ប្រទេសជប៉ុន ៖ របាយការណ៍របស់អង្គការឃ្លាំមើលសិទិ្ធមនុស្ស (HRW) បានរកឃើញថា អត្តពលិកវ័យក្មេងនៅក្នុងប្រទេសជប៉ុនជារឿយៗ បានទទួលរងនូវការរំលោភបំពានលើរាងកាយ និងពាក្យសំដី ហើយពេលខ្លះមានទាំងការរំលោភបំពានផ្លូវភេទថែមទៀត អំឡុងពេលហ្វឹកហាត់។
របាយការណ៍នេះ ត្រូវបានដកចេញពីការចងក្រងមួយ ដែលជាបទពិសោធន៍របស់អត្តពលិកជាង ៨០០ នាក់នៅក្នុងប្រភេទកីឡាចំនួន៥០ផ្សេងគ្នា។ របាយការណ៍ដែលមាន៦៧ទំព័រ ត្រូវបានចេញផ្សាយកាលពីថ្ងៃច័ន្ទ ទី២០ ខែកក្កដា ដែលបង្ហាញពីការរំលោភបំពានមកលើអត្តពលិកវ័យក្មេង។
លោកស្រី Minky Worden នាយកផ្នែកផ្តួចផ្តើមពិភពលោកនៅអង្គការឃ្លាំមើលសិទិ្ធមនុស្ស បាននិយាយនៅក្នុងសេចក្តីថ្លែងការណ៍មួយថា អស់រយៈពេលជាច្រើនទសវត្ស កុមារនៅក្នុងប្រទេសជប៉ុន ត្រូវបានគេវាយដំ និងរំលោភបំពានយ៉ាងសាហាវ ។ ខណៈកាលពីឆ្នាំ២០១៣ គណៈកម្មាធិការអូឡាំពិកជប៉ុន (JOC) បានសន្យាចាត់វិធានការលុបបំបាត់អំពើហិង្សា ក្នុងចំណោមសហព័ន្ធកីឡារបស់ខ្លួន បន្ទាប់ពីការស្ទង់មតិផ្ទៃក្នុងបានបង្ហាញថាជាង ១០ភាគរយនៃអត្តពលិករបស់ខ្លួន បានរងគ្រោះដោយសារការសម្លុត ឬយាយីលើរូបរាងកាយ។ ហើយក្នុងនោះពួកគេក៏បានកាត់បន្ថយថវិកាដល់សហព័ន្ធយូ នៅពេលដែលគ្រូបង្វឹកត្រូវបានរកឃើញថា បានរំលោភបំពានលើរាងកាយរបស់អត្តពលិកជាស្ត្រី។
ទោះយ៉ាងណាក៏ដោយ HRW បានលើកឡើងថា មិនទាន់មានសកម្មភាពគ្រប់គ្រាន់ ដែលបានធ្វើចាប់តាំងពីពេលនោះមក ហើយពួកគេក៏បានទាមទារឱ្យអង្គការដូចជា ក្រុមប្រឹក្សាកីឡាជប៉ុននិង JOC ប្រើប្រាស់ព្រឹត្តិការណ៍អូឡាំពិកនាពេលខាងមុខ ជាកត្តាជំរុញឱ្យមានការផ្លាស់ប្តូរ ចំពោះទង្វើដ៏គួរឱ្យស្អប់ខ្ពើមទាំងនេះ៕ (ដកស្រង់ចេញពី CNA)
ចែករំលែកព័តមាននេះ