ខេត្តព្រះសីហនុ ៖ គម្រោងស្ថាបនាហេដ្ឋារចនាសម្ព័ន្ធផ្លូវក្រុងចំនួន ៣៤ ខ្សែ ដែលមានប្រវែង ៨២,៥៧៤ គីឡួម៉ែត្រ នៅខេត្តព្រះសីហនុ ដែលត្រូវបានបើកការដ្ឋានកាលពីថ្ងៃទី ១៦ ខែ វិច្ឆិកា ឆ្នាំ ២០១៩ កន្លងទៅនេះ ក្នុងគោលបំណងធ្វើឱ្យខេត្តនេះ ក្លាយទៅជាប៉ូលអភិវឌ្ឍនជាតិប្រកបដោយចីរភាព តាមរយៈការអវិឌ្ឍនទីក្រុងទំនើប និងការរៀបចំជាតំបន់សេដ្ឋកិច្ចពិសេសគំរួពហុបំណង មជ្ឈមណ្ឌលកំណើនជាតិ មជ្ឈមណ្ឌលភស្តុភារកម្មជាតិ និងមជ្ឈមណ្ឌលឧស្សាហកម្មបច្ចេកវិទ្យាទំនើប។
យោងតាមសេចក្តីប្រកាសនៅថ្ងៃទី ១៧ ខែ កក្កដា ឆ្នាំ២០២០នេះ បានបន្តថា គិតត្រឹមថ្ងៃទី នេះ គម្រោងបានសម្រេចចាក់បេតុងបាន ៩៩,៩២% ដាក់លូបាន ១០០% រៀបខឿនថ្មក្រានីតបាន ៥៩,៩៩% រៀបកម្រាលថ្មក្រានីតបាន ៤,៤៨% ដាំបង្គោលភ្លើងបំភ្លឺផ្លូវសាធារណៈ បាន ២៣,៨៩% និងបំពាក់អំពូលភ្លើងដែលប្រើបច្ចេកវិទ្យាវៃឆ្លាតបាន ១០,៤៥% នៃបង្គោលភ្លើងដែលបានដាំរួច។
សេចក្តីប្រកាស បាននិយាយថា «គម្រោងក៏បាននិងកំពុងរៀបចំកែលម្អឆ្នេរសមុទ្រឡើងវិញ និងសាងសង់អាងប្រព្រឹត្តកម្មទឹកកខ្វក់ចំនួន២ ទីតាំងដែលទី១នៅក្បែរសណ្ឋាគារសុខា មានសមត្ថភាពច្រោះ ៧២០០ម៉ែត្រគូបក្នុងមួយថ្ងៃ សម្រេចបាន១០%។
ជាមួយគ្នានេះ គម្រោងនឹងធ្វើការអ៊ុតកម្រាលកៅស៊ូ រៀបចំគំនូសសញ្ញានិងភ្លើងចរាចរណ៍ និងបំពាក់កាមេរ៉ាសុវត្ថិភាពនៅតាមផ្លូវ ព្រមទាំងសាងសង់ចំណតរថយន្តនិងបន្ទប់ទឹកសាធារណៈ នៅតាមបណ្តោយឆ្នេរសមុទ្រផងដែរ។
គួរបញ្ជាក់ផងដែរថា នៅថ្ងៃទី ១៧ ខែ កក្កដា នេះ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជាមួយលោក ថោង ខុន រដ្ឋមន្ត្រីក្រសួងទេសចរណ៍ លោក សាយ សំអាល់ រដ្ឋមន្ត្រីក្រសួងបរិស្ថាន និងលោក គួច ចំរើន បានអញ្ជើញចុះពិនិត្យវឌ្ឍនភាពនៃការអនុវឌ្ឍនគម្រោងនេះ៕
ចែករំលែកព័តមាននេះ