តើទោចក្រយានបង្កើតដោយនរណា និងនៅពេលណា?
ទោចក្រយានគឺជាប្រភេទយានជំនិះប្រើកម្លាំងជើងទាំងពីរធាក់ទើបអាចទៅមុខបានដែលផ្ទុយស្រឡះពីយានផ្សេងទៀតបំពាក់ដោយកម្លាំងម៉ាស៊ីនដូចជា ទោចក្រយានយន្ត និងរថយន្តជាដើម ។
ទោចក្រយានគឺជាប្រភេទយានជំនិះប្រើកម្លាំងជើងទាំងពីរធាក់ទើបអាចទៅមុខបានដែលផ្ទុយស្រឡះពីយានផ្សេងទៀតបំពាក់ដោយកម្លាំងម៉ាស៊ីនដូចជា ទោចក្រយានយន្ត និងរថយន្តជាដើម ។ ទោចក្រយានប្រើប្រាស់ជាមធ្យោបាយធ្វើដំណើររយៈពេលវែង ឬខ្លី និងជាឧបករណ៍ហាត់ប្រាណបែបកម្សាន្តទៀតផង ព្រោះវាធ្វើចលនាពេញរាងកាយទាំងអស់ តែទោចក្រយានគេមិនសូវប្រើប្រាស់ជាយានសម្រាប់ដឹកជញ្ជូនអីវ៉ាន់ ឬសម្ភារ ផ្សេងៗទេ ដោយសារតែវាមានរាងតូច ចំណែកតួក៏មិនសូវមាំទេ ពោលគឺពេលប៉ះទង្គិចជាមួយវត្ថុផ្សេងទៀតនឹងបាក់បែកខូចទ្រង់ទ្រាយមិនខាន ។
តើទោចក្រយានបង្កើតឡើងដោយបុគ្គលណា និងនៅឆ្នាំណា ? នៅឆ្នាំ១៤៩៣ កូនសិស្សលោកលីអូណាដូ ដា វីនស៊ី ជាងគំនូរជនជាតិអីុតាលីបានបញ្ចេញគំនិតច្នៃប្រឌិតរបស់លោកតាមរយៈផ្ទាំងគំនូរបង្ហាញពីរូបរាងទោចក្រយានមានលក្ខណៈស្រដៀងនឹងទោចក្រយាននាសម័យទំនើប ។ នៅឆ្នាំ១៧៩០ លោកកុំតេ ដេ ស៊ីវរ៉ាក់ ជនជាតិបារាំងច្នៃប្រឌិតទោចក្រយានពីឈើមានកង់ពីរភ្ជាប់ដោយពូកមានឈ្មោះថា «Celerifere» ។ ទោចក្រយាន Celerifere មិនមានដៃចង្កូត ឈ្នាន់សម្រាប់ធាក់ ឬច្រវាក់ដើម្បីអូសទាញកង់ក្រោយឱ្យមានចលនាទេ ពោលគឺអ្នកជិះទាំងអស់ប្រើជើងរត់បណ្តើរ ជិះលើវាបណ្តើរដូចបង្ហាញក្នុងរូប ។
ឆ្នាំ១៨១៧ លោកកាល់វ៉ុន ឌ្រេស ជនជាតិអាល្លឺម៉ង់ បង្កើតទោចក្រយានដែលមានលក្ខណៈស្រដៀងនឹងទោចក្រយាន Celerifere ដែរ តែមានដៃចង្កូតភ្ជាប់ទៅនឹងតួខាងមុខឱ្យឈ្មោះថា «Draisine ឬ Velocipede» ។
ឆ្នាំ១៨២០ ទោចក្រយានដែលប្រើកម្លាំងជើងធាក់ឱ្យឈ្មោះថា «Human-Powered Vehicle» មានកង់ចាប់ពី ៣ទៅ៤ និងមានឈ្នាន់ធាក់នៅចំកណ្តាល ។
ឆ្នាំ១៨៣០ លោកឃើកផេឌ្រីក ម៉ាក់មីឡន ជនជាតិស្កុតឡែន ច្នៃប្រឌិតទោចក្រយានមានកង់រង្វង់ពីរមុខ និងក្រោយ និងមានឈ្នាន់ធាក់នៅជាប់កង់មុខ និងពូកអង្គុយនៅចំណុចកណ្តាល។
ឆ្នាំ១៨៧០ ទោចក្រយានមានទ្រង់ទ្រាយចម្លែក ពោលគឺទំហំកង់មុខធំជាងកង់ក្រោយច្នៃប្រឌិតឡើងដោយជនជាតិបារាំងលោកអហ្សែន ម៉េយើ បន្ទាប់ពីលោកជេម ស្តាឡី អ្នកច្នៃប្រឌិតជនជាតិអង់គ្លេស ។
ឆ្នាំ១៩០០ និងឆ្នាំ ២០០០ បណ្តាក្រុមហ៊ុននៅអាមេរិក បង្កើតទោចក្រយានម៉ូដែល ទំនើបៗដូចជាទោចក្រយានប្រភេទជិះឡើងភ្នំ ប្រភេទប្រណាំង ប្រភេទធ្វើដំណើរផ្លូវឆ្ងាយ និងទោចក្រយានស៊េរី ទំនើបៗផ្សេងទៀត ៕
ចែករំលែកព័តមាននេះ