កម្មករប្រមាណ១ពាន់នាក់នាំគ្នាចេញពីរោងចក្រទាមទារប្រាក់ឈ្នួល បន្ទាប់ពីបិទទ្វារ
- កណ្តាល
ខេត្តកណ្តាល ៖ ព្រឹកថ្ងៃទី១៥ ខែកក្កដា ឆ្នាំ២០២០ កម្មកររោងចក្រ ថៃ យ៉ា ហ្គាមេន អ៊ីនដាសស្ទ្រី…
ខេត្តកណ្តាល ៖ ព្រឹកថ្ងៃទី១៥ ខែកក្កដា ឆ្នាំ២០២០ កម្មកររោងចក្រ ថៃ យ៉ា ហ្គាមេន អ៊ីនដាសស្ទ្រី…
ខេត្តកណ្តាល ៖ ព្រឹកថ្ងៃទី១៥ ខែកក្កដា ឆ្នាំ២០២០ កម្មកររោងចក្រ ថៃ យ៉ា ហ្គាមេន អ៊ីនដាសស្ទ្រី ខូអិលធីឌី ប្រមាណ១.០០០នាក់ បាននាំគ្នាដង្ហែជាក្បួនចេញពីរោងចក្រ ស្ថិតនៅឃុំព្រែកតាទែន ស្រុកពញាឮ ឆ្ពោះទៅរាជធានីភ្នំពេញ ដើម្បីទាមទារប្រាក់ឈ្នួលនិងប្រាក់អត្ថប្រយោជន៍នានាតាមការសន្យា បន្ទាប់ពីរោងចក្របានបិទទ្វារកាលពីដើមខែកក្កដានេះ ។
បន្ទាប់ពីទទួលបានដំណឹងនេះ ឯកឧត្តម គង់ សោភ័ណ អភិបាលខេត្ត បានដឹកនាំក្រុមការងារខេត្ត ដោយមានការអញ្ជើញចូលរួមពីតំណាងក្រសួងការងារនិងបណ្ដុះបណ្ដាលវិជ្ជាជីវៈ តំណាង
ក្រុមហ៊ុន និងអាជ្ញាធរមូលដ្ឋាន បានទៅសម្របសម្រួល ជាមួយបងប្អូនកម្មករកម្មការិនីទាំងនោះនៅសាលាស្រុកពញាឮ ។
ក្នុងការជួបដោះស្រាយគ្នានេះ តំណាងកម្មកររោងចក្របានលើកឡើងសំណូមពរចំនួន៤ ៖
១-ប្រាក់ឈ្នួលចុងក្រោយដែលមិនទាន់បានបើក
២-ប្រាក់ជួសការឈប់សម្រាកប្រចាំឆ្នាំដែលនៅសល់
៣-ប្រាក់បំណាច់រំឭកអតីតភាពការងារ និងប្រាក់បំណាច់អតីតភាពការងារ និង
៤-ក្រុមហ៊ុនផ្ដល់ប្រាក់សម្រាប់ជប់លៀងលាគ្នាចំនួន៣៥% នៃប្រាក់ខែ១៩០ដុល្លារ ។
ក្រោយពីការជួបពិភាក្សាគ្នារវាងតំណាងក្រុមហ៊ុននិងកម្មករ និងដោយមានការសម្របសម្រួល
ពីឯកឧត្តមអភិបាលខេត្ត បានឯកភាពគ្នាចំនួន៥ចំណុច ៖
១-ភាគីក្រុមហ៊ុននឹងបើកប្រាក់ឈ្នួលចុងក្រោយដែលមិនទាន់បានបើកជូនដល់កម្មករ និ
យោជិតទាំងអស់
២-ភាគីក្រុមហ៊ុននឹងបើកប្រាក់ជួសការឈប់សម្រាកប្រចាំឆ្នាំដែលនៅសល់
៣-ភាគីក្រុមហ៊ុននឹងបើកប្រាក់បំណាច់រំឭកអតីតភាពការងារ និងប្រាក់បំណាច់អតីភាពការងារឆ្នាំ២០២០
៤-ភាគីក្រុមហ៊ុននឹងផ្តល់ប្រាក់សម្រាប់ជប់លៀងលាគ្នាចំនួន៣៥% នៃប្រាក់ខែគោល តាមការសន្យាជាមួយកម្មករនិយោជិតកន្លងមក និង
៥-ក្រុមហ៊ុននឹងបិទផ្សាយបញ្ជីបើកប្រាក់ឈ្នួល និងអត្ថប្រយោជន៍ផ្សេងៗនៅថ្ងៃទី១៨ ខែកក្កដា ឆ្នាំ២០២០ និងបើកផ្តល់ជូនកម្មករនិយោជិតនៅថ្ងៃទី២១ ខែកក្កដា ឆ្នាំ២០២០ខាងមុខនេះ ។
មានការកត់សម្គាល់ថា នេះជាសកម្មភាពដ៏ល្អមួយទៀតរបស់ឯកឧត្តមអភិបាលខេត្ត ដែលបានចេញមុខដោះស្រាយរំលត់អធិករណ៍ដែលកើតឡើង គឺលើកទី១-ដោះស្រាយការតវ៉ារបស់អ្នកស្រុកមុខកំពូល ដែលបានទាមទារឱ្យឈ្មួញរើទីតាំងលក់ខ្សាច់ចេញពីមុខវត្ត និងលើកទី២ -ករណីកម្មករតវ៉ានេះ ៕
ចែករំលែកព័តមាននេះ