ខេត្តបាត់ដំបង ៖ រយៈពេល២ថ្ងៃគឺថ្ងៃទី២២ និង២៣ ខែតុលា នៅតាមដងស្ទឹងសង្កែមានប្រជាពលរដ្ឋយ៉ាងច្រើនកុះករបានមកចូលរួមពិធីបុណ្យអុំទូកដោយមានការរៀបចំប្រណាំងទូកដណ្តើមចំណាត់ថ្នាក់ចំថ្ងៃបុណ្យចេញព្រះវស្សាគឺថ្ងៃទី១៤ និង១៥កើត ខែអស្សុជសំដៅផ្សារភ្ជាប់ទៅនឹងប្រពៃណីរបស់បងប្អូនខ្មែរយើងនៅខេត្តបាត់ដំបងដែលធ្លាប់តែធ្វើបុណ្យចេញព្រះវស្សានេះជារៀងរាល់ឆ្នាំទៅតាមគន្លងប្រពៃណីទំនៀមទំលាប់នៃព្រះពុទ្ធសាសនា។ រីឯនៅតាមវត្តអារាមវិញ ប្រជាពលរដ្ឋដែលរស់នៅ តាមដងស្ទឹងសង្កែតែងតែធ្វើប្រទីបជ្វាលា បណ្តែតនៅតាមដងស្ទឹងសង្កែភ្លឺព្រោងព្រាត ហើយប្រទីបនីមួយៗបានតុបតែងលំអទៅដោយក្បូរក្បាច់ផ្កាភ្ញី ភ្លើងទៀន នំចំណី ។ល។ ចំណែកឯប្រជាពលរដ្ឋយើងដែលនៅឆ្ងាយពីដងស្ទឹងក៏បាននាំគ្នារៀបចំធ្វើប្រទីបបណ្តែតនៅតាមស្រះវត្ត ត្រពាំង បឹងបួ ក្នុងភូមិផងដែរ។
ក្នុងពិធីប្រណាំងទូកនេះក៏មានការអញ្ជើញជាគណៈអធិបតីពីលោកអ៊ុយ ស៊ីប តំណាងឱ្យលោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជានាយកខុទ្ទកាល័យ លោកស ខេង លោកប្រាជ្ញ ច័ន្ទ អភិបាលខេត្ត លោកងិន ឃន ប្រតិភូរាជរដ្ឋាភិបាលទទួលបន្ទុកអគ្គនាយករតនាគារជាតិ អស់លោកអភិបាលរងខេត្ត ក្រុមប្រឹក្សាខេត្ត ប្រធាន អនុប្រធានមន្ទីរនានាជុំវិញខេត្ត កងកំលាំងប្រដាប់អាវុធ កីឡាករ កីឡាការិនីប្រណាំងទូក និងប្រជាពលរដ្ឋយ៉ាងច្រើនកុះករ។ លោកមុំ ក្រាត សមាជិកក្រុមប្រឹក្សាខេត្ត និងជាប្រធានគណៈកម្មការរៀបចំបុណ្យអុំទូកខេត្តបានធ្វើរបាយការណ៍ឱ្យដឹងថា ក្នុងឆ្នាំនេះគណៈកម្មការបច្ចេកទេសបានទទួលពាក្យសុំចុះឈ្មោះទូកចូលរួមប្រកួតមានចំនួន១៩ទូកក្នុងនោះមានទូកចូលថ្មីចំនួន២ទូក គឺទូកខ្នាតអន្តរជាតិឈ្មោះសង្កែមហាសាលមានជ័យ និងទូកឈ្មោះមង្គលបុរីបារមីនាយកនសន្តិភាពមកពីខេត្តបន្ទាយមានជ័យ។ កីឡាករសរុបមានចំនួន៨៧១នាក់ ក្នុងនោះកីឡាករ កីឡាការិនីពេញសិទ្ធិមាន៦៧២នាក់ បំរុងមាន១៩៩នាក់ ដោយធ្វើការប្រកួតវិលជុំប្តូរខ្សែទឹកយកចំណាត់ថ្នាក់។ ជាលទ្ធផល ទូកខ្នាតអន្តរជាតិចំណុះ២២នាក់ ផ្នែកបុរសលេខ១ បានទៅលើទូកឈ្មោះអន្លង់តាអួសជ័យបារមីគង្គា ស្រុកឯកភ្នំ ទទួលបានពាន១ ទង់១ និងថវិកា៧០០.០០០រៀល។ លេខ២ បានទៅលើទូកឈ្មោះពន្ធដារមហាចក្រវាឡសែនជ័យ មន្ទីរពន្ធដារខេត្ត ទទួលបានទង់១ និងថវិកា៥០០.០០០រៀល និងលេខ៣ បានទៅលើទូកឈ្មោះរតនមានជ័យបារមីពាយ័ព្យ ស្រុករតនមណ្ឌល ទទួលបានទង់១ ថវិកា៣៥០.០០០រៀល។
ផ្នែកនារីលេខ១បានទៅលើទូកឈ្មោះ ព្រះវិស្ណុតេជៈសាធារណការសែនជ័យទទួលបានរង្វាន់ដូចបុរសដែរ លេខ២ បានទៅលើទូកពាក់ស្លាកលេខ២នៃមន្ទីរសង្គមកិច្ចខេត្តទទួលបានរង្វាន់ដូចបុរសដែរ និងលេខ៣ បានទៅលើទូកពាក់ស្លាកលេខ១ មន្ទីរកិច្ចការនារីខេត្តទទួលរង្វាន់ដូចបុរសដែរ និងរង្វាន់លួងចិត្តសំរាប់ទូកចាញ់ក្នុង១ទូក១២០.០០០រៀល។ ប្រភេទទូកងខ្នាតវែងលេខ១ បានទៅលើទូកឈ្មោះមង្គលបុរីនាយកនសន្តិភាពខេត្តបន្ទាយមានជ័យ ទទួលបានពាន១ ទង់១ និងថវិកា១.២០០.០០០រៀល លេខ២ បានទៅលើទូកនរិន្ទមានជ័យស្រុកឯកភ្នំ ទទួលបានទង់១ និងថវិកា១.០០០.០០០រៀល និងលេខ៣ បានទៅលើទូកឈ្មោះថ្មគោលសែនជ័យបារមីជណ្តើរស្វា ស្រុកថ្មគោល ទទួលបានទង់១ និងថវិកា៦០០.០០០រៀល និងរង្វាន់លួងចិត្តសំរាប់អ្នកចាញ់ក្នុង១ទូក៣០០.០០០រៀល។
លោកអ៊ុយ ស៊ីប តំណាងឱ្យលោកស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានថ្លែងអំណរគុណ និងកោតសរសើរដល់អាជ្ញាធរខេត្តដែលជានិច្ចកាលតែងតែផ្តួចផ្តើមជួយឧបត្ថម្ភគាំទ្ររៀបចំពិធីប្រកួតកីឡាជាច្រើនដូចជាកីឡាប៉េតង់ កីឡាវាយកូនឃ្លីលើតុ កីឡាវាយសី កីឡាបាល់ទះ ព្រមទាំងវិស័យកីឡាជាច្រើនទៀតមិនមែនតែកីឡាប្រណាំងទូកមួយមុខនេះទេ។ ម្យ៉ាងទៀតក៏មានតាំងពិព័រណ៍មហាជនល្បែងកំសាន្តផ្សេងៗដើម្បីឱ្យប្រជាពលរដ្ឋសប្បាយរីករាយផងដែរ។ លោកបានបន្តទៀតថា នេះជាលើកទី២ហើយដែលខេត្តបាត់ដំបងបានរៀបចំកម្មវិធីប្រណាំងទូកនាថ្ងៃចេញព្រះវស្សា ដើម្បីបង្ហាញពីវីរភាពដ៏អង់អាចក្លាហាននៃកងទ័ពជើងទឹករបស់បុព្វបុរសខ្មែរយើងកាលពីជំនាន់ដើម និងដើម្បីផ្សារភ្ជាប់នូវវិស័យកីឡាដោយបង្កើតបាននូវកំលាំងពលំក៏ដូចជាផ្សារភ្ជាប់ទំនៀមទំលាប់ប្រពៃណីរបស់ប្រជាពលរដ្ឋក្នុងខេត្តបាត់ដំបង ជាពិសេសដើម្បីជ្រើសរើសទូកដែលជាប់ចំណាត់ថ្នាក់ទៅចូលរួមប្រកួតក្នុងពិធីបុណ្យអុំទូក អកអំបុក សំពះព្រះខែនៅរាជធានីភ្នំពេញនាពេលខាងមុខ។ លោកអ៊ុយ ស៊ីប បាននាំយកអំណោយរបស់លោកឧបនាយករដ្ឋមន្ត្រី ស ខេង និងលោកជំទាវឧបត្ថម្ភដល់កីឡាករ កីឡាការិនីអុំទូកចំនួន៨៧១នាក់ ក្នុងម្នាក់ៗទទួលបានថវិកា១០.០០០រៀល និងគណៈកម្មការរៀបចំពិធីប្រណាំងទូក ថវិកាចំនួន២លានរៀល៕
ចែករំលែកព័តមាននេះ