រាជធានីភ្នំពេញ ៖ ទោះបីកីឡាប្រដាល់គុនខ្មែរកំពុងទទួលការពេញនិយមខ្លាំងក្នុងស្រទាប់មហាជន ក៏អ្នកគាំទ្រភាគច្រើនមិនបានដឹងថា កីឡាករប្រដាល់ទាំងប្រុសទាំងស្រីប្រើសម្ភារអ្វីខ្លះសម្រាប់ការពារខ្លួនរាល់ពេលឡើងសង្វៀនប្រកួតម្ដងៗ ។ អ្នកខ្លះបានត្រឹមតែដឹងថា ពាក់ត្រឡោកការពារប្រដាប់ភេទដើម្បីកុំឱ្យភាគីម្ខាងទៀតទាត់ត្រូវបណ្ដាលឱ្យហួលឬឈឺចុកចាប់ខ្លាំងប៉ុន្តែពួកគាត់មិនបានដឹងថា ត្រឡោកការពារនោះមានរូបរាងដូចម្ដេចនិងធ្វើពីអ្វីនោះទេ ។
លោក មាស សុខគ្រី ដែលជាគ្រូបង្ហាត់គុនខ្មែរដ៏ល្បីល្បាញមួយរូប បានប្រាប់អ្នកយកព័ត៌មានកោះសន្តិភាពថា អ្នកប្រដាល់គ្រប់រូបទាំងប្រុសទាំងស្រីពេលឡើងសង្វៀនប្រកួតម្ដងៗត្រូវតែពាក់ប្រដាប់ការពារប្រដាប់ភេទបង្ការគ្រោះថ្នាក់ធ្ងន់ធ្ងរជាយថាហេតុ ។
បើសិនជាមិនពាក់ទេនោះ នៅពេលភាគីម្ខាងទៀតទាត់ត្រូវច្បាស់ជាឈឺឬហួលខ្លាំងរហូតដល់បាត់បង់ជីវិតក៏មាន ។ គ្រាន់តែមនុស្សស្រីពេលពាក់ម្ដងៗគេមិនឱ្យអ្នកណាដឹងទេដោយសារការខ្មាសអៀន ហើយពេលពាក់ក៏ត្រូវមានការប្រុងប្រយ័ត្នខ្ពស់ផងដែរធ្វើយ៉ាងណាកុំឱ្យវារបូត។
លោកគ្រូ មាស សុខគ្រី បានពន្យល់ថាប្រដាប់ការពារភេទទាំងនោះភាគច្រើនគេធ្វើអំពីអាលុយមីញ៉ូមឬជ័ររឹងស្វិតដែលធន់នឹងការទាត់ត្រូវវាមិនធ្វើឱ្យអ្នកពាក់ឈឺខ្លាំងនោះទេព្រោះប្រដាប់ការពារនោះមានស៊ុំព័ទ្ធជុំវិញមានអេប៉ុងខាងក្នុងនិងដេររំុព័ទ្ធជាមួយសាច់ក្រណាត់ក្រាស់ៗ ។ រាល់ពេលកីឡាករ-កីឡាការិនីឡើងប្រកួតម្ដងៗ គេយកវាមកពាក់ដោយចងជាមួយនឹងខ្សែឱ្យបានតឹងជាប់ល្អខ្លាចវារបូតនៅពេលប្រកួត ។ ទោះបីជាយ៉ាងណាគេនៅតែឃើញរបូតម្ដងម្កាលដែរ ដោយសារតែខ្សែប្រើយូរពេកវាបណ្ដាលឱ្យផុយទើបធ្វើឱ្យវាដាច់របូតចេញបាន។
ក្រៅពីប្រដាប់ការពារប្រដាប់ភេទក៏នៅមានប្រដាប់ការពារធ្មេញផងដែរ ។ លោកបញ្ជាក់ថា ប្រដាប់ការពារធ្មេញនេះក៏សំខាន់ណាស់ដែរសម្រាប់អ្នកប្រដាល់ បើមិនពាក់គេមិនឱ្យប្រកួតឡើយ ។ លោកថា ប្រដាប់ការពារធ្មេញនេះផលិតឡើងអំពីជ័រពិសេសម្យ៉ាង។
មុនពេលយកមកពាក់ គេយកវាទៅត្រាំជាមួយទឹកក្ដៅប្រហែលជាមួយនាទីសិនដើម្បីឱ្យវាទន់ ហើយស្រង់យកវាទៅត្រាំជាមួយទឹកកកមួយសន្ទុះទៀត ដើម្បីឱ្យវាត្រជាក់និងរឹងល្មមទើបពាក់ឱ្យអ្នកប្រដាល់ ។ ប្រដាប់ការពារធ្មេញក្រៅពីមានតួនាទីការពារធ្មេញកុំឱ្យគេវាយត្រូវបាក់ហើយ វាក៏ជាសញ្ញាសម្គាល់ផងដែរ ។ បើសិនជាកីឡាករ-កីឡាការិនីរូបណាធ្វើឱ្យរបូតចេញមកខាងក្រៅញឹកញាប់ បានន័យថា កីឡាករ-កីឡាការិនីរូបនោះអស់ស៊ុហ្វប្រកួតលែងកើតហើយ ៕
ចែករំលែកព័តមាននេះ