ខេត្តស្វាយរៀង ៖ បច្ចុប្បន្ន មានក្រុមហ៊ុនដឹកជ្រូកពីប្រទេសថៃឆ្លងកាត់ខេត្តស្វាយរៀង ដើម្បីដឹកបន្តឆ្លងដែនទៅប្រទេសវៀតណាមតាមច្រកទ្វារព្រំដែនអន្តរជាតិព្រៃវល្លិ ក្នុង១ថ្ងៃៗចាប់ពី៦០០ក្បាលទៅ១.២០០ក្បាល ។ ប៉ុន្តែអ្វីដែលគួរឲ្យព្រួយបារម្ភ គឺជ្រូកដែលឈឺនិងងាប់ ខាងវៀតណាមមិនទទួលឲ្យយកចូលទៅប្រទេសរបស់គេទេ ម្ល៉ោះហើយក្រុមឈ្មួញក៏លក់ឲ្យខាងឡសត្តឃាត កាប់ពន្លះយកសាច់ចែកចាយតាមផ្សារ លក់បន្តទៅឲ្យអ្នកខេត្តស្វាយរៀងដែលធ្វើឲ្យប៉ះពាល់ដល់សុខភាពអ្នកទិញយកទៅបរិភោគ ។
ការបែកធ្លាយរឿងអាជីវករទិញជ្រូកឈឺ និងងាប់ដឹកដាក់តាមឡសត្តឃាតលក់ចែកចាយតាមផ្សារនេះ គឺកាលពីព្រឹកថ្ងៃទី១៩ ខែកក្កដា ឆ្នាំ២០២០ នៅភូមិព្រៃវល្លិ ឃុំថ្មី ស្រុកកំពង់រោទ៍ ។
ទាក់ទិននឹងករណីនេះ លោក យស់ ស៊ីមអាយុ៥៥ឆ្នាំ ជាម្ចាស់ចំណតផ្ទេរជ្រូកឆ្លងដែនទៅ
ប្រទេសវៀតណាម នៅចំណុចប្រឡាយទាហានស្ថិតក្នុងភូមិព្រៃវល្លិ ឃុំថ្មី បានឲ្យដឹងថា ក្រុមហ៊ុនឧកញ៉ា ជឹម សុខ គឺមានច្បាប់អនុញ្ញាតដឹកជ្រូករស់ពីប្រទេសថៃចូលមកកម្ពុជា និងដឹកឆ្លងកាត់ព្រំដែនទៅប្រទេសវៀតណាម ក៏ប៉ុន្តែក្រុមហ៊ុនបានដឹកជ្រូកមកចូលចំណតដើម្បីពិនិត្យសុខភាព រួចផ្ទេរថយន្តដឹកបន្តទៅប្រទេសវៀតណាម តែបើមានជ្រូកអន់ និងងាប់ ខាងវៀតណាមមិនទទួលយកនិងមិនឲ្យដឹកចូលទេ ។ ដូច្នេះជ្រូកអន់និងងាប់ ដែលវៀតណាមមិនយក គឺគេលក់ទៅឲ្យឡសត្តឃាតស្រុកស្វាយទាប ។
លោក ស៊ីម វ៉ា អាយុ៣៧ឆ្នាំ ម្ចាស់ឡសត្តឃាតស្រុកស្វាយទាប បានឲ្យដឹងថា ពិតជាមានក្រុមអាជីវករដឹកជ្រូករស់និងងាប់ចូលមកឡសត្តឃាតរបស់គាត់មែន ប៉ុន្តែមិនដឹងថាគេដឹកមកពីណាទេ ។ រូបគាត់ជាម្ចាស់ឡគ្រាន់តែមានទីកន្លែងឲ្យអាជីវករយកជ្រូកមកកាប់ប៉ុណ្ណោះ ដោយយកតម្លៃជ្រូក១ក្បាល៨.០០០រៀល គោ១ក្បាល១៥.០០០រៀល ។ គាត់គ្មានសិទ្ធិសួរនាំ ដេញគេមិនឲ្យយកជ្រូកងាប់ចូលមកកាប់សាច់នោះទេ ។
លោក ស៊ីម វ៉ា និយាយថា ម្ចាស់ជ្រូកគេយកជ្រូកមកចូលឡ គឺមានកម្មកររបស់គេ ធ្វើហើយគេដឹកយកទៅវិញ ឯគាត់យកតែថ្លៃឈ្នួលឡ ចំពោះការពិនិត្យសុខភាពសត្វគឺពេទ្យសត្វស្រុកស្វាយទាបជាអ្នកមកពិនិត្យ ។
ឡសត្តឃាតស្រុកស្វាយទាប កាប់ជ្រូកក្នុង១ថ្ងៃ១០ក្បាលទៅ១៥ក្បាល ។ ចំណែកកម្មករពិឃាតជ្រូកបានឲ្យដឹងថា ជ្រូករស់ ជ្រូកងាប់ ដែលគេយកមកឲ្យធ្វើទាំងសម្លាប់ កោស និងសម្អាតគ្រឿងក្នុង ក្នុង១ក្បាល២ម៉ឺនរៀល ។
ទាក់ទិននឹងករណីនេះ លោក សុខ សានី មន្ត្រីពេទ្យសត្វស្រុកស្វាយទាប និយាយថា លោកចុះពិនិត្យនៅឡសត្តឃាត ពីវេលាម៉ោង៣ទៀបភ្លឺដល់ម៉ោង៨ព្រឹក ប៉ុន្តែបើអាជីវករពិឃាតសត្វបន្ថែមលោកមិនបានដឹងទេ ។ ចំណែកជ្រូកក្រុមអាជីវករដឹកមកពីណាក៏លោកមិនបានដឹងដែរ ក៏ប៉ុន្តែកន្លងមកបានលេចឮថា មានឈ្មួញយកជ្រូកពីចំណតស្រុកកំពង់រោទ៍មកកាប់នៅក្នុងឡសត្តឃាត និងកាប់តាមផ្ទះ រួចចែកចាយដឹកលក់តាមម៉ូតូនៅតាមភូមិ ។
ជាក់ស្តែង នៅឡសត្តឃាតស្រុកស្វាយទាប គឺមានកាប់ជ្រូកបន្ថែមដោយគ្មានមន្ត្រីពេទ្យសត្វពិនិត្យ និងជ្រូកដឹកចេញពីចំណតជ្រូកព្រៃវល្លិដាក់ក្នុងឡសត្តឃាតរបស់ឈ្មោះ ស៊ឹម វ៉ា មានច្រើនក្បាល ក៏ប៉ុន្តែជ្រូកងាប់ជាច្រើនក្បាលមិនឃើញមានដឹកចូលឡទេ ។
ចំណែកលោក ប៉ែន ចន្ធី ប្រធានការិយាល័យផលិតកម្មនិងបសុព្យាបាល នៃមន្ទីរកសិកម្មរុក្ខាប្រមាញ់ និងនេសាទខេត្ត មានប្រសាសន៍ថា ក្រុមហ៊ុនគេមានអាជ្ញាប័ណ្ណដឹកជ្រូកថៃឆ្លងកាត់ប្រទេសកម្ពុជាទៅប្រទេសវៀតណាម មានលិខិតបញ្ជាក់ពិនិត្យសុខភាពសត្វពីមន្ត្រីជំនាញពេទ្យ
សត្វថៃនិងមន្ត្រីជំនាញកម្ពុជា ហើយពេលដឹកជ្រូកមកដល់ចំណតព្រៃវល្លិ យើងមានមន្ត្រីចុះទៅពិនិត្យកាត់ស្តុក ។ ចំពោះជ្រូកអន់ និងជ្រូកងាប់ខាងវៀតណាមគេមិនទទួលឲ្យដឹកចូលប្រទេសគេទេ ហើយបើដឹកត្រឡប់ទៅប្រទេសថៃវិញក៏មិនអាចដែរ ទើបក្រុមហ៊ុនសម្រេចលក់ឲ្យឡសត្តឃាតស្រុកស្វាយទាប កាប់សាច់ចែកចាយលើទីផ្សារប្រសូត ។ ជ្រូកដែលអន់សុខភាពខ្សោយនេះពុំមានជំងឺទេ គឺដឹកផ្លូវឆ្ងាយក្តៅទើបអន់ ។
ជ្រូកងាប់ពី៥ទៅ១០ក្បាលតែងតែមានគឺងាប់ដោយសារដឹកឆ្ងាយ ចង្អៀត ក្នុងរថយន្តមួយគ្រឿងដឹក៣០០ក្បាល ទើបមានងាប់ មិនមែនងាប់ដោយសារមានជំងឺទេ ទើបមន្ត្រីយើងអនុញ្ញាតឲ្យកាប់សាច់លក់បាន បើសាច់ស្អុយហើមខូចក៏មិនអនុញ្ញាតឲ្យកាប់សាច់លក់ដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ