នៅក្នុងសូត្រទី១១ព្រះមានព្រះភាគត្រាស់សម្តែងថា ការសម្រេចចិត្តជ្រើសរើសមនុស្សប្រុសឬស្រីណាម្នាក់មកធ្វើជាស្វាមីឬភរិយាពិតជារឿងសំខាន់ខ្លាំងណាស់នៅក្នុងជីវិតរបស់គ្រហស្ថ ។ ប្រសិនបើជ្រើសរើសខុស បុគ្គលនោះនឹងជួបប្រទះនូវទុក្ខលំបាកទាំងផ្លូវចិត្ត និងផ្លូវកាយ វិនាសទាំងទ្រព្យអស់គ្មានសល់ ។
សូត្រនោះបានពន្យល់ថា បើបុគ្គលម្នាក់ជ្រើសរើសគូកំណាន់ចិត្តដែលជាមនុស្សល្ងង់ខ្លៅ ឬជនអត់មារយាទ បុគ្គលនោះនឹងត្រូវរលាយទាំងទ្រព្យសម្បត្តិ បង់ទាំងកិត្តិយសកេរ្តិ៍ឈ្មោះ ។
ប្រពៃណីខ្មែរ និងប្រពៃណីជនជាតិមួយចំនួននៅលើពិភពលោក បានបណ្តោយឲ្យឪពុកម្តាយ ឬចាស់ព្រឹទ្ធាចារ្យជាអ្នកសម្រេចចិត្តជំនួសកូនចៅរបស់ខ្លួនក្នុងការជ្រើសរើសគូស្រករ ។ ការធ្វើដូច្នេះមិនមែនសុទ្ធតែបានផលល្អគ្រប់ពេលនោះទេ ព្រោះចាស់ទុំខ្លះគាត់មើលតាមសាវតារនៃគ្រួសារតាំងពីដើមមកដោយមិនបានឈ្វេងយល់ពីលក្ខណៈរបស់ក្មេងសម័យបច្ចុប្បន្ននេះឡើយ ។
ដូចនេះបុរសនារីទាំងឡាយគួរចៀសវាងការសម្រេចចិត្តខុសក្នុងការជ្រើសយកមនុស្សប្រុសឬមនុស្សស្រីណាម្នាក់មកធ្វើជាគូគាប់ភ្ជាប់និស្ស័យព្រោះបើសម្រេចចិត្តខុសនឹងវិនាស តែបើជ្រើសបានត្រឹមត្រូវក៏នឹងចម្រើន ។ សាន សារិន
ចែករំលែកព័តមាននេះ