ដែលធ្វើឲ្យពួកគេមិនភ័យខ្លាចក្នុងការផ្លាស់ប្តូរជម្រើសផលិតផល ឬសេវាកម្មឡើយ ។
ទោះជាវាកាន់តែមានភាពលំបាកពិតមែនក្តី អាជីវករត្រូវតែផ្តោតស្មារតីលើការសម្រេចបានគោលដៅនេះព្រោះប្រសិនបើអ្នកទទួលបានភាពស្មោះត្រង់ពីអតិថិជនរបស់អ្នកនោះ អ្នកនឹងទទួលបានអត្ថប្រយោជន៍ជឫច្រើនផងដែរ ។ ខាងក្រោមគឺជាយុទ្ធសាស្ត្រមួយចំនួនដែលអាជីវករអាចប្រើដើម្បីទាក់ទាញអតិថិជនដែលស្មោះត្រង់បាន ។
១. ធ្វើឲ្យបទពិសោធន៍អតិថិជនគួរឲ្យចងចាំ
អតិថិជននាពេលបច្ចុប្បន្ននេះត្រូវការច្រើនជាងតម្លៃផលិតផលដែលសមរម្យដើម្បីមកទិញពីអ្នកម្តងទៀត ។ ពួកគេត្រូវតែចងចាំបទពិសោធន៍ដែលមិនអាចភ្លេចបាន ដូចជាភាពងាយស្រួលក្នុងការរកហាងរបស់អ្នក ភាពងាយស្រួលក្នុងការទិញពីអ្នក និងការផ្តល់សេវាកម្មអតិថិជនដ៏ល្អពីអ្នកជាដើម ។
២. បុគ្គលិកត្រូវតែបង្ហាញក្តីស្រលាញ់ និងភាពស្មោះត្រង់ចំពោះអាជីវកម្ម
ការផ្សព្វផ្សាយផលិតផលមិនអាចជួយអ្នកបានច្រើនទេប្រសិនបើបុគ្គលិករបស់អ្នកមិនបង្ហាញរូបភាព និងអារម្មណ៍ល្អដល់អតិថិជនរបស់អ្នក ។ អ្នកត្រូវតែមានការលើកទឹកចិត្តដែលជំរុញបុគ្គលិកឲ្យមានភាពរួសរាយរាក់ទាក់ និងមានកម្លាំងធ្វើការផងដែរ ។ ពួកគេស្ទើរតែជាធនធានដែលមានតម្លៃជាងគេក្នុងការទាក់ទាញអតិថិជនដែលស្មោះត្រង់ ។
៣. ព្យាយាមនាំយកអ្វីៗដែលថ្មីៗ
អ្នកត្រូវតែព្យាយាមរកចំណុចដែលអ្នកអាចធ្វើឲ្យកាន់តែប្រសើរឡើងមិនថាលើផលិតផលរបស់អ្នក ឬការផ្តល់សេវាកម្មក្នុងអាជីវកម្មទេ ។ ជាមួយគ្នានេះដែរ អ្នកគួរតែអនុញ្ញាតឲ្យអតិថិជនរបស់អ្នកចូលរួមក្នុងការសម្រេចចិត្តលើអ្វីដែលថ្មីៗដូចជាផ្តល់ជាផលិតផលសាកល្បងដោយឥតគិតថ្លៃ ឬការសួរមតិយោបល់ពួកគេផ្ទាល់ជាដើម ។
៤. បង្កើតទំនាក់ទំនងពិតប្រាកដជាមួយអតិថិជនរបស់អ្នក
ការប្រាស្រ័យទាក់ទងតាមប្រព័ន្ធសង្គមក៏ជាការកសាងទំនាក់ទំនងរវាងមនុស្សនិងមនុស្សដែរ ។ អតិថិជនពេញចិត្តណាស់ពេលដែលឃើញអ្នកហៅឈ្មោះរបស់ពួកគេត្រូវ និងទាក់ទងទៅពួកគេពេលដែលមានអ្វីថ្មីៗ ។ លើសពីនេះទៅទៀត អ្នកត្រូវតែរក្សាភាពសកម្មក្នុងការឆ្លើយតបនឹងសារ និងព្យាយាមធ្វើឲ្យអតិថិជនរបស់អ្នកមានអារម្មណ៍ថាខ្លួនជាមនុស្សពិសេសផងដែរ ៕
ចែករំលែកព័តមាននេះ