ខេត្តឧត្តរមានជ័យ ៖ អ្នកទោសខ្មែរចំនួន៣នាក់ត្រូវបានក្រុមអាជ្ញាធរថៃដោះលែងឱ្យមានសេរីភាពឡើងវិញ និងបញ្ជូនខ្លួនយកមកប្រគល់ឱ្យក្រុមអាជ្ញាធរកម្ពុជាតាមមាត់ច្រកទ្វារអន្តរជាតិជាំ កាលពីវេលាម៉ោង២រសៀលថ្ងៃទី១៥ កក្កដា ឆ្នាំ២០២០ ស្ថិតនៅក្នុងភូមិជាំ ឃុំត្រពាំងប្រីយ៍ ស្រុកអន្លង់ វែង ខេត្តឧត្តរមានជ័យ។
អ្នកទោសចំនួន៣នាក់ខាងលើដែលត្រូវក្រុមអាជ្ញាធរថៃធ្វើការដោះលែងរួមមាន ១-ឈ្មោះស៊ឺម ហឿនភេទប្រុស អាយុ៤០ឆ្នាំ រស់នៅភូមិត្រពាំង៣ ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ ២-ឈ្មោះចេន នីន ភេទប្រុស អាយុ២៧ឆ្នាំ រស់នៅភូមិត្រពាំងធំ ឃុំទឹកក្រហម ស្រុកជាំក្សាន្ត ខេត្តព្រះវិហារ និង៣-ឈ្មោះរុណ ឡូត ភេទប្រុស អាយុ២៩ឆ្នាំ រស់នៅភូមិចាត់តាំង ឃុំទឹកក្រហម ស្រុកជាំក្សាន្ត ខេត្តព្រះវិហារ ។
អ្នកទាំង៣នាក់នេះត្រូវក្រុមទាហានថៃចាប់ខ្លួនកាលពីថ្ងៃទី៦ វិច្ឆិកា ឆ្នាំ២០១៨ ដោយចោ ទប្រកាន់ពីបទកាប់ឈើគ្រញួងក្នុងទឹកដីថៃ និងបានជាប់ពន្ធនាគារនៅខេត្តអ៊ូប៊ុន ប្រទេសថៃ។
មន្ត្រីកម្ពុជាដែលបម្រើការងារនៅមាត់ច្រកទ្វារអន្តរជាតិជាំបានឱ្យដឹងថា អ្នកទោសខ្មែរទាំង៣នាក់ដែលបានទទួលពីក្រុមអាជ្ញាធរថៃនោះ សមត្តកិច្ចបានធ្វើការអប់រំ និងឱ្យធ្វើកិច្ចសន្យាបញ្ឈប់ការធ្វើដំណើរឆ្លងដែនដោយខុសច្បាប់ជាបន្តទៀត ក្រោយពីធ្វើការអប់រំរួច សមត្តកិច្ចបានអនុញ្ញាតឱ្យវិលត្រឡប់ទៅលំនៅឋានដើម្បីជួបជុំក្រុមគ្រួសារវិញនៅក្នុងថ្ងៃដដែល៕ (កែសម្រួលដោយ ៖ ធីតា)
ចែករំលែកព័តមាននេះ