ខេត្តកំពង់ស្ពឺ ៖ រឿងរ៉ាវសមត្ថកិច្ចបង្ក្រាបឈើបានជាច្រើន និងដកហូតរថយន្តបានចំនួន 2 គ្រឿង ដែលជាមធ្យោបាយក្រុមថៅកែឈើប្រើប្រាស់ ក្នុងការពិនិត្យការងារពេលនេះថ្នាក់លើនាយរងមណ្ឌល3 បានកោះហៅលោកលឹម ស្រ៊ុនផេង ចូលខ្លួនមកបំភ្លឺ និងឱ្យសរសេររបាយការណ៍ ដោយផ្ទាល់ខ្លួនសម្រាប់ដាក់ជូនថ្នាក់លើធ្វើការត្រួតពិនិត្យ ។ ការអញ្ជើញហៅនេះ ធ្វើឡើងកាលព្រឹកថ្ងៃទី១៦ ខែកក្កដាឆ្នាំ 2020 នៅស្នាក់ការមណ្ឌល 3 តែម្ដង។
ប្រភពបានឱ្យដឹងថា ការអញ្ជើញហៅលោកលឹម ស្រ៊ុនផេង ដែលជាម្ចាស់រថយន្តឲ្យចូលខ្លួនមកបំភ្លឺជូនចំពោះអ្នកដឹកនាំនេះ គឺត្រូវធ្វើទៅតាមរឿងរ៉ាវពិតប្រាកដ ក៏ប៉ុន្តែបើសិនជាថ្នាក់លើពិនិត្យឃើញថា លោកលឹម ស្រ៊ុនផេង ធ្វើរបាយការណ៍ភូតភរកុហកខុសពីរបាយការណ៍របស់សមត្ថកិច្ចនោះ នឹងប្រឈមមុខចំពោះផ្លូវច្បាប់ជាធរមាន។
ក្នុងនោះផងដែរ ម្ចាស់រថយន្តបានអះអាងថាឈ្មោះទុយជាមេការឈើបានអះអាងថា ឈ្មោះទុយ បានខ្ចីរថយន្តរបស់ខ្លួន ជិះពីរចំណុចជិតស្ពានដែកទៅខេត្តកំពង់ស្ពឺ ខ្លួនមិនបានដឹងថា ឈ្មោះទុយនេះ រថយន្តរបស់ខ្លួនទៅកន្លែងលើកដាក់ឈើនៅក្នុងចំការស្វាយចន្ទីនោះទេ។
ដោយឡែក ការអះអាងបែបនេះ ត្រូវបានសមត្ថកិច្ចនគរបាលស្រុកឱរ៉ាល់អះអាងថាឈ្មោះទុយ មិនបានជិះរថយន្តមីតស៊ុយប៊ីស៊ីនោះ ទៅទេគឺឈ្មោះទុយជិះរថយន្ត vigo មួយគ្រឿងផ្សេងទៀតទៅមើលការខុសត្រូវក្នុងការដឹកដាក់ឈើនៅទីនោះ ហើយនៅយប់នោះឈ្មោះផេងក៏មានវត្តមាននៅទីនោះដែរ តែដោយសារសមត្ថកិច្ចទៅដល់ច្រើនពេកយករថយន្តចេញមិនទាន់ក៏ភៀសយករួចតែខ្លួនទៅ។
អ្វីដែលធ្វើឲ្យមជ្ឈដ្ឋានមហាជនមានការចាប់អារម្មណ៍នោះ គឺត្រង់ថា ហេតុអ្វីបានជាមិនមានក្រុមអធិការកិច្ចកោះហៅបុគ្គលឈ្មោះជឿង ថេង យកទៅធ្វើការសាកសួរ ព្រោះបទល្មើសនៃការប្រមូលនិងដឹកជញ្ជូនឈើដោយខុសច្បាប់នេះ គឺខុសច្បាប់ទាំងស្រុង ហើយក៏ជាទោសមួយដែលបុគ្គលរូបនេះ អាចប្រឈមមុខនឹងផ្លូវច្បាប់ផងដែរ។
ដោយឡែក តាមប្រភពបានបង្ហើបថា បុគ្គលឈ្មោះជឿង ថេង ជាទាហានភូមិភាគ 3 និងជាថៅកែឈើរូបនេះ កំពុងតែរត់ទៅលាក់ខ្លួនពួនអាត្មាអោបដៃអោបជើងអ្នកធំមួយរូបនៅក្រុងភ្នំពេញ ដើម្បីឲ្យជួយអន្តរាគមន៍រឿងរបស់ខ្លួន។ ស្របពេលដែលឈ្មោះជឿងថេង កំពុងតែលាក់ខ្លួនថ្នាក់លើកោះហៅឈ្មោះលឹម ស្រ៊ុនផេង អោយមកធ្វើរបាយការណ៍។
ករណីនេះ បើតាមប្រភពពីមន្ត្រីនគរបាលស្រុកឱរ៉ាល់បានបញ្ជាក់ថា ពេលដែលសមត្ថ កិច្ច ចូលទៅដល់គឺឃើញវត្តមានរបស់បុគ្គលឈ្មោះលឹមស្រ៊ុនផេងនេះនៅកន្លែងលើកដាក់ឈើបាត់ទៅហើយដោយសារតែថ្នាក់លើចូលទៅទាន់ជាបន្តបន្ទាប់ទើបគេមិនមានឱកាសបើករថយន្តគេចចេញបានក៏ភាសយករួចតែខ្លួនទៅ។ អ្វីដែលធ្វើឲ្យមហាជនចាប់អារម្មណ៍បំផុតនោះគឺបទល្មើសព្រៃនៅតែកើតមានហូរហែតែគេមិនដែលឃើញអស់លោកសមត្ថកិច្ចពាក់ពន្ធ័ធ្វើការបង្ក្រាបសោះឡើយ ។
មជ្ឈដ្ឋានមហាជនបានលើកឡើងផងដែរថា វាពិតជារឿងដែលគួរអោយខ្មាស់អៀនបំផុតនៅពេលដែលសមត្ថកិច្ច ដែលមិនមែនជាជំនាញ បង្ក្រាបបទល្មើសបានហើយ បែរជាប្រគល់អោយជំនាញចាត់ការទៅវិញ។
អ្វីដែលរិតតែគួរអោយខ្មាស់អៀនបំផុតនោះគឺនៅពេលដែលអាជ្ញាធរមូលដ្ឋានបង្ក្រាបបទល្មើសដេកយាមតាំងពីយប់ រហូតដល់ភ្លឺទើបឃើញអស់លោកមន្ត្រីឡេមឡឺមទាំងនោះស្លៀកពាក់ខោអាវយ៉ាងស្អាតបាតនាំគ្នាថតរូប ហើយធ្វើរបាយការណ៍បង្អួតថ្នាក់លើថាខ្លួនជាម្ចាស់ករណីទៅវិញ។
មហាជនបានសំណូមពរទៅថ្នាក់លើស្នើសុំអោយមានការត្រួតពិនិត្យលក្ខណៈសម្បត្តិរបស់មន្ត្រីដែលបានចាត់តាំង អោយចុះមកបំពេញការងារនៅក្នុងខេត្តកំពង់ស្ពឺនេះ សូមរកមនុស្សណាដែលមាន ឆន្ទៈ និងឧត្តមគតិខ្ពស់ក្នុងការងារ ទើបអាចបង្ការនិងទប់ស្កាត់បទល្មើសព្រៃឈើបាន។ បើបណ្តោយតាមមន្ត្រី ដែលឈរជើងរាល់ថ្ងៃនេះ ច្បាស់ណាស់ដូចពាក្យថា”ទន្សោងគោព្រៃមិនខុសទេ”។
ព័ត៌មានពិស្តារបន្តនឹងមានផ្សាយជូននៅកាសែតកោះសន្តិភាព ។
ចែករំលែកព័តមាននេះ