ខេត្តកំពង់ឆ្នាំង ៖ សមត្ថកិច្ចចម្រុះរួមមានមន្ត្រីសង្កាត់រដ្ឋបាលជលផលបរិបូណ៌ មន្ត្រីកងរាជអាវុធហត្ថ និងអាជ្ញាធរមូលដ្ឋាន កាលពីរសៀលថ្ងៃទី១៧ ខែកក្កដា ឆ្នាំ២០២០ បានសហ
ការគ្នាចុះបង្ក្រាបបទល្មើសនេសាទនៅភូមិសេះស្លាប់ ស្រុកបរិបូណ៌ ខណៈដែលបទល្មើសទាំង
នេះនៅតែបន្តសកម្មភាពក្នុងរដូវបិទនេសាទ ។
លោក ឈឹម បាន នាយសង្កាត់រដ្ឋបាលជលផលបរិបូណ៌ បានឱ្យដឹងថា ដោយទទួលបានការណែនាំពីនាយខណ្ឌរដ្ឋបាលជលផល ក៏ដូចជាមន្ទីរកសិកម្មខេត្ត ស្តីពីការបង្ក្រាបនិងទប់ស្កាត់បទល្មើសនេសាទក្នុងរដូវបិទនេសាទនេះ សមត្ថកិច្ចចម្រុះរួមមាន កងរាជអាវុធហត្ថ មន្ត្រីជល
ផល និងអាជ្ញាមូលដ្ឋាន បានសហការគ្នាចុះបង្ក្រាបបទល្មើសនេសាទនៅចំណុចភូមិសេះស្លាប់ ឃុំឆ្នុកទ្រូ ស្រុកបរិបូណ៌ ។ ក្នុងប្រតិបត្តិការនេះ បានប្រើប្រាស់កម្លាំងសរុប៨នាក់ និងកាណូតបាឡាស្មាច់ចំនួន៤គ្រឿង ។
ជាលទ្ធផល សមត្ថកិច្ចបង្ក្រាបបានរបាំងស្បៃមុងចំនួន៨កន្លែង ស្មើនឹងប្រវែង៣៥០ម៉ែត្រ លបលូស្បៃមុងចំនួន៨មាត់ បង្គោល១៨០ដើម និងចាក់លែងកូនត្រីចម្រុះទៅក្នុងដែននេសាទវិញចំនួន២០គីឡូក្រាម ។
លោក ឈឹម បាន បានបញ្ជាក់ថា បទល្មើសនេសាទដែលបង្ក្រាបនេះមានទ្រង់ទ្រាយតូចតាចទេដែលដាក់នៅទឹករាក់ៗ ដើម្បីដណ្តើមយកទីតាំងនៅពេលទឹកឡើងមកដល់ រួមផ្សំដល់ពេលរដូវបើកនេសាទមកដល់ផង ពួកគេបានទីតាំងនោះប្រព្រឹតបទល្មើសតែម្តង ៕
ចែករំលែកព័តមាននេះ