ប្រទេសបារាំង ៖ ព្រឹត្តិការណ៍ពានរង្វាន់ FIFA Ballon d’Or ត្រូវសម្រេចលុបចោលជាផ្លូវការសម្រាប់ឆ្នាំ២០២០ និងជាលើកដំបូងបំផុតក្នុងប្រវត្តិសាស្ត្រពានរង្វាន់មួយនេះ នេះបើយោងតាមការប្រកាសពីអ្នករៀបចំ។
ទស្សនាវដ្តីបាល់ទាត់បារាំង (France Football magazine) ដែលជាអ្នកបង្កើតពានរង្វាន់កីឡាករល្អបំផុតប្រចាំឆ្នាំ ឬ FIFA Ballon d’Or បានប្រកាសជាផ្លូវការកាលពីថ្ងៃច័ន្ទ ទី២០ ខែកក្កដាថា នឹងមិនមានព្រឹត្តិការណ៍ខាងលើសម្រាប់ឆ្នាំនេះឡើយ។ ដែលវាជាលើកទី១ ក្នុងប្រវត្តិសាស្ត្រ ៦៤ឆ្នាំនៃការបង្កើតពានរង្វាន់នេះឡើង។ បន្ទាប់ពីយុទ្ធនាការបាល់ទាត់ជាច្រើនរងផលប៉ះពាល់ និងរំសាយចោលពាក់កណ្តាលទី ដោយសារតែការផ្ទុះឡើងនៃវីរុសកូវីដ១៩។
សូមបញ្ជាក់ថា ពានរង្វាន់ដ៏មានកិត្យានុភាព ដែលត្រូវបានបោះឆ្នោតឱ្យដោយអ្នកសារព័ត៌មាន គឺជាពានរង្វាន់ប្រចាំឆ្នាំ ដែលត្រូវបានផ្តល់ឱ្យកីឡាករបាល់ទាត់បុរសឆ្នើមបំផុតនៅលើពិភពលោក បានបង្កើតចាប់តាំងពីឆ្នាំ១៩៥៦។ ខណៈពានរង្វាន់សម្រាប់ស្ត្រី ត្រូវបានផ្តល់ជូនជាលើកដំបូងនៅឆ្នាំ២០១៨ ។
បច្ចុប្បន្ននៅមិនទាន់កីឡាករណាម្នាក់ អាចធ្វើបានកំណត់ត្រាជាប្រវត្តិសាស្ត្រដូចកីឡាករ Lionel Messi (6) និង Cristiano Ronaldo (5) នៅឡើយទេ ក្នុងការឈ្នះពានរង្វាន់ខាងលើច្រើនបំផុត ខណៈអ្នកឈ្នះកាលពីឆ្នាំមុនគឺជា Lionel Messi (បុរស) និង Megan Rapinoe (ស្ត្រី) ៕ (ដកស្រង់ចេញពី Reuters)
ចែករំលែកព័តមាននេះ